Nyika Nguvu Lisima A Lungelo Ga Wena Ga Ntiro
1. Xana a votala tikweni va wu wonisa kuyini a ntiro wa hina wa kuxumayela?
1 A votala tikweni legi ga Satani va wona a ntiro wa hina wa kuxumayela kota “wupumbu.” (1 Kor. 1:18-21) Loku hi nga ti woneli, a mawonela lawo ya hava ma nga hi tsema hlana ma tlhela ma hungula a kuhiseka ka hina. (Mav. 24:10; Isa. 5:20) Zigelo muni hi nga nazo za kuva hi nyika nguvu lisima a lungelo ga hina ga kuva Timboni ta Jehova? — Isa. 43:10.
2. Hikuyini a wutireli gi zi kotako ku vitaniwa ntiro wo basa?
2 Ntiro Wo Basa: A wutireli ga hina i ntiro wo basa. Hi ndlela muni? A ku hlengela ntirweni wa kuxumayela ku hi maha “zitiri-kulobye” na Jehova, loyi “a basileko,” ku tlhela ku vuna a ku basisa a vito gakwe. (1 Kor. 3:9; 1 Ped. 1:15) Jehova i wona a kuxumayela ka hina kota “muphahlo wa kubonga,” hikwalaho a wutireli ga hina xipanze xa lisima xa wukhozeli ga hina. — Maheb. 13:15.
3. Zini zi mahako lezaku a ntiro wa ku xumayela a mahungu yo saseka wuva wudzunzo ga hombe?
3 A ku xumayela a mahungu yo saseka wudzunzo ga hombe legi gi nyikilweko vanhu vatsongwani. A tingelosi ti wa ta vumela hi matsenya ku maha a ntiro lowo niku handle ko kanakana ti wa ta wu maha khwatsi. (1 Ped. 1:12) Kanilezi Jehova i hlawulile hina vanhu va nga mbhelelangiko, hi nga “zibya za wumba,” lezaku hiva ni lungelo legi go hlamalisa! — 2 Kor. 4:7.
4. Xana hi nga kombisisa kuyini lezaku ha nyika nguvu lisima a wutireli?
4 Wu Fanele Ku Ranga Ka Zontlhe: Kota lezi hakunene hi nyikako nguvu lisima a lungelo ga hina, hi wona a wutireli kota xinwe xa “lezi zi nga zi nene” kutani za lisima nguvu wutomini ga hina. (Fil. 1:10) Hikwalaho, hi ti siyela xikhati viki ni viki lezaku hi xumayela. A muchayi a nyikako nguvu lisima a lungelo gakwe ga ku chaya ka ntlawa wa vachayi wa ndhuma misaveni yontlhe i wa ta ti longisela a khati ni khati va lavako ku chaya a tlhela a ti karatela ku chukwatisa a wuzikoti gakwe. Hi kufanana, hinawu hi ta ti longisela na hi nga seya wutirelini kasi ku ‘avela mhaka ya zinene hi kululama,’ hi tlhela hi ti karatela ku chukwatisa a wuzikoti ga hina ga “ku gonzisa.” — 2 Tim. 2:15; 4:2.
5. Himani a tsakelako nguvu a wutireli ga hina?
5 U nga vumeli lezaku a mawonela ya hava ya lava votala ma ku tsema hlana. Alakanya lezaku ka ha hi ni votala xipanzeni xa hina lava va ha tsakako hi ku enzeliwa hi hina. Hambulezo, hina a hi hloti ku tsakisa vanhu. A xa lisima ka zontlhe hi lezi Jehova a ti zwisako zona, niku yena wa nyika nguvu lisima a kutikarata ka hina. — Isa. 52:7.