Timboni ta Jehova — zikombiso za kukholwa, Xipanze 1: Kuhuma munyameni
Lomu ka Biblia, a kuwonekela ku yelana ni lisine, a munyama wu yelana ni mawunwa. (Tis. 43:3; Isa. 5:20) Satani i nghenisile munyama tikweni a xikhati lexi a nga khohlisa Eva. Hi kugumesa, i lo khubhunyeta vanhu vontlhe hi munyama wa hombe. (Kuv. 12:9) A DVD Testemunhas de Jeová — Fé em Ação, Parte 1: Da Escuridão para a Luz, yi komba lezi a malanza ya Jehova ma nga humisa zona munyameni ma nghena kuwonekeleni hi kufamba ka malembe. (Isa. 60:1, 2) Anzhako ka ku bukela a vidiyu leyi, hlamula ziwutiso lezi:
(1) Xana a munyama wu nghenisile kuyini anzhako ka kufa ka vapostoli? (2) Kusukela hi va 1100, xini xi vunileko vanhu a ku wona lezaku a tichechi ti wa nga gonzisi lisine? (3) Kuve mani Henry Grew na George Storrs? (4) Zini zi mahekileko kuhanyeni ka Charles Russell, lezi zi nga cica wutomi gakwe? (5) Xana makabye Russell, papai wakwe, ni vanghana vakwe va wa mahisa kuyini a xigonzo xabye xa Biblia, niku zini va zi kumileko? (6) Xana a ntlawa wa Russell wu tlhanganisile kuyini ni ntlawa wa Nelson Barbour, kanilezi xini xi nga maha lezaku makabye Russell a huma ntlaweni lowo? (7) Xini xi nga maheka hi Julho wa 1879, lexi xi sangulisileko a nguva yiswa ya kuwonekela ka moya? (8) Anzhako ka lezo, xana a Zigonzani za Biblia zi mahile yini kasi ku hangalasa a mahungu yo saseka ke? (9) Na ka ha sele malembe yo tala, xana a Zigonzani za Biblia zi wa rinzela yini hi 1914? (10) Zikarato muni lezi a Zigonzani za Biblia zi ngava nazo loku makabye Russell a file? (11) Xana a Zigonzani za Biblia zi mahile yini laha makabye Rutherford ni zitiri-kulobye va nga humeswa paxweni ke? (12) Xana a vidiyu leyi yi engetelisile kuyini a kubonga ka wena a hlengeletano ya Jehova? (13) Xana yi ku vunisile kuyini lezaku u simama ku xumayela hi kuchivirika hambu loku u kumana ni zikarato ke? (14) Hi nga yi tirisisa kuyini a vidiyu leyi kasi ku vuna a maxaka ya hina, zigonzani za hina za Biblia ni vanwani ke?
Kunene, a Zigonzani lezi za Biblia za kale zi hi siyele tshomba ya lisima nguvu! Tikweni legi gi nga munyameni, vona va lo tiya hlana va hangalasa a kuwonekela. Ngha hina hontlhe hi pimanyisa a xikombiso xabye, ‘hi famba khwatsi hi vanana va kuwonekela.’ — Efe. 5:8.