A nzima leyi yi nga tsakelwa himani?
1. Loku hi kari hi gonza A Murinzeli kutani a Despertai! xini hi faneleko ku xi alakanyela, niku hikuyini?
1 A marevista A Murinzeli ni Despertai! ma tsaliwa na ku alakanyelwa a vanhu va misava yontlhe. Hikwalaho, a tinzima ta wona ti wulawula hi zilo zo hambanahambana. A xikhati lexi hi gonzako a nzima yinwe ni yinwani ka revista ga hina, hi fanele ku alakanyela a ku himani a to yi tsakela, hi tlhela hi ti karatela ku ya mu nyika a revista lego.
2. Mahungu muni ma nga lomu ka marevista ya hina ma nga ha tsakisako nguvu a vokari?
2 Xana A Murinzeli wa hweti leyi wa wulawula hi mhaka yo kari leyi wena ni mutiri-kuloni mu tshukileko mu bhula hi yona? Xana ku na ni nzima yi wulawulako hi wutomi ga ngango leyi yi nga vunako a xaka go kari? Xana ku na ni munhu u mu tivako a nga ni makungo ya ku enzela tiko go kari gi kombiswako lomu ka Despertai!? Xana a ginwe ga marevista lawo gi nga tsakelwa ka wutshamu go kari ga mabhinzu kutani ka tihofisa ta mufumo xipanzeni xa nwina? Hi xikombiso, a revista gi wulawulako hi zikarato lezi a vakhosaheleko va kumanako nazo gi nga tsakelwa nguvu ka miti ya ku hlayisa vanhu va khosaheleko. A tihubye ta ku wonelela a kulanzelwa ka milayo ti nga ha tsakela a revista gi wulawulako hi wugevenga.
3. Hlawutela tshango gi kombako a lisima la ku nyikela a marevista ka lava hi alakanyako lezaku va ta ma tsakela.
3 Mabhinzu: Anzhako ka ku amukela a Despertai! ga Outubro wa 2011 gi nga wulawula hi ku wundla vana va nga ni kupima, a patswa wo kari le Djoni wu lo fonela a 25 wa zikola xipanzeni xa bandla ga wona. A 22 wa zona zi vumele a marevista zi tlhela zi ma avela ka zigonzani. A patswa wunwani kwale Djoni wu vile ni mawonela yalawo niku wu nyikele a marevista ka zikola za lomu xipanzeni xa wonawu. A vagonzisi va xinwe xa zikola lezo va lo boha ku tirisa a revista lego ka maaula ya viki. A patswa lowo wu lo hlawutela a tshango ga wona ka muwoneleli wa xipanze. Hi kulanzela, a muwoneleli wa xipanze i lo kuca mabandla lawa a ma enzelako lezaku ma enzela a zikola za lomu zipanzeni zabye. A hofisa ya ravi yi amukele zikombelo zo tala za ku lava ku engetelwa a marevista laha ka kuza a revista lego gi gandliwa kambe!
4. Hikuyini hi faneleko ku nyikela marevista ka vanhu vo tala hi laha zi kotekako hi kona?
4 A marevista ya hina ma tlhamusela a zilo zi mahekako masikwini ya hina ma tlhela ma kongomisa a vanhu ka Biblia ni ka Mufumo wa Nungungulu. Misaveni yontlhe, a marevista lawa hi wona woce ma “kanelako hi kuhanyisa.” (Isa. 52:7) Hikwalaho, hi fanele ku ma nyikela ka vanhu vo tala hi laha zi kotekako hi kona. A ndlela ya yi nene ya ku maha lezo ku ti wutisa lezi: ‘A nzima leyi yi nga tsakelwa himani?’