Ti karatele ku zwela wusiwana a “Vanhu vontlhe”

A CIKHATI leci Jesu a nga gondzisa vapizani vakwe lezvi va faneleko ku chumayelisa zvona mahungu yo saseka, i va tlharihisile lezvaku a hi contlhe cikhati a vanhu va to va ingisela. (Luka 10:3, 5, 6) Inyamutlha konawu zvi tshamisile zvezvo. A vanhu vo kari hi va kumako va leva kutani kuva ni tihanyi. Loku va hi khoma hi ndlela leyo, zvi nga hi karatela a ku va zwela wusiwana ni ku simama hi va chumayela.

A munhu a zwelako wusiwana van’wani wazwa kukarateka kabye, a tlhela a lava ku va vhuna. Kanilezvi ku nga humelela yini loku hi nga va zweli wusiwana a vanhu hi va kumako ntirweni wa hina wa kuchumayela? Hi nga nyima ku hiseka, hi nga ha xuvi nguvhu a ku chumayela ni ku va vhuna. Hi nga pimanyisa a kuhiseka ni ndzilo. Kasi a ndzilo wu vhura ku laveka ku chela tihunyi hi tlhela hi hlanganyetela. Hi ndlela yo fana, kasi hi nga nyimi ku hiseka hi fanele ku zwela wusiwana! — 1 Va Le Tesalonika 5:19.

Hi nga gondzisa kuyini ku zwela wusiwana van’wani, hambu loku zvi karata? A hi wulawuleni hi zvikombiso zvinharu hi nga zvi pimanyisako: Jehovha, Jesu, na mupostoli Pawule.

PIMANYISA JEHOVHA, U ZWELA WUSIWANA

Hi malembe yo tala a vanhu va wulawula mawunwa hi Jehovha. Kanilezvi i simama a kombisa “tipswalo ka lava va nga bongiko ni ka lava va bihileko”. (Luka 6:35) I ti kombisisa kuyini? Wa zwela wusiwana a vanhu vontlhe. Jehovha i lava ‘lezvaku a vanhu vontlhe va hanyiswa, vava ni kutiva ka zvinene [kutani lisine]’ kasi va poniswa. (1 Timote 2:3, 4) Hambu lezvi Nungungulu a vengako wubihi, a vanhu va lisima kakwe niku a nga lavi ni mun’we a lova. — 2 Pedro 3:9.

Jehovha wa zvi tiva ku Sathani i na ni wutlhari ga ku maha vanhu va kholwa mawunwa yakwe. (2 Va Le Korinte 4:3, 4) Kusukela wun’wananeni, a vanhu va gondzisiwa mawunwa xungetano hi Nungungulu. Hikwalaho a ndlela leyi va ehleketako hi yona ni lezvi va ti zwisako zvona zvi nga va maha zvi va karatela ku vhumela lisine. Kanilezvi Jehovha i xuva nguvhu ku va vhuna. Hi zvi tivisa kuyini lezvo?

Hi cikombiso, ehleketa hi lezvi Jehovha a nga ti zwisa zvona hi vanhu va le Ninivha. Hambu lezvi va nga hi ni tihanyi, Jehovha i byelile Jona aku: ‘Makunu mina ngha ndzi nga tsetsi Ninivha, a muti lowu wa hombe, lowu wu nga ni ntsengo wa 120 000 wa vanhu ni ku hundza, lava va nga zvi tiviko a ku hambanyisa a woko gabye ga cinene ni le’ga cibhabha?’ (Jona 4:11) Jehovha i bayisekile hi kota ya vanhu lavo, lava va nga kala va nga tivi lisine xungetano hi yena. Hikwalaho i no rumela Jona lezvaku a ya va tlharihisa.

A ku fana na Jehovha hinawu hi ti zwisa lezvo hi vanhu. Va lisima nguvhu. Hi xuva nguvhu ku va vhuna ku gondza xungetano hi Jehovha hambu loku zvi wonekisa ku khwatsi va nga ta vhumela lisine.

