Xana Nza Ringanelwa Hi Ku Xumayela?
1. Hikuyini hi nga faneliko ku tizwa na hi nga ringanelwi hi ku xumayela?
1 Loku ku hi lezaku wa tshuka u ti maha a xiwutiso lexo, tiya hlana! A hi ku gonza nguvu ge hambu a wuzikoti go hlamalisa ga mabeleko lezi zi hi mahako hi ringanelwa a kuva vatireli. A vokari xikari ka vapizani vo sangula va tlhamuselwe kota ‘vanhu va nga gonzangiko, va nga vanhu ntsena.’ Hambulezo, vona va wa hi vaxumayeli vo bhinzula va mahungu yo saseka hakuva va wa ti yimisele ku lanzela a xikombiso xi nyikilweko hi Jesu. — Miti. 4:13; 1 Ped. 2:21.
2. Hi wahi a matshamela yo kari ya magonzisela ya Jesu?
2 Lezi Jesu A Nga Gonzisisa Zona: A gonzo yakwe yi wa hi yo olova, na yi fanela a vanhu va nyalidede, niku yi wa nga karati a ku yi zwisisa. A ziwutiso zakwe, mifananiso, ni zingheniso zo olova zi wa koka kupima ka vaingiseli. (Mat. 6:26) I wa kombisa kukhatala ka lisine hi vanhu. (Mat. 14:14) Ahandle ka lezo, Jesu i wa wulawula na a hi ni kutiyiseka zinwe ni ntamu, na a zi tiva lezaku hi Jehova a nga mu ruma ni ku mu nyika ntamu wa ku tatisa a xiavelo xakwe. — Luka 4:18.
3. Xana Jehova i hi vunisa kuyini a ku tatisa a wutireli ga hina?
3 Jehova Wa Hi Vuna: Hi ku tirisa a Mhaka yakwe ni hlengeletano yakwe, a Mugonzisi wa hina wa Hombe wa hi nyika a gonziselelo leyi yi lavekako lezaku hi xumayela khwatsi a mahungu yo saseka. (Isa. 54:13) Kota lezi Jehova a hlayisileko a tlhatlhambutelo wa ndlela leyi Jesu a nga gonzisa hi yona, ha zi kota a ku kambisisa ni ku pimanyisa a magonzisela yakwe. Jehova i hi nyika a moya wa ku basa a tlhela a hi gonzisa mitlhanganweni ya bandla. (Joh. 14:26) A ku hunza lezo, i hi nyika a vahuweleli va buvileko lava va zi kotako ku hi vuna a ku bhinzula nguvu wutirelini.
4. Hikuyini hi nga ni xigelo xa ku tizwa na hi ringanelwa a ku xumayela a mahungu yo saseka ka vanwani?
4 Hi na ni zigelo zontlhe za kuva hi tizwa na hi ringanelwa a ku xumayela, hakuva “a ntamu wa hina wuta hi ka Nungungulu.” (2 Kor. 3:5) Kota lezi hi khomelelako ka Jehova hi tlhela hi tirisa hi kutsumbekileko a malulamiselo yakwe ya liranzo, hi ta ‘mbhelela, na hi longiselelwe a mitiro yontlhe yo saseka.’ — 2 Tim. 3:17.