Xana Wa Gonza Zontlhe U Zi Kotako Ka Jehova?

1. Xana Jehova i ti zwisa kuyini hi gonziselelo?

¹ Jehova, a Mugonzisi wa hina wa Hombe, i lava lezaku hiva vanhu vo tiva. (Isa. 48:17, 18) Yena i lo sangula ku gonzisa a xikhati a nga vanga a N’wana wakwe wa matewula. (Joh. 8:28) Anzhako ka kuhluwuka ka Adamu, Jehova a nga nyimangi ku gonzisa, hi liranzo i lo simama a gonzisa vanhu va nga mbhelelangiko. — 2 Tim. 3:14, 15.

2. I tsima muni ga kugonzisa legi gi mahekako xikhatini lexi?

² Inyamutlha, Jehova i rangela a tsima ga kugonzisa ga hombe ka wontlhe ma vileko kona matinwini. Kota lezi zi profetilweko hi Isaya, a vanhu va timiliyoni misaveni yontlhe va khulunga vaya ka “xitsunga xa yindlu ya ka Jehova.” (Isa. 2:2) Hikuyini va khulungelako kona? Va yela ku ya gonzisiwa tindleleni ta Nungungulu hi Jehova wutsumbu! (Isa. 2:3) Nzeni ka lembe ga ntiro ga 2010, a Timboni ta Jehova ti mbhetile a xikhati xo hunza a 1,6 wa tibiliyoni ta tihora na ti nyika wukustumunyu ni ku gonzisa vanhu a zinene za Biblia. Ahandle ka lezo, viki ni viki ka nyikiwa gonziselelo ya moya mabandleni ya ku hunza 105.000 misaveni yontlhe, niku a nanza gi tsumbekileko ni go tlhariha ga humesa mabhuku ya wuKristu ma gonzisako hi tirimi ta ku hunza 500.

3. Xana wena wutsumbu u vunekisa kuyini hi gonziselelo leyi Jehova a hi nyikako?

³ Yi Lonzowote Khwatsi: Handle ko kanakana ha vuneka nguvu hi gonziselelo ya Nungungulu! Hi gonzile lezaku Nungungulu i na ni vito ni lezaku yena wa hi khatalela. (Tis. 83:18; 1 Ped. 5:6, 7) Hi tivile a mihlamulo ya ziwutiso zo kari za lisima nguvu wutomini, zo khwatsi hi lezi: Hikuyini a vanhu va xanisekako ni kufa? Nzi nga li kumisa kuyini a litsako la lisine? Hi gihi a kungo ga wutomi? Jehova i tlhelile a hi nyika milayo yi rangelako a mahanyela ya hina kasi ha ‘fela ku humelela tindleleni ta hina.’ — Jox. 1:8.

4. Tixaka muni ta gonziselelo leti a malanza ya Nungungulu ma zi kotako ku vuneka hi tona, niku hikuyini hi faneleko ku gonza zontlhe hi zi kotako ka Jehova?

⁴ Tlhatakumbiri, Jehova wa nyika gonziselelo yo hlawuleka ka malanza yakwe yo hlaya kasi ma zi kota ku maha zo tala ntirweni wakwe. A maphajina 4-6 ma xaxameta a tixaka to kari ta gonziselelo leyo yi zi kotako ku kumiwa hi vokari. Hambu loku a xiyimo xa hina xi nga hi vumeleli ku kuma a linwe la tixaka ta gonziselelo leti ti xaxametilweko, xana ha yi lonzowota khwatsi a gonziselelo ya Nungungulu leyi hi zi kotako ku yi kuma? Xana ha kuca a vaswa, lava a kutala ka zikhati va guliwako hi vagonzisi va xikola ni vanwani a kuva va gonza zikola zo tlakuka za tiko, lezaku va ti vekela mixuvo ya moya va tlhela va ti karatela ku kuma a gonziselelo yo tlakuka ka tontlhe — ku nga gonziselelo ya Nungungulu? A ku gonza zontlhe hi zi kotako ka Jehova zi ta hi vuna kuva ni wutomi go tsakisa zalezi ni ga pinzukelwa xikhatini xi tako. — Tis. 119:105; Joh. 17:3.