PIMANYISA JESU, U ZWELA WUSIWANA

A ku fana ni Papayi wakwe, Jesu i wa zwela wusiwana vanhu ‘hakuva va wa xaniseka na va hangalakile, kota tiyivhu ti nga hava murisi’. (Matewu 9:36) Jesu i wa zvi zwisisa lezvi zvi nga va maha va xaniseka. A varangeli vabye va wukhongeli va wa nga va khomi khwatsi niku a va va gondzisa mawunwa. Hambu lezvi Jesu a nga zvi tiva ku a hi vontlhe lava va ngata va ta mu ingisela va nga wa tava valandzeli vakwe, i simamile ku va gondzisa timhaka to tala. — Marku 4:1-9.

Loku a vanhu va nga amukeli mahungu ya hina, hi fanele ku zama ku zwisisa leci ci va mahako va nga ma amukeli. Kuzvilava va na ni mawonela ya hava xungetano hi Bhibhiliya kutani hi kota ya ku wona vokari va ti wulako ku maKristu na va maha zvo biha. A van’wani va ngava va zwile mawunwa xungetano hi lezvi hi zvi kholwako. A van’wani zvi nga maha na va chava ku a maxaka yabye kutani vanhu va lomu mugangeni wabye va va hleka hi lezvi va bhulako na hina.

A vanhu vo kari hi va kumako ntirweni wa kuchumayela va kumene ni zviyimo zvo tshisa wutomini gabye zvi va xanisako nguvhu. A murumiwa wo kari waku hi Kim i wula lezvaku a vanhu vo tala cipandzeni cakwe va ponileko yimpi va lahlekelwe hi zvontlhe va nga hi nazvo. Hikwalaho a va na kutsumba ka lisine. Va tshama na va zangarile niku a va tsumbi munhu. A kutala ka vanhu va cipandze leco va zama ku tsikisa Timboni ta Jehovha a ku chumayela. Ka khati go kari Kim i vhukelwe na a kari a chumayela.

Kim i zvi kotisa kuyini ku simama a va zwela wusiwana vanhu, hambu loku va mu mahela kubiha? Contlhe cikhati i zama ku alakanya Mavingu 19:11, a nge: “A munhu a tlharihileko wa nonoka ku zangara.” Loku a ehleketa hi lezvi zvi nga humelela vanhu va lomu cipandzeni cakwe, zvi mu vhuna ku va zwela wusiwana. Hambu lezvi ku kalako ku nga hi vontlhe a va kumako va kombisako cinghana. Ka cipandze caleco, ku na ni vanhu va va nene a va tlhelelako a ya bhula navo hi Bhibhiliya.

Ti wutise lezvi: ‘Loku ndzi wa nga li tivi lisine, ndzi wa ta maha yini loku a Timboni ta Jehovha ti ta ndzi chumayela?’ Hi cikombiso, hi wa ta kuyini loku hi zwile mawunwa yo tala xungetano hi Timboni? Kuzvilava hi wa nga ta ti amukela. Maku zvi wa ta lava lezvaku va hi zwela wusiwana. Jesu i te hi fanele ku mahela van’wani lezvi hi lavako ku va hi mahela. Hikwalaho hi fanele ku zama ku zwisisa lezvi a van’wani va ti zwisako zvona hi tlhela hiva ni lihlazva-mbilu hambu loku zvi karata. — Matewu 7:12.

PIMANYISA PAWULE, U ZWELA WUSIWANA

Mupostoli Pawule i zwele wusiwana hambu vanhu lava va nga maha tihanyi hi kota ya lezvi a nga chumayela. Hikuyini? Hi ku i wa zvi alakanya lezvi a nga hi zvona kale. I te: ‘A kale ndzi [wa] hi ni ndzhukano, ndzi hi muxanisi ni mulamati. Kanilezvi ndzi no mahelwa wuxinji, hakuva ndzi no zvi maha hi kungativi na ndzi nga se ku kholwa.’ (1 Timote 1:13) Pawule i wa zvi tiva ku Jehovha na Jesu va vile ni wuxinji. Hikwalaho, i wa va zwisisa vanhu lava va nga lava ku mu tsikisa ku chumayela hakuva yenawu i wa mahile lezvo.

