A Xo Ranga Wutomini Ga Hina
1. Xana Jesu i zi kombisile kuyini lezaku a wutireli gi wa hi ga lisima kakwe?
1 A wutireli gi wa hi nchumu wo ranga wutomini ga Jesu. I lo ti tsitsirita nguvu, a famba mazanazana ya tikilometro Palestina gontlhe kasi a xumayela vanhu vo tala hi laha zi nga koteka hi kona. I lo hanya wutomi go olova kasi a zi kota ku mbheta xikhati xo tala ni ku veka kupima wutirelini. (Mat. 8:20) Laha a xidlemo xi nga zama a ku mu hungata kasi a chuma a vababyi vabye, i te ngalo: “Nzi yimelwe hi ku kanela a ivangeli ya mufumo wa Nungungulu ni ka yinwani miti; hakuva nzi rumelwe lezo.” — Luka 4:43.
2. Hikuyini a wutireli gi nga hi ga lisima nguvu ka Jesu?
2 Hikuyini a wutireli gi nga hi ga lisima nguvu ka Jesu? A xa hombe nguvu xi nga mu karata ku wa hi kubasisiwa ka vito ga Jehova. (Mat. 6:9) I wa ranza Dadani wakwe wa le tilweni niku hi kota ya lezo, i wa xuva nguvu a ku tatisa kuranza Kakwe ni ku ingisa zileletelo Zakwe zontlhe. (Joh. 14:31) Tlhatakumbiri, i wa khatala hi vanhu hi mbilu yontlhe niku i wa lava ku va vuna. — Mat. 9:36, 37.
3. Hi nga kombisa kuyini lezaku hi vekile kupima ka hina wutirelini?
3 Pimanyisa Jesu: A ku veka kupima ka hina wutirelini khwatsi hi lezi Jesu a nga maha zi nga ha karata hakuva a tiko gi lava ku hi gela a xikhati xa hina ni ku hi komba zilo zo tala zi hambukisako kupima. (Mat. 24:37-39; Luka 21:34) Hikwalaho, hi fanele ku hlawula lezi zi nga za lisima nguvu, hi ti vekela xikhati xa ku ti longisela ni ku hlengela ntirweni wa kuxumayela hi kukhanzakanya. (Fil. 1:10) Hi ti karatela ku hanya wutomi go olova hi tlhela hi nga tirisi nguvu a za misava. — 1 Kor. 7:31.
4. Hikuyini zi nga za lisima a ku tiva lexi hi faneleko ku xi rangisa zalezi?
4 Loku a xikhati xi hi xi tsongwani, a munhu a tlharihileko i rangisa lexi xi nga xa lisima ka zontlhe. Hi xikombiso, loku a tivile lezaku kuta xingulu xa hombe, i wa ta tirisa a xikhati lexo ni ntamu wakwe kasi ku hlota wuponelo ga ngango wakwe ni ku tivisa a vaakelani. A mitiro leyi yi nga hiko na lisima yi wa ta sala nzhako. A xikhati xi seleko na xingulu xa Har–Magedoni xi nga se chikela xi komile. (Zef. 1:14-16; 1 Kor. 7:29) Kasi hi ponisa wutsumbu ga hina ni lava va hi zwako, hi fanele ku chela nguvu kota ka hina wutsumbu ni kugonziseni ka hina, hi maha lezo lomu nzeni kutani le handle ka bandla. (1 Tim. 4:16) Ina, a kupona ka hina ku khegela ka ku simama hi rangisa wutireli wutomini ga hina!