Tixaka To Kari Ta Gonziselelo Leti A Hlengeletano Ya Jehova Yi Nyikako

Xikola Xo Gonzisa A Kugonza Ni Kutsala

• Kungo: Ku gonzisa vanhu a ku lera ni ku tsala lezaku va zi kota ku lera a Biblia ha voce va tlhela va gonzisa vanwani a zinene.

• Xikhati: Ziya hi xilaveko.

• Wutshamu: Salawu ya Mufumo ya bandla.

• Lava Va Zi Kotako Ku Xi Gonza: Vahuweleli vontlhe ni vatsakeli.

• Ndlela Ya Ku Ti Tsalelisa: A madota ya bandla hi wona ma rangelako a xikola xo gonzisa a kugonza ni kutsala hi kuya hi xilaveko xa bandla, ma tlhela ma kuca vontlhe lava va nga ni xilaveko lezaku va xi gonza.

Xikola Xa Wutireli Ga Nungungulu

• Kungo: Ku gonzisa vahuweleli lezaku vava vaxumayeli ni vagonzisi vo humelela va mahungu yo saseka.

• Xikhati: A xi gumesi.

• Wutshamu: Salawu ya Mufumo ya bandla.

• Lava Va Zi Kotako Ku Ti Tsalelisa: Vahuweleli vontlhe ni vanhu vanwani va hlengelako ni bandla, na va vumela a tigonzo ta Biblia va tlhela va hanya wutomi gi zwananako ni matshinya ya milayo ya wuKristu.

• Ndlela Ya Ku Ti Tsalelisa: Wulawula ni muwoneleli wa Xikola xa Wutireli ga Nungungulu.

Xikola Xo Gonzisa Lirimi La Matiko-wundle

• Kungo: Ku gonzisa vahuweleli a ku xumayela a mahungu yo saseka hi linwani lirimi.

• Xikhati: Mune kutani ntlhanu wa tihweti. A xikola lexi xi tala ku gonziwa hi Mulongiso ni mixo hi hora yinwe kutani timbiri.

• Wutshamu: A kutala ka zikhati xi mahelwa ka Salawu ya Mufumo yi nga kusuhani.

• Lava Va Zi Kotako Ku Ti Tsalelisa: Vahuweleli va nga ka xiyimo xi nene na va xuva ku xumayela hi lirimi la matiko-wundle.

• Ndlela Ya Ku Ti Tsalelisa: A zikola lezi zi lulamiselwa hi hofisa ya ravi hi kuyelana ni xilaveko.

Kuakiwa Ka Tisalawu Ta Mufumo

• Kungo: Ku aka ni ku aketa a tiSalawu ta Mufumo. Lexi a hi xikola, kanilezi lava va ti nyiketelako ku tira ka lulamiselo legi va gonzisiwa wumeseri go hambanahambana kasi va zi kota ku vunetela khwatsi kuakeni.

• Xikhati: Ziya hi xiyimo xa munhu loyi a ti nyiketelako.

• Wutshamu: Kwihi ni kwihi lomu a Kometi ya Xipanze ya ku Aka yi ku rumelako. A vatiri vo kari va nga ha kombeliwa lezaku va vunetela ka ntiro wa ku vuna lava va welweko hi timhango ta ntumbuluko ka matshamu ya le kule.

• Lezi Zi Lavekako Kasi Ku Vitaniwa: Ku laveka vamakabye va xinuna ni va xisati va bapatizilweko, va nga ka xiyimo xi nene hi tlhelo ga moya, hi kuya hi mubiko wa hubye ya madota. Va nga tiva wumeseri go kari hambu ku nga gi tivi.

