Veka kupima kumaheni ka vapizani
1. Zini zi lavekako kasi a vanhu va hanyiswa?
1 A mubiko wa ntiro wa lembe ga 2014 wu komba a kuhiseka ka vanhu va Nungungulu kuxumayeleni ka mahungu yo saseka ya Mufumo. (Mat 24:14) Hi ntiro wa muti ni muti, matsima ya ku avela ziphephana ni zirambo, ni wukustumunyu ga laha kubaseni, hi chiketa mahungu ya Biblia ka vanhu vo tala ku hunza ni xihi xikhati xi hunzileko. Hambulezo, kasi a vanhu va hanyiswa, hi fanele ku va vuna kuva vapizani va Jesu hi ku gonza navo a Biblia. — 1 Tim. 2:4.
2. Ziwutiso muni hi nga ti wutisako kasi ku hi vuna ku tshama hi longile ku sangula zigonzo za Biblia?
2 Tshama u longile ku sangula zigonzo za Biblia: Loku a munhu a kombisa kutsakela, xana wa zama ku mu kombela mahungu ya ku mu kuma hi wona, u tlhela u hatlisa u mu tlhelela kasi ku sangula xigonzo xa Biblia ke? Kuve rini a khati go gumesa u nga ringisa ku sangula xigonzo xa Biblia ka lienzo lo sangula? Kuve rini a khati go gumesa u nga zama ku sangula xigonzo xa Biblia ni munhu wo ranza ku lera marevista ke? A vatiri-kuloni, ni zigonzani-kuloni, ni vaakelane, ni maxaka, ni vanwani u va tivako, u va kombile a vidiyu Hikuyini u faneleko ku gonza a Biblia? ni Xi mahisiwa kuyini a xigonzo xa Biblia? Loku u tirisa meza kutani xikarinyana xa ku kombisa mabhuku, wa ti karatela ku byela lava va tekako bhuku ga xigonzo lezaku a bhuku lego gi nyika xigonzo xa Biblia xa mahala ke?
3. Kasi hi humelela kugonziseni ka lisine, zini zi lavekako?
3 Xivuno xa Jehova na Jesu: Hi ku sangula a xileletelo xakwe xa ku “maha vapizani” hi gezu “fambani,” Jesu i lo komba lezaku hi fanele ku maha mizamo hi tlhela hlota tindlela. Kanilezi a nga hi tsikangi hoce; i lo tsumbisa kuva zinwe na hina. (Mat. 28:19, 20) Tlhatakumbiri, Jehova i hi nyika moya wakwe wa ku basa ni zitiro a tlhela a hi nyika gonziselelo leyi yi lavekako kasi ku gonzisa vanhu a lisine. (Zak. 4:6; 2 Kor. 4:7) Hi nga khongela hi kombela a ‘kuxuva ni ntamu’ wa ku maha ntiro lowu wa lisima. — Fil. 2:13.
4. Hikuyini hi faneleko ku veka kupima kumaheni ka vapizani?
4 A ku xumayela mahungu yo saseka zi hi nehela litsako la hombe. Hambulezo, a litsako la hina la engeteleka loku hi gonzisa munhu lisine hi tlhela hi mu vuna ku ti patsa na hina ‘ndleleni yi yako wutomini.’ (Mat. 7:14; 1 Tes. 2:19, 20) A xa lisima nguvu hi lezaku loku hi veka kupima kumaheni ka vapizani, hi tsakisa Jehova loyi a ‘nga ranziko lezaku ku lova ni munwe, kanilezi i ranza lezaku vontlhe va hunzuluka.’ — 2 Ped. 3:9.