Engetela wutlhari ga wena wutirelini — Hi ku siya mhaka yo ta bhula hi yona ka lienzo lo wuyela

Hikuyini zi nga za lisima? Loku hi kuma wo kari a kombisako kutsakela, hi fanele ku tlhela hi mu enzela kasi hi ya cheletela mati a mbewu ya lisine leyi hi byalileko. (1 Kor. 3:6) Kasi hi maha lezo, a kutala ka zikhati ku laveka lezaku na hi nga se suka, hi siya mhaka yo ta bhula hi yona ka lienzo lo wuyela. Tlhatakumbiri, zi nene a kuva hi siya xiwutiso lezaku hi ta bhula hi xona ka siku hi to mu enzela kambe. Lezo zi ta maha nwinyi wa muti a dokolokela ku tlhela a enzelwa, niku loku ku hi lezaku a xiwutiso lexo xi hlamuliwa ka bhuku legi hi nga mu siyela, a nga ha tsakela nguvu ku gi lera. A ku siya mhaka yo ta bhula hi yona ka lienzo li lanzelako, zi tlhela zi maha lezaku zi olova ku mu tlhelela hakuva mu sina mu hlawulile a mhaka yo ta bhula hi yona, niku a nwinyi wa muti wa zi tiva a ku i rinzela yini. A siku legi hi mu tlhelelako, hi nga mu byela lezaku hi mu enzele kambe kasi ku ta hlamula a xiwutiso lexi hi xi siyileko ka lienzo lo gumesa zonake hi simama ni mhaka.

Mamahela ya kona:

• A xikhati lexi u longiselako a xingheniso xa wena xa muti ni muti, tlhela u longisela a xiwutiso u to xi hlamula ka lienzo li lanzelako. Xi fanele ku seketelwa ka mhaka yi tlhamuselwako ka mabhuku lawa u ma nyikelako ka siku lego, kutani ku hlamuliwa ka ginwe ga mabhuku ya hina ya xigonzo, legi u nga ha sangulako ku gi tirisa loku u ta mu tlhelela.

• Laha u gumesako a mabhulo ni munhu a kombisako kutsakela, mu byele lezaku wa xuva ku bhula naye kambe, zonake u mu siyela xiwutiso lexi u xi longiseleko. Ka zipanze zo kari a vanhu va tshama na va khomekile nguvu laha ka kuza va nga vumeli ku wula siku gaku u va enzela kambe. Ka ziyimo lezo, u nga haku: “Xana wa tolovela ku kumeka hi xikhati lexi laha kaya? [Rinzela hlamulo.] Ka viki gi tako, nzi ta tsakela ku ku enzela hi xikhatanyana kasi ku ta hlamula xiwutiso lexi . . . Loku nzi wuya kambe na u khomekile nguvu, tekela ku nzi byela.”

• Loku u byela nwinyi wa muti lezaku u ta wuya hi xikhati xo kari, tlhela hi xona futsi. (Mat. 5:37) Laha u gumesako a lienzo lo wuyela, siya mhaka yo ta bhula hi yona ka lienzo linwani.

Ka hweti leyi, ringisa lezi:

• A xikhati lexi u longiselako a xingheniso xa wena, tlhela u longisela a xiwutiso u to xi hlamula ka lienzo li lanzelako. Xi tirise zinwe ni vahuweleli vanwani lava u tirako navo.