• Ndlela Ya Ku Ti Tsalelisa: Tatisa a Petição para o Serviço Voluntário em Construções de Salões do Reino (A-25-T) yi kombeliwako ka madota ya bandla.

Xikola Xa Ntiro Wa Wuphayona

• Kungo: Ku vuna maphayona lezaku ma ‘maha a ntiro wa wona’ hi kumbhelela. — 2 Tim. 4:5.

• Xikhati: Maviki mambiri.

• Wutshamu: Gi hlawuliwa hi hofisa ya ravi; a kutala ka zikhati ku tiriswa a Salawu ya Mufumo yi nga kusuhani.

• Lezi Zi Lavekako Kasi Ku Xi Gonza: Kuva phayona ga xikhati xontlhe hi xipimo xa lembe kutani kuhunza.

• Ndlela Ya Ku Ti Tsalelisa: A maphayona lawa ma ringanelwako ma tsalelwa hi hlengeletano ma tlhela ma tivisiwa hi muwoneleli wa xipanze.

Xikola Xa Lava Va Ha Hi Ku Chikelako Beteli

• Kungo: A xikola lexi xi mahelwa ku vuna lava va ha hi ku chikelako Beteli lezaku va tira khwatsi laho.

• Xikhati: Ku gonziwa a hora hi viki ka khume ga maviki ni ntlhanu ni ginwe.

• Wutshamu: Beteli.

• Lezi Zi Lavekako Kasi Ku Xi Gonza: Va fanele kuva ziro za ngango wa Beteli zi vitanelweko ku ta tira laho kala rini kutani lava va telako ku ta tira hi xikhati xo leha nguvu (ku ngava lembe kutani kuhunza).

• Ndlela Ya Ku Ti Tsalelisa: A ziro za ngango wa Beteli lezi zi ringanelwako zi tsalelwa hi hlengeletano.

Xikola Xa Wutireli Ga Mufumo

• Kungo: Ku gonzisa madota ni malanza ya wutireli lezaku ma tira khwatsi ka wutihlamuleli ga wona ga ku wonelela ni ku fambisa zilo hi nayo. (Miti. 20:28) A xikola lexi xi mahiwa hi kukhanzakanya anzhako ka malembe yo kari ma bohiwako hi Hubye yi Fumako.

• Xikhati: Ka malembana lawa yo gumesa a madota ma gonza hi siku ginwe ni khihlanya kanilezi a malanza ya wutireli ma gonza hi siku ginwe.

• Wutshamu: Gi tala kuva Salawu ya Mufumo kutani Salawu ya Mitlhangano ya Xipanze yi nga kusuhani.

• Lezi Zi Lavekako Kasi Ku Xi Gonza: Va fanele kuva madota kutani malanza ya wutireli.

• Ndlela Ya Ku Ti Tsalelisa: A madota ni malanza ya wutireli ma ringanelwako ma rambiwa hi muwoneleli wa xipanze.

Xikola Xa Madota Ya Bandlaa

• Kungo: Ku vuna madota lezaku ma khatalela khwatsi a wutihlamuleli ga wona bandleni.

• Xikhati: Ntlhanu wa masiku.

• Wutshamu: Gi hlawuliwa hi hofisa ya ravi; a kutala ka zikhati xi mahelwa ka Salawu ya Mufumo kutani Salawu ya Mitlhangano ya Xipanze yi nga kusuhani.

• Lezi Zi Lavekako Kasi Ku Xi Gonza: Va fanele kuva madota.

• Ndlela Ya Ku Ti Tsalelisa: A madota lawa ma ringanelwako ma rambiwa hi hofisa ya ravi.

Xikola Xa Vawoneleli Va Fambafambako Ni Vasati Vabyeb

• Kungo: Ku vuna a vawoneleli va xipanze ni va muganga lezaku va tira hi wuchukwana mabandleni va tlhela ‘va pinyama kukaneleni ni kugonziseni’ ni ku risa lava va va wonelelako. — 1 Tim. 5:17; 1 Ped. 5:2, 3.

