Tirisa a Web site ya hina kasi ku gonzisa vana va wena
1. Hi gihi kungo ga xipanze lexi xi nge “Crianças” lomu ka Web site ya hina?
1 A Web site ya hina, jw.org, yi mahelwe vanhu va titanga tontlhe. A xipanze lexi xi nge “Crianças” (nghena ka Ensinos Bíblicos > Crianças) xi vuna vanana ni vapswali vabye lezaku va va ni wunghana va tlhela va maha wunghana na Jehova. (Deut. 6:6, 7) U nga xi tirisisa kuyini a xipanze lexi kasi ku gonzisa vana va wena?
2. U nga hlawulisa kuyini mahungu ya ku gonza ni vana va wena mayelano ni tanga yabye ke?
2 Tiva vana va wena: A nwanana munwe ni munwani i na ni zilaveko zakwe. (1 Kor. 13:11) Makunu u nga zi kotisa kuyini ku hlawula mahungu ya ku gonza ni vana va wena mayelano ni tanga yabye ke? Ti wutise lezi: ‘Mahungu muni ma to tsakelwa hi vana va mina? Xana va ta ma zwisisa? Xikhati muni va mbhetako na va ha dembile ndleve?’ A vanana va malembe manharu kuya hasi u nga gonza navo a mahungu ma nga ka xipanze “Minhas Primeiras Lições da Bíblia.” A mingango yinwani yi ranza ku tirisa a matimu ya Biblia ma nga ka xipanze “Ensine Seus Filhos.” Wona kambe lezi zi lanzelako.
3. Xana a vapswali va nga ma tirisisa kuyini a matimu ni timhaka ti nga ka “Projetos para Adoração em Família”?
3 Projetos para Adoração em Família: A timhaka leti ti mahelwe ku vuna tihloko ta mingango a ku gonza ni vanana vabye. Thitha laha kaku “Baixar,” u gonza a “Guia para os pais” kasi u tiva a matirisela ya timhaka ti kumekako lomo. Tirisa a zithombe zo kota lezi zi lavako ku pendiwa kasi ku gonzisa vana va wena lava va vatsongwani. Vuna a vana lava va hombana a ku tsala a magezu lawa ma lavekako lomu ka timhaka ta xigonzo. A zigonzo zontlhe za mhaka yo kari zi yelana ni matimu yalawa ya manwe ya Biblia, hikwalaho a vanana va titanga tontlhe va na ni xo maha ka mhaka yaleyi yinwe ya wukhozeli ga ngango.
4. Zini zi nga lomu ka xipanze “Torne-se Amigo de Jeová”?
4 Torne-se Amigo de Jeová: A tividiyu, tisimu, ni zigonzo zi nga lomu ka xipanze lexi xa site ya hina zi vuna vapswali a ku gonzisa Mhaka ya Nungungulu vanana vabye va vatsongwani. (Deut. 31:12) A vidiyu yinwe ni yinwani yi gonzisa zilo za lisima. A mihlakano yo kota leyi ya ku lavetela a nchumu laha ka xithombe yi khanyisa a lisima la zigonzo lezo. Kota lezi a kutala ka vanana va ranzako ku yimbelela — ni lezi a tisimu ti vunako vanana a ku alakanya lezi va zi gonzileko — ku tolovela ku cheliwa tisimu ta Mufumo ni tisimu ti mahelweko vanana hi kukongoma.
5. Hikuyini a vapswali va faneleko ku kombela Jehova kasi ku va vuna ku gonzisa lisine vana vabye?
5 Vapswali, Jehova i lava lezaku mu humelela kota vamamani ni vapapai. Hikwalaho, mu kombeleni lezaku a mu vuna ku gonzisa lisine vana va nwina. (Vala. 13:8) Hi ku vuniwa hi Jehova, mu nga zi kota ku gonzisa vana va nwina lezaku va ‘tlhariha, va kala va hanyiswa hi kukholwa loku ku nga ka Kristu Jesu.’ — 2 Tim. 3:15; Mav. 4:1-4.