Despertai! Go Hlawuleka Legi Gi Ta Nga Avelwa Hi Novembro!
1 A vanhu vo tala va na ni ziwutiso za lisine xungetano hi lisima la Biblia. Loku gi tsalilwe hi vanhu, hikuyini gi vitaniwako Mhaka ya Nungungulu? Hikuyini nzi fanele ku tsumba a Biblia lezaku gi kongomisa a mazambo ya mina? Loku nzi lera nzi tlhela nzi gonza a Biblia, xana a xikhati ni mizamo ya mina zi ta bhinzula yini? Hi gihi wuhunzuluseli ga Biblia legi nzi faneleko ku gi tirisa? Lezi i zinwani za ziwutiso zi hlamuliwako ka Despertai! go hlawuleka ga Novembro, gi nga ni hloko ya mhaka “Será que você pode confiar na Bíblia?”
2 Hi ta lava ku avela nguvu a Despertai! legi go hlawuleka lomu xipanzeni xa hina. Loku zi koteka, hlengela wutirelini ga muti-ni-muti ni bandla Mulongiso wunwe ni wunwani nzeni ka hweti ya Novembro. Komba a Despertai! legi ka maxaka ya wena, vaakelani, vatiri-kulobye, vagonzisi, zigonzani-kulobye, ni ka maenzo ya wena yo wuyela. Famba nago loku uya xitolo ni loku u enza. A madota ma kombele a tikopiya to engeteleka lezaku a bandla giva ni marevista yo enela.
3 Sangula A Xigonzo Xa Biblia: Loku u nyikela a revista, wa zi kota ku veka xiseketelo xa xigonzo xa Biblia na u nga se gumesa a bhulo ga wena. Hi xikombiso, u nga haku, “Ka xikhati xi lanzelako, nzi wa ta tsakela ku ku komba a hlamulo wa Biblia ka xiwutiso lexi, ‘Hi gihi khungo ga Nungungulu xungetano hi misava?’” Hi ku lanzela tlhela ni bhuku A Biblia Gi Gonzisako zonake komba a nwinyi wa muti a maphajina 4-5, kutani ku kambisisa a tinzimana 1-3 ta xipimo 3. A mawonela manwani hi ku ngalo, “Ka xikhati xi lanzelako, nzi wa ta tsakela ku ku komba a xiprofeto xa Biblia lexi xi tatisekako zalezi.” A xikhati lexi u ta nga tlhela, komba nwinyi wa muti a xipimo 9 xa bhuku u tlhela u kambisisa naye a tinzimana 1-3. Kutani u nga ha byela a nwinyi wa muti uku: “A vo tala za va karatela a ku zwisisa lezi va zi gonzako lomu ka Biblia. Ka xikhati xi lanzelako, nzi wa ta tsakela ku ku komba lezi u nga zi kotisako zona a ku zwisisa khwatsi a Biblia ga wena.” Ka lienzo lo wuyela, enghenisa a bhuku A Biblia Gi Gonzisako u tlhela u sangula xigonzo.
4 Ntsena a Biblia hi gona gi nga ni “mitsalo yo basa,” leyi yi zi kotako a ku hi maha hi ‘tlhariha, hi kala hi hanyiswa.’ (2 Tim. 3:15) Hi kota ya lezo, hontlheni hi ta lava kuva ni kuhlengela hi kuchivirika a kuaveleni ka Despertai! go hlawuleka kasi ha vuna vanhu lezaku va engetela a ku tsumba a Biblia!