Xirambo xo kongoma
1. A tsima ga zirambo za gotsovanyano gi ta sangula rini?
1 Loku u kari u maha makungo ya ku longisela zakuga zo hlawuleka kasi ku taga ni maxaka kutani vanghana va wena, lezi zi lavako a kutikarata ni timali kasi ku zi longisela, kuzilava u wa ta va ramba hi kuhiseka ka hombe. Hi kufanana, ku na ni ntiro wa hombe wu mahiwako kasi ku longisela a mubuzo wa moya lowu hi tova nawo gotsovanyanweni lowu wu tako. Maviki manharu mahlweni ka gotsovanyano wa hina, Jehova i hi nyika lungelo ga ku ramba vanwani lezaku va tava kona. Zini zi to hi vuna ku nyikela zirambo lezo hi kuhiseka?
2. Xini xi to hi kuca ku tira hi ntamu wontlhe tsimeni ga zirambo ke?
2 A ku ehleketa hi lezi hina wutsumbu hi vunekisako zona hi gonziselelo yo nanziha leyi Jehova a hi nyikako migotsovanyanweni ya hina zi ta hi kuca ku tira hi ntamu wontlhe tsimeni legi. (Isa. 65:13, 14) Hi fanele ku alakanya kambe lezaku a tsima ga hina ga lembe ni lembe ga pswala mihanzu. (Wona a kwadru “Ga pswala mihanzu.”) A vanhu vo kari hi va rambako va tata gotsovanyanweni, kanilezi a vanwani va nga tata. Hambulezo, na ku nga khataliseki a ntsengo wa lava va tota, a kutikarata ka hina xikhatini xa tsima ku neha wudzunzo ka Jehova ku tlhela ku kombisa a wuhana gakwe. — Tis. 145:3, 7; Kuv. 22:17.
3. A zirambo zi ta nyikeliswa kuyini ke?
3 A hubye yinwe ni yinwani ya madota yi fanele ku boha lezi va nga mahisako zona kasi ku eneta xipanze xa hombe hi zirambo, va tlhela va boha ku va ta siya zirambo mitini leyi ku nga hiko na munhu kutani ku zi nyikela ka wukustumunyu ga lomu maruweni xipanzeni xabye ke. Kumbheleni ka viki, a zirambo zi fanele ku nyikelwa zinwe ni marevista loku zi fanela. Anzhako ka loku a tsima gi hunzile, hi nga alakanyela a litsako hi tova nalo hi ku tiva lezaku hi tirile hi kuhiseka ni ku tiva lezaku a vanhu vo tala hi laha zi kotekako hi kona vave na hina mubuzweni lowu Jehova a hi maheleko!
[Kwadru ka phajina 4]
U ta wula yini?
Anzhako ka ku losana, u nga ha wula lezi: “Hi lomu ka tsima gi mahiwako misaveni yontlhe ga ku ramba vanhu lezaku vava kona ka ximaho xo hlawuleka nguvu. A siku, ni xikhati, ni wutshamu zi tsalilwe kwalaha ka xirambo lexi.”
[Kwadru ka phajina 4]
Ga pswala mihanzu
• Ka malembe yo hlaya ma hunzileko a makabye wo kari wa xisati a nga hi tsimeni ga ku nyikela zirambo, i lo sangula ku ti wutisa lezaku a kutikarata kontlhe loku ku mahiwako ka bhinzula ke. I ehleketa aku: ‘A vanhu lava hi va rambako va ta vumela kuta gotsovanyanweni hakunene ke?’ Na a hi laha gotsovanyanweni hi Mulongiso ni mixo, i lo wona wanuna wa wukhongeli ga xiSiki a nga tshamile kusuhani, hikwalaho hi boha ku bhula naye. Zi lo woneka lezaku i tile gotsovanyanweni hi kuva a amukele xirambo. I wa hi ni nyanza ya ziwutiso lezi a makabye loye wa xisati a nga mu hlamula. A wanuna loye i lo wula lezi a nga vunekisa zona hi longoloko lowo ni lezi a nga hlamalisa zona hi ku wona a kucuwukeka ni mahanyela ya vatsombani. Hi nzhako ka xikhati ka siku galego, a makabye loyi i lo sangula bhulo ni patswa wu nga tshamile kusuhani naye. Vonawu va wa no amukela xirambo niku va wa tile gotsovanyanweni hi xibhomba. Va wa xalala hi gotsovanyano lowo niku va wa hi ni makungo ya ku wuya kambe hi Sonto. A makabye loyi wa xisati i lo sangula ku wona a lisima la tsima ga hina ga lembe ni lembe.
• Ka gotsovanyano wo kari wa ha hi ku hunzako, a patsa wo kari wa maphayona ya xikhati xontlhe wu lo sangula bhulo ni patswa wo kari wu kulileko hi tanga. A patswa lowo wu lo wula lezaku gi wa hi khati go sangula a kuta. A maphayona ma lo va wutisa lezi: “Himani a nga mu ramba?” Va hlamula lezi: “Hi no wuya hi ta kuma xirambo lahasi ka livati la hina.” Va lo lera xirambo va tlhela va tatisa a formulario leyi yi nga seno nzhako ka xona. A vatsombani vanwani laha gotsovanyanweni va lo khomisa nyoka ni patswa lowu. Va lo tsaka nguvu hi longoloko lowo laha ka kuza va boha ku wuya hi manziko wa kona. Ku lo mahiwa malulamiselo ya ku enzela patswa lowu kasi ku hlakulela a kutsakela kabye.