A Ku Kustumunya Hi Telefone Ka Zi Kota Ku Bhinzula
1 Hikuyini hi faneleko ku alakanyela a ku kustumunya hi telefone wutirelini ga hina? Ihakuva i ndlela yinwani ya ku vuna vanwani lezaku va kuma wutivi ga lisine kasi va hanyiswa. (2 Ped. 3:9) Hambu lezi a ndlela-tshinya ya hina ya ku huwelela a mahungu yo saseka ya Mufumo wa Nungungulu ku nga ku xumayela hi muti-ni-muti, hi ti yimisele a ku lonzowota a tindlela tinwani ta kuxumayela kasi hi kuma lava zi karatako a ku va kuma mitini yabye. — Mat. 24:14; Luka 10:1-7; Kuv. 14:6.
2 Maxaxametela Ya Kona: A ku fana ni lezi ku nyikwako xipanze ka wokari lezaku a tira hi muti-ni-muti, a vahuweleli va nga ha nyikiwa a xipanze xo kari lezaku va xumayela hi telefone. Zi nga ha mahiwa hi munhu munwe kutani hi ntlawa wu tsongwani kuzilava wa vanhu vambiri kutani vanharu. A wutshamu legi gi tiriswako gi fanele kuva go rula, gi nga hiko na zilo zi colopetelako. A votala va zi wona na zi bhinzula a ku tshama laha mezeni yi nga ni zilo lezi va tolovelako ku zi tirisa loku va xumayela hi muti-ni-muti.
3 Ndlela Yo Kustumunya Hi Telefone: A xikhati lexi hi kustumunyako hi telefone, a zingheniso za hina zi fanele ku mahiwa kota mabhulo. Lava va ha hiko vaswa wutirelini va nga lerela a xingheniso a nwinyi wa muti kanilezi va maha lezo hi ndlela ya bhulo. A zingheniso lezi zi nga lomu ka bhuku Raciocínios, Wutireli Ga Hina Ga Mufumo, ni ka xitlukana Xana Wa Zi Lava Ku Tiva A Zinene? zi nga vuna mhakeni leyi. Loku u maha a xingheniso xa wena nwinyi, dlunyatisa a hloko ya mhaka, u maha xiwutiso u tlhela u ti yimisela a ku gonza mitsalo yi tsongwani leyi yi hlamulako a xiwutiso lexo. Hi tolovelo u ta mu nyika a mabhuku yalawo ma nyikelwako hi muti-ni-muti. Alakanyela a zikhumbuxeto lezi: Rula u tlhela u wulawula hi kunonoka. Kombisa xichawo, lihlaza-mbilu, ni wunghana, hakuva lezo za zwala lomu ka telefone. Demba ndleve a xikhati lexi a nwinyi wa muti a nyikako a mawonela yakwe, u vumela lezi a zi wulako u tlhela u bonga a magezu yakwe. Ti wonele lezaku u nga kumbuki a lulamiselo ga minyikelo, hakuva lezo zi nga ha alakanyelwa kota ndlela ya ku hakhela a telefone.
4 A munhu loyi u wulawulako naye ka telefone a nga hava xilema kutani mubabyi, hambu munhu loyi a ntiro wakwe wu mahako lezaku zi karata a ku mu kuma wutirelini ga muti-ni-muti. Ku na ni lava va hanyako mitini yi bhiyelweko na yi hi ni vagadi kutani lomu ka maprediyu lawa ku nga vumelelwiko a ku nghena munhu wihi ni wihi. Hikwalaho, kota mizamo ya ku tatisa a wutireli ga hina hi kumbhelela, alakanyela a ku tirisa a ndlela leyi yi bhinzulako ya ku xumayela hi telefone.
[Ziwutiso za xigonzo]
1. Hikuyini a ku kustumunya hi telefone ku nga ha alakanyelwako kota ndlela ya lisima ya ku tatisa a wutireli ga hina?
2. Xana a ku kustumunya hi telefone ku xaxametiswa kuyini?
3. Zini lezi hi faneleko ku zi alakanyela a xikhati lexi hi kustumunyako hi telefone?
4. Zini lezi a ku kustumunya hi telefone ku nga ha hi vunako a ku zi maha xipanzeni lexi hi avelweko?