• Xikhati: Tihweti timbiri.

• Wutshamu: Gi hlawuliwa hi hofisa ya ravi.

• Lezi Zi Lavekako Kasi Ku Xi Gonza: Va fanele kuva vawoneleli va xipanze kutani va muganga.

• Ndlela Ya Ku Ti Tsalelisa: A vawoneleli va fambafambako lava va ringanelwako zinwe ni vasati vabye va rambiwa hi hofisa ya ravi.

Xikola Xa Biblia Xa Vamakabye Va Magwenzac

• Kungo: Ku longisela a madota ni malanza ya wutireli lawa ma kalako ma nga se nghenela wukati lezaku ma nyikwa wutihlamuleli go engeteleka. Loku va mbhetile a xikola, a kutala ka vona va ta rumelwa ku ya tira lomu ku nga ni xilaveko tikweni gabye ga mabeleko. A vokari va nga ha rumelwa ku ya tira matiko-wundle loku va byela a hofisa ya ravi lezaku va ti yimisele ku maha lezo.

• Xikhati: Tihweti timbiri.

• Wutshamu: Gi hlawuliwa hi hofisa ya ravi; a kutala ka zikhati xi mahelwa ka Salawu ya Mitlhangano ya Xipanze kutani Salawu ya Mufumo.

• Lezi Zi Lavekako Kasi Ku Xi Gonza: Vamakabye va xinuna va magwenza va nga xikari ka 23 ni 62 wa malembe na va nga babyababyi, na va hi lava va zi lavako ku tirela vamakabye ni ku vuvumisa a Mufumo kontlhe lomu ku nga ni xilaveko. (Mar. 10:29, 30) Va fanele ku ngha va tira kota malanza ya wutireli hi malembe mambiri yo tala hambu kuhunza kutani ku ngha va hi madota.

• Ndlela Ya Ku Ti Tsalelisa: Loku a xikola lexi xi mahiwa xipanzeni xi wonelelwako hi ravi ga nwina, ka mahiwa mutlhangano wa lava va tsakelako ku ti tsalelisa ka xona mutlhanganweni wa xipanze. Ka nyikiwa manwani mahungu ka mutlhangano lowo.

Xikola Xa Biblia Xa Mipatswa Ya Makristud

• Kungo: Ku nyika gonziselelo yo hlawulela a mipatswa ya vatekani lezaku yi zi kota ku tiriswa hi kuengeteleka hi Jehova ni hlengeletano yakwe. A kutala ka lava va mbhetako a xikola lexi va ta rumelwa ku ya tira lomu ku nga ni xilaveko tikweni gabye ga mabeleko. A vokari va nga ha rumelwa ku ya tira matiko-wundle loku va byela a hofisa ya ravi lezaku va ti yimisele ku maha lezo.

• Xikhati: Tihweti timbiri.

• Wutshamu: A titurma to sangula ti gonza le Tsinza ka Gonziselelo ya Torre de Vigia le Patterson, Nova Iorque, E.U.A. Hi kufamba ka xikhati, a xikola lexi xi ta mahelwa ka matshamu lawa ma hlawuliwako hi hofisa ya ravi, nguvunguvu ka Salawu ya Mitlhangano ya Xipanze kutani Salawu ya Mufumo.

• Lezi Zi Lavekako Kasi Ku Xi Gonza: Mipatswa ya vatekani va nga xikari ka 25 ni 50 wa malembe na va nga babyababyi niku va fanele kuva ka xiyimo xi va vumelelako ku ya tira ni kwihi lomu ku nga ni xilaveko, na va hi ni moya waku: “Hi mina, ruma mina.” (Isa. 6:8) Tlhatakumbiri, va fanele ku ngha va hi ni malembe mambiri na va chadile kutani kuhunza, na va hi ntirweni wa xikhati xontlhe hi malembe mambiri kutani kuhunza na va nga nyimangi.

