A Timbewu Ti Fanele Ku Cheletelwa Mati Lezaku Ti Kula

1. Zini zi faneleko ku cheletelwa mati lezaku zi kula?

¹ A timbewu ti byaliwako ti fanele ku cheletelwa mati lezaku ti kula. Hi zalezo kambe zi lavekako ka timbewu ta zinene ti byaliwako timbilwini ta vanhu xipanzeni xa hina. (1 Kor. 3:6) Loku hi lava ku a timbewu leti to fananisela ti zima mitsu, ti kula, ti tlhela ti vuvuma, hi fanele ku maha maenzo yo wuyela hi ya ti cheletela mati hi ku tirisa a Mhaka ya Nungungulu.

2. Xana hi nga zimisa kuyini a xiseketelo xa lezi hi to bhula hi zona ka lienzo li tako?

² Vuxa Xiwutiso: A xikhati lexi u longiselako a xingheniso xa wena, zi ngo yini loku wo tlhela u longisela xiwutiso xi vuxako kutsakela lexi u to xi hlamula ka lienzo lo wuyela? Xi vuxe kumbheleni ka bhulo go sangula, u tlhela u maha malulamiselo yo tiya ya ku mu tlhelela. A votala va zi wona na zi vuna a ku hlawula a mhaka ya lomu ka bhuku A Biblia Gi Gonzisako leyi yi to va vuna ku kombisa a mamahela ya xigonzo xa Biblia.

3. Mahungu muni lawa hi nga ma patsako a xikhati hi tsalako lezi hi nga bhula hi zona ni munhu?

³ Tsala: Neti u hambana ni munhu loyi u nga bhula naye hi khati go sangula, ti nyike xikhati xa ku tsala. Tsala a vito ga munhu loye ni laha a tshamako kona. Zi nene kambe a ku tsala a siku ni xikhati lexi u wulawulileko naye, lezi mu bhulileko hi zona, ni bhuku legi u mu siyeleko, loku u gi siyile. I wulawulile hi ku lumba a chechi yo kari? I na ni ngango? I kumbukile lezi a zi ranzako ni lezi zi mu karatako? A mahungu lawo ma ta ku vuna ku zwananisa a mabhulo ma tako ni zilaveko za munhu loye. Tlhela u tsala a siku legi mu bohileko a ku mu tlhelela hi gona ni xiwutiso lexi u to ya xi hlamula.

4. Xungetano hi ku hlakulela a kutsakela ka munhu, hikuyini hi faneleko ku timisela?

⁴ Timisela: Satani a nga ta humula mizanweni yakwe ya ku lava ku “susa a mhaka” yi byalilweko mbilwini ya munhu. (Mar. 4:14, 15) Hikwalaho, u nga rereki loku zi ku karatela ku tlhela u kuma a mutsakeli mutini wakwe. Zi ngo yini loku wo mu rumelela papilo kutani ku siya timhaka to kari laha nyangweni? A phayona go kari gi lo sangula xigonzo xa laha nyangweni ni wasati wo kari kanilezi gi wa nga ha mu kumi mutini, hikwalaho gi lo mu rumelela papilo. A xikhati lexi gi nga mu kuma mutini, a wasati loye i lo kombisa lezi a nga khumbisilwe zona hi kukhatala loku a nga kombiselwa. Loku hi kari hi cheletela mati a timbewu ta zinene, hi nga kuma a litsako li tako hi ku ti wona na ti hluka, ti kula, ti tlhela ti ‘pswala mihanzu hi ka 30, ka 60, ni ka 100.’ — Mar. 4:20