Hi Rini Hi Faneleko Ku Tlhelela Lava Va Kombisileko Kutsakela?
1. Xini xi patsekako kumaheni ka vapizani?
1 A ku maha vapizani zi patsa a ku tlhelela wihi ni wihi a kombisako kutiyimisela a ku gonza a malulamiselo ya Jehova ya Mufumo. (Mat. 28:19, 20) Zikhati zinyingi, a xikhati xa chukwana xa ku maha a lienzo lo wuyela xi khegela ka longoloko wa hina ni ka mutsakeli. Hikuyini hi faneleko a ku tekela ku tlhela anzhako ka lienzo lo sangula?
2, 3. Hikuyini hi faneleko ku zama a ku tlhelela a munhu hi kuhatlisa hi laha zi kotekako ha kona?
2 Hikuyini Hi Faneleko Ku Tlhelela Munhu Hi Kuhatlisa? A ntiro wa ku kanela “a ivangeli leyi ya mufumo” wu laha kusuhani ni ku gumesa, niku a kugumesa ka mafambisela lawa ya zilo ku tshinele. (Mat. 24:14; 1 Ped. 4:7) Hikwalaho, lezi a “siku ga kuhanyiswa” ga ha hiko kona ka lava va tsakelako, hi fanele ku ingisa a xileletelo xa ku ‘kanela a mhaka hi kupinyama,’ lezi zi patsako a ku tlhela hi kuhatlisa hi laha zi kotekako ha kona kasi ku hlakulela a kutsakela loku ku kombisilweko. — 2 Kor. 6:1, 2; 2 Tim. 4:2.
3 Satani i zi lava hi mahlo yo pswhuka a ku daya a mbewu yihi ni yihi leyi hi nga ha yi byalako mbilwini ya munhu a tsakelako. (Mar. 4:14, 15) A ziro za ngango, vatiri-kulobye, ni vanwani va tala ku tseketsela lava va kombisako kutsakela. A ku va tlhelela hi kuhatlisa zi hi vuna a ku tlhavinyeta a bhulo ga hina go sangula na vanwani va nga se zi kota a ku tima a kutsakela loko.
4. Ka lienzo lo sangula, xana hi nga ma mahisa kuyini a malulamiselo ya lienzo lo wuyela?
4 Tsumbisa A Ku Tlhela: I chukwana a ku maha malulamiselo yo tiya ya ku tlhela na mu nga se vala a bhulo ga nwina go sangula. Siya a xiwutiso u to xi hlamula ka lienzo lo wuyela. Za lisima a ku tsala lezi mu nga bhula hi zona ka lienzo la wena lo sangula zinwe ni malulamiselo ya wena ya ku tlhelela. Loku a longoloko wa wena wu ku vumelela, u nga ha kombela a ku wuya hi manziko wa kona kutani ka siku ginwani ga laha kusuhani. Loku u mahile a lienzo lo sangula kumbheleni ka viki, na munhu loyi a tsakelako a tira nzeni ka viki, kuzilava i ta vumela a ku enzelwa kambe kumbheleni ka viki loku ku lanzelako. A xikhati lexi u tsumbisako a ku tlhela, ti karatele ku tatisa a gezu ga wena. — Mat. 5:37.
5. Xana a kutlhela ka hina handle ko hlwela ku ta hi vunisa kuyini a ku tatisa a xileletelo xa Jesu xa ku maha vapizani?
5 Hi na ni zigelo zo zwala za ku tlhelela lava va kombisileko kutsakela hi kuhatlisa hi laha zi kotekako ha kona. Hikwalaho, tsumbisa a ku tlhela hi kuhatlisa, hakuva ‘a xikhati xi seleko xi komile.’ (1 Kor. 7:29) Loku hi tekela ku tlhelela lava va kombisileko ku tsakela a mahungu ya Mufumo, a mizamo ya hina ya anda ku bhinzula.