• Ndlela Ya Ku Ti Tsalelisa: Loku a xikola lexi xi mahiwa xipanzeni xi wonelelwako hi ravi ga nwina, ka mahiwa mutlhangano wa lava va tsakelako ku ti tsalelisa ka xona mutlhanganweni wo hlawuleka. Ka nyikiwa manwani mahungu ka mutlhangano lowo.

Xikola Xa Biblia Xa Gileade Xa Torre de Vigia

• Kungo: Ku gonzisa maphayona ni vanwani vatireli va xikhati xontlhe lezaku va maha varumiwa.

• Xikhati: Ntlhanu wa tihweti.

• Wutshamu: Tsinza ka Gonziselelo ya Torre de Vigia le Patterson, Nova Iorque, E.U.A.

• Lezi Zi Lavekako Kasi Ku Xi Gonza: Mipatswa ya vatekani va nga ni malembe manharu na va bapatizilwe na va hi xikari ka 21 ni 38 wa malembe a xikhati va mahako a xikombelo xabye xo sangula. Va fanele ku ngha va wulawula xiNgiza, va hi ni malembe mambiri na va chadile kutani kuhunza na va hi ntirweni wa xikhati xontlhe hi malembe mambiri kutani kuhunza na va nga nyimangi. A va faneli kuva vanhu va ku babyababya. A maphayona lawa ma tirako matiko-wundle (a ku patsa ni lawa ma nga nyikwa xikhundla xa wurumiwa); a vawoneleli va fambafambako; ziro za ngango wa Beteli; ni lava va gonzileko a Xikola xa Gonziselelo ya Wutireli, Xikola xa Biblia xa Vamakabye va Magwenza, ni Xikola xa Biblia xa Mipatswa ya Makristu vonawu va zi kota ku ti tsalelisa loku va tatisa lezi zi lavekako kasi ku gonza a xikola lexi.

• Ndlela Ya Ku Ti Tsalelisa: Ka tihofisa ta ravi ti sinako ti hlawulilwe, ka mahiwa a mutlhangano wa lava va tsakelako ku gonza a xikola lexi gotsovanyweni wa muganga. Ka nyikiwa manwani mahungu ka mutlhangano lowo. Loku a mitlhangano leyi yi nga mahiwi ka migotsovanyano ya tiko ga nwina na u zi lava ku ti tsalelisa, tsalela a hofisa ya nwina ya ravi kasi ku byeliwa lezi u faneleko ku maha.

Xikola Xa Ziro Za Kometi Ya Ravi Ni Vasati Vabye

• Kungo: Ku vuna a ziro za Kometi ya Ravi lezaku zi maha khwatsi a ntiro wa ku wonelela a miti ya Beteli, ku khatalela a timhaka ta wutireli ti khumbako mabandla, ni ku wonelela a zipanze ni miganga matikweni yabye, zinwe ni wuhunzuluseli, ntiro wa kugandla mabhuku, kurumelwa ka mabhuku mabandleni ni ku wonelela zipanze zo hambanahambana za lomu hofiseni ya ravi. — Luka 12:48b.

• Xikhati: Tihweti timbiri.

• Wutshamu: Tsinza ka Gonziselelo ya Torre de Vigia le Patterson, Nova Iorque, E.U.A.

• Lezi Zi Lavekako Kasi Ku Xi Gonza: Va fanele kuva ziro za Kometi ya Ravi kutani ziro za Kometi ya Tiko. A vokari va sangula hi ku gonza a xikola lexi zonake va yimisiwa kota ziro za Kometi ya Ravi kutani ya Tiko.

• Ndlela Ya Ku Ti Tsalelisa: A vamakabye va xinuna va ringanelwako zinwe ni vasati vabye va rambiwa hi Hubye yi Fumako.

[Mitlhamuselo ya lahasi]