Zana ga malembe na ku huwelelwa a Mufumo!
1. Zini lezi a vanhu va Jehova va nga kuciwa ku maha kusuhani ka zana ga malembe gi hunzileko?
1 “Langutani, a Hosi ya fuma makunu! Nwina mu vahuweleli va yona. Hikwalaho, huwelelani, huwelelani, huwelelani, a Hosi ni mufumo wa yona.” Hi magezu lawa yo khumba nguvu ma wulilweko hi makabye Rutherford kusuhani ka zana ga malembe gi hunzileko, a vanhu va Jehova va lo kuciwa ku huwelela mahungu ya Mufumo matlhelweni wontlhe ya misava. Niku hi zalezo hi mahako futsi! A ku fana ni maKristu yo sangula, hi xumayela a mahungu yo saseka ya Mufumo “ka zivangwa zontlhe lahasi ka tilo.” (Kol. 1:23) Loku hi cuwuka nzhako ka zana ga malembe gi hunzileko, zini hi zi mahileko kasi ku huwelela mahungu ya Mufumo? Hi nga simamisa kuyini a ku huwelela a Mufumo laha hi tshinelako ka masiku ya kuva a Mufumo wu tlhanganyisa a 100 wa malembe na wu yimisilwe?
2. Xana a mabhuku ya hina ma wu vuvumisisa kuyini a Mufumo wa Nungungulu?
2 Loku hi cuwuka nzhako: Hi makume ya malembe, a mabhuku ya hina ma vuvumisa a Mufumo wa Nungungulu. Kusukela hi 1939, a revista-tshinya ga hina gi na ni hloko ya mhaka: A Murinzeli I Huwelela A Mufumo Wa Jehova. Hi kukhanzakanya a revista legi gi wulawula hi Mufumo ni lezi wu to zi maha. A revista Despertai! gonawu gi komba laha kubaseni lezaku a Mufumo wa Nungungulu hi wona woce wu nyikako kutsumba ka vanhu. Hi nga wona lezi zi mahisako zona a tapa ni mbita hi kuva a marevista lawa ya mambiri ku hi wona lawa zezi ma hunzuluselwako ni ku avelwa nguvu misaveni! — Kuv. 14:6.
3. Hi tihi tindlela to kari hi ti tirisako kasi ku huwelela a Mufumo?
3 A vanhu va Jehova va tirisa a tindlela to hambanahambana kasi ku huwelela Mufumo. Ka masiku yo sangula, hi wa tirisa a mimova ya pfumawulo, maradio yo haxa mahungu ni magramafoni yo welela hi mandla. A tindlela leto ti hi vunile ku haxa mahungu yo saseka ka vanhu vo tala ka xikhati lexi a vahuweleli va Mufumo va nga hi vatsongwani. (Tis. 19:4) Ka malembe ya zezanyana, ha haxa mahungu lomu ka jw.org, hi ndlela leyo hi xumayela Mufumo ka vanhu va timiliyoni — a ku patsa ni lava va hanyako matikweni lawa a ntiro wa hina wu beletelwako.
4. Tindlela muni to hlawuleka hi ti tirisako kasi ku xumayela?
4 A vanhu va Jehova va tlhela va tirisa a tindlela to hlawuleka kasi ku haxa a mahungu ya Mufumo. Hi xikombiso, kusukela kwalomo ka va 1995, hi lo maha mizamo ya ku engetela a ntiro wa hina wa muti ni muti hi kuxumayela lomu ka matshamu ya laha kubaseni yo kota lomu maparki, maparajine ni lomu ku xavisiwako zilo. Zezanyana, hi mahile malulamiselo ya wukustumunyu go hlawuleka madoropeni ya hombe ka matiko yo tala. Tlhatakumbiri, a mabandla yo tala ma kari ma nyikela a wukustumunyu ga laha kubaseni xipanzeni xabye hi ku tirisa a timeza ni zikarinyana za mabhuku lezi va zi vekako lomu ka matshamu lawa ku hunzahunzako nguvu vanhu. Kanilezi, a ku xumayela hi muti ni muti ku simama kuva yona ndlela-tshinya ya ku huwelela ka hina a Mufumo. — Miti. 20:20.
5. Malungelo muni lawa a lembe giswa ga ntiro gi to nyika votala xikari ka hina?
5 Loku hi cuwuka mahlweni: Laha hi to sangula a lembe giswa ga ntiro hi Setembro, a votala va ta sangula ku tira kota maphayona ya xikhati xontlhe. Xana wenawu u tava phayona? Loku u nga zi koti, u nga ha tira kota phayona go vunetela hi zikhati zo hambanahambana? Kani wa zi kota kani a wu zi koti, handle ko kanakana Jehova i ta katekisa ni kwihi kutikarata loku u ku mahako kasi ku hlengela hi ntamu wa wena wontlhe kuhuweleleni ka Mufumo. — Mal. 3:10.
6. Hikuyini a Outubro wa 2014 yi tova hweti yo hlawuleka?
6 A Outubro wa 2014 yi tava hweti leyi a Mufumo wu to tlhanganyisa a 100 wa malembe na wu yimisilwe. Hi kufaneleko, A Murinzeli wa vanhu vontlhe wa hweti leyi wu yisa kupima ka Mufumo wa Nungungulu. Hikuyini u nga mahiko a mizamo ya kuva u nyikela a murinzeli loyi ka vanhu vo tala hi laha zi kotekako hi kona ke? Laha hi rinzelako a wumanziko, ngha a munwe ni munwani wa hina a simama ku “kanela ivangeli ya mufumo wa Nungungulu” ka vontlhe lava va to demba ndleve. — Miti. 8:12.