Ka zvikhati zvin’wani, Pawule i wa kumana ni vanhu va nga kholwa nguvhu a tigondzo ta mawunwa. I ti zwisile kuyini hi kota ya lezvo? Ka Mitiro 17:16 hi gondza lezvaku a cikhati a nga hi le Atensi i no ‘zangariswa ndzeni kakwe hi ku wona muti na wu tele hi zvifananiso zva vanungungulu’. Hambulezvo Pawule i tirisile zvalezvi zvi nga mu swira kasi a gondzisa hi zvona vanhu. (Mitiro 17:22, 23) I cicile machumayelela yakwe a tlhela a bhula hi zvo hambana ka vanhu va matshamela yo hambana kasi hi ‘ku maha lezvo a fela ku hanyisa van’wani’. — 1 Va Le Korinte 9:20-23.

Loku hi chumayela vanhu va kalako va nga amukeli mahungu ya hina kutani va kholwako tigondzo ta mawunwa, hi fanele ku pimanyisa Pawule. Hi nga wulawula hi lezvi va zvi tivako kasi hi va gondzisa “mahungu yo saseka yo tsakisa”. (Isaya 52:7) A makabye wo kari wa cisati waku hi Dorothy i ngalo: “Lomu cipandzeni ca hina a votala va gondzisilwe ku Nungungulu i bihile mbilu niku i randza ku solasola. Ndzi dzundza vanhu lavo hi kota ya lezvi va zvi kholwako ndzi gumesa ndzi va byela lezvi a Bhibhiliya gi wulako xungetano hi lirandzo lo mbhelela la Jehovha ni citsumbiso cakwe ca cikhatini ci tako.”

‘HLULA KUBIHA HI KU MAHA ZVO SASEKA’

Laha hi yako hi tshinela kugumeseni ka tiko legi, a vanhu va ta “nonohisa vaya mahlweni kubiheni”. (2 Timote 3:1, 13) Kanilezvi a hi faneli ku tsika ku zwela wusiwana kutani ku mbhelelwa hi litsako la hina hi kota ya lezvi a vanhu va mahako. Jehovha a nga hi nyika ntamu wa ‘hlula kubiha hi ku maha zvo saseka’. (Va Le Roma 12:21) A phayona go kari gaku hi Jessica gi wula lezvaku gi tolovela ku kuma vanhu va matshandza va hi poyilako va tlhela va wulawula zva hava ni mahungu ya hina. Jessica i engeta aku: “Lezvo zva mbheta ntamu. Loku ndzi sangula bhulo, ndzi khongela ka Jehovha hi lomu mbilwini kasi a ndzi vhuna ku wona vanhu kota lezvi a va wonisako zvona.” Lezvo zvi mu vhuna ku a nga veki kupima ka lezvi a ti zwisako zvona kanilezvi a veka kupima ka lezvi a nga va vhunisako zvona van’wani.

A cin’wani kambe, hi fanele ku tiyisa vamakabye va hina a cikhati hi chumayelako navo. Jessica i li loku a kari a chumayela ni van’wani, i zama ku va vhuna lezvaku va nga veki kupima ka zvilo zvo biha lezvi zvi nga va humelela. I wulawula hi zvilo zva zvi nene, zvi patsako mihandzu yi nene leyi hi yi kumako ntirweni wa hina wa kuchumayela hambu loku a van’wani va nga amukeli mahungu ya hina.

Jehovha wa zvi tiva ku a hi contlhe cikhati zvi hi olovelako ku chumayela. Kanilezvi wa tsaka nguvhu loku hi pimanyisa wuxinji gakwe! Luka 6:36) A co tiya hi ku, a kuzwela wusiwana ka Jehovha ni lihlazva-mbilu lakwe hi vanhu va tiko legi zvi nga tava zva kala kupindzuka. Ha tiyiseka lezvaku wa zvi tiva ku a magumo ma ta chikela rini. Loku a kugumesa ku nga se chikela, a ntiro wa hina wa kuchumayela wa cihatla. (2 Timote 4:2) Hikwalaho a hi simameni hi chumayela hi kuhiseka hi tlhela hi zwela wusiwana “vanhu vontlhe”.