Tsima gi bhinzulako

Maviki manharu mahlweni ka gotsovanyano, a mabandla ma ta sangula a tsima ga ku ramba a vatsakeli xipanzeni xabye lezaku va va kona gotsovanyanweni. Ku na ni xigelo xo zwala xa ku maha a tsima legi ga lembe ni lembe. Lava va amukelako a xirambo va tlhela vata gotsovanyanweni va tala ku khumbiwa hi tikanelo ti seketelweko ka mitsalo, zipanze zi xaxametilweko khwatsi lezi zi teleko hi vatiri va kuziranza, zinwe ni mahanyela ma nene ni wumunwe legi hi gi kombisako. (Tis. 110:3; 133:1; Isa. 65:13, 14) Hambulezo, xana a tsima ga hina ga bhinzula, nguvunguvu ka matshamu lawa zi lavako ku a vatsakeli va enza pfhuka wa hombe lezaku va ya wona a gotsovanyano?

Anzhako ka gotsovanyano wa muganga wa 2011, a hofisa ya ravi yi amukele papilo ga wasati a kumileko xirambo lahasi ka livati lakwe. A kutala ka zikhati, i wa fihlala loku a Timboni ta Jehova ti mu enzela. I tsalile lezi: “Nzi wa hi ni muti wo saseka, ni nuna wa mu nene, niku nzi wa alakanya lezaku nzi wa hi ni zontlhe zi nga laveka kasi ku nzi maha nzi tsaka. Lexi xi nga tsakisiko hi lezaku nzi wa simama nzi nga tsakangi, niku hi lisine a wutomi ga mina gi wa nga hi na xikongomelo. Hikwalaho, nzi lo boha ku enza pfhuka wa 320 wa tikilometro lezaku nzi ya wona a longoloko wa Mulongiso.” I wu tsakele nguvu gotsovanyano laha kuza a fonela a nuna wakwe a mu byela lezaku i lava ku etlela kasi a wu wona kambe hi Sonto. “Nzi ingisele tontlhe tikanelo, nzi tivana ni Timboni ta Jehova to tala, niku nzi wa nga lavi a ku lezo zi mbhela.” Loku a tlhelile kaya, i lo sangula ku gonza a Biblia, niku anzhako ka mune wa tihweti i lova muhuweleli a nga bapatizwangiko. “Nza tsaka nguvu hi kuva nzi kumile a xirambo lahasi ka livati la mina hakuva makunu a wutomi ga mina gi na ni xikongomelo xa lisine!”

A vokari ka lava va to amukela a zirambo va tata gotsovanyanweni. Hikwalaho, tira hi kuhiseka ka tsima legi ga lisima. Loku a zirambo zi sala, tana nazo laha gotsovanyanweni, u tlhela u zi tirisa kasi ku nyika a wukustumunyu ga xitshuketi.

[Tlhamuselo wa mifota ka phajina 5]

Ndlela yo nyikela xirambo

Kasi hi tlhanganyisa a xipanze xa hina, hi nga lehisi mabhulo. Hi nga haku: “Gi cile. Nzi tela ku ta ku nyika a xirambo lexi lezaku uva kona ka mutlhangano wa hombe. U ta kuma manwani mahungu kwalaha.” Tlharihisa. Kumbheleni ka viki, u nga rivali ku nyikela marevista a xikhati lexi u nyikelako xirambo.