Xana Jehova i nzi wonisa kuyini?
1. Xana a Biblia gi fana ni woni hi ndlela muni?
1 Wa tolovela ku ti wona laha woni? A kutala ka hina hi ti wona siku ni siku, hakuva lezo zi hi vuna ku wona lezi zi faneleko ku lulamisiwa lomu mirini wa hina. A Biblia gi fananiswa ni woni. A ku gonza a Mhaka ya Nungungulu zi hi vuna ku wona a mbilu ya hina, ku nga yona leyi Jehova a yi cuwukako. (1 Sam. 16:7; Jak. 1:22-24) A Mhaka ya Nungungulu ya zi kota ku “hlola a maalakanyo ni mixuvo ya mbilu.” (Maheb. 4:12) Xana a ku gonza Biblia siku ni siku hi tlhela hi ehleketa hi lezi hi gonzako, zi hi vunisa kuyini a ku wona laha hi faneleko ku chukwatisa kasi hiva vavangeli vo humelela? — Tis. 1:1-3.
2. A Biblia gi nga hi vunisa kuyini a ku ti hlola?
2 Tirisa a Biblia kota woni: A matimu ya Biblia ya malanza ya Jehova yo tsumbeka ma hi vuna ku tiva a matshamela lawa ma sasekileko mahlweni kakwe. Hi xikombiso, Davida i kombisile kuhiseka vitweni ga Nungungulu. (1 Sam. 17:45, 46) Hi kuziranza, Isaya i ti nyikele lezaku a ya xumayela vanhu vo nonoha timbilu hi kutiya-hlana. (Isa. 6:8, 9) A liranzo la Jesu lo eta hi Dadani wakwe wa le tilweni li mu mahile a wona wutireli kota xibuka xa litsako ni xa kutangala wutshanwini ga kuva nzhwalo. (Joh. 4:34) A maKristu ya zana ga malembe go sangula ma xumayele hi kuhiseka, ma tsumba Jehova, niku ma wa ti yimisele ku nga tsiki. (Miti. 5:41, 42; 2 Kor. 4:1; 2 Tim. 4:17) A ku ehleketa hi zikombiso lezi zi hi vuna a kuva hi ti hlola na hi hi ni kungo ga ku chukwatisa a ntiro wa hina wo basa.
3. Hikuyini hi faneleko ku potsa a ‘nzi ta sina,’ ka lezi zi lavako ku lulamiswa?
3 Lulamisa le’zi nga lulamangiko: Hi lisine, a zi vuni nchumu a kuva hi ti wona laha ka woni, hi wona xihoxo xo kari zonake hi xi tsika. Hi nga kombela Jehova lezaku a hi vuna a ku ti wona lezi hi nga zona hakunene a tlhela a hi vuna ku cica lezi zi lavekako. (Tis. 139:23, 24; Luka 11:13) Kota lezi a xikhati xi seleko xi nga xi tsongwani ni lezi a mhaka leyo yi nga ya kufa ni kuhanya, hi fanele ku potsa a ‘nzi ta sina,’ loku ku hi ni lezi zi lavako ku lulamiswa. — 1 Kor. 7:29; 1 Tim. 4:16.
4. Zini zi humelelako ka munhu loyi a cuwukako ka Mhaka ya Nungungulu a pola zokari zonake a maha xokari hi zona?
4 A mbilu ya munhu — ku nga lexi Jehova a xi cuwukako — yi na ni lisima nguvu a ku hunza lezi a munhu a wonekisako zona hi lahandle. (1 Ped. 3:3, 4) Zini zi humelelako ka munhu loyi a cuwukako ka Mhaka ya Nungungulu a pola zokari zonake a maha xokari hi zona? A munhu loye i maha ‘muzwi a nga rivaliko, loyi a mahako, niku i ta tsaka hi lezi a zi mahako.’ (Jak. 1:25, Tradução do Novo Mundo) Hakunene hi ta tsaka hi tlhela hiva vatireli vo bhinzula hakuva hi ta kombisa a kungangamela ka Jehova “a ku khwatsi hi laha wonini.” — 2 Kor. 3:18.