Ngha Uva “Ni Wuxinji”
1. Xilaveko muni xa hombe nguvu va nga naxo vanhu inyamutlha?
1 Cima a ku se tshuka kuva ni vanhu vo tala va nga ni xilaveko xa hombe nguvu xa ku kombiselwa wuxinji a ku fana ni nyamutlha. A xiyimo xa misava xi yako xi biha xi vangela vanhu vo tala nguvu a kukhunguvanyeka, kurereka ka mbilu ni kumbhelelwa hi kutsumba. Ku na ni vanhu va timiliyoni va lavako xivuno, niku hina kota maKristu ha zi kota ku kombisa kukhatala ka lisine ka vaakelani va hina. (Mat. 22:39; Gal. 6:10) Xana a kukhatala loko ku nga kombiswa hi ndlela muni?
2. Hi yihi a ndlela ya chukwana ya ku kombisa hi yona a wuxinji?
2 Ntiro Wu Kombisako Wuxinji: A ku na kuchavelela ka lisine ni ka simasima ku nga tiko hi ka Nungungulu. (2 Kor. 1:3, 4) Jehova i hi khongotela lezaku hi mu pimanyisa hi kuva “ni wuxinji,” niku i hi nyikile a ntiro wa ku enzela vaakelani va hina ni mahungu yo saseka ya Mufumo. (1 Ped. 3:8) A ku hlengela hi kuhiseka ntirweni lowu hi yona a ndlela ya chukwana ya ku chavelela “lava va nga ni timbilu ti tshovekileko,” hakuva a Mufumo wa Nungungulu hi wona woce wu to tlhatlha a zikarato za vanhu va xanisekako. (Isa. 61:1) Hi kota ya wuxinji gakwe hi vanhu vakwe, Jehova i ta fuvisa a kubiha a tlhela a neha misava yiswa yo lulama lokuloku. — 2 Ped. 3:13.
3. Xana hi nga wonisa kuyini vanhu hi ndlela leyi Jesu a va wonileko hi yona?
3 Wona Vanhu Kota Lezi Jesu A Va Wonisileko Zona: Hambu ka zikhati lezi a nga xumayela a zidlemo za hombe, Jesu i wa nga woni vanhu vo tala ntsena. Yena i wa wona a munwe ni munwani wabye kota munhu a nga ni xilaveko xa moya. Vona va wa fana ni tiyivu ti nga hiko na murisi wa ku ti rangela. Jesu i lo khumbeka mbilu hi lezi a zi wonileko, zonake a kuceka a ku va gonzisa hi lihlaza-mbilu. (Mar. 6:34) Loku hi wona vanhu hi ndlela leyi Jesu a va wonileko hi yona hi ta kuceka ku kombisa a wuxinji ga lisine ka munwe ni munwani wabye. Lezo zi ta woneka hi ka mawulawulela ya hina ni lezi hi va cuwukisako zona. A kuxumayela ku tava ntiro wa hina wo ranga, niku hi ta zwananisa a magezu ya hina ni zilaveko za munhu munwe ni munwani. — 1 Kor. 9:19-23.
4. Hikuyini hi faneleko ku ambala a mbilu yo zwela wusiwana?
4 Ku na ni xidlemo xa hombe xa vanhu va matiko wontlhe xi amukelako a mahungu ya Mufumo ni kukhatala ku tangalisako loku xi kombiswako. Loku hi simama ku ambala a mbilu yo zwela wusiwana, hi ta dzunza ni ku tsakisa Jehova, a Nungungulu wa hina wa wuxinji. — Kol. 3:12.