Ti Karatele Ku Sangula A Xigonzo Xa Biblia
1. Zini zi patsekako kutatiseni ka xileletelo xa Jesu xi nga ka Mateu 28:19, 20?
1 Jesu i hi nyikile a ntiro wa ku ‘maha vapizani, hi va gonzisa.’ (Mat. 28:19, 20) Hikwalaho, hi lava a ku ti karatela ku sangula a xigonzo xa Biblia zikhati zontlhe, ku nga hi ntsena ka siku legi gi yimiselweko nguvunguvu a ku maha lezo. A mawonela lawa ma lanzelako ma ta hi vuna.
2. Hi vamani lava hi nga ha sangulako a ku gonza navo a Biblia?
2 Tekela Ku Sangula: Loku hi ti karatela nguvu a ku sangula a zigonzo za Biblia, hi ta vululekelwa hi tindlela tova ni xinwe. (Mutsh. 11:6) Xana wa tshuka u zama ku sangula xigonzo zalezo u sangulako ku wulawula ni munhu? A bandla go kari gi mahile zontlhe zi nga hi ntanwini wa gona kasi gi maha lezo a hweti yontlhe. Hi nga wona a litsako leli va vileko nalo hi ku sangula a 42 wa zigonzo ziswa za Biblia! U nga alakanyi lezaku a vatsakeli lava u va enzelako va zi tiva a ku u ti yimisele ku gonza navo a Biblia. A xikhati lexi u to va tlhelela ka khati gi lanzelako, hikuyini u nga sanguliko a xigonzo? Loku va nga vumeli, a zi na mhaka. Wa zi kota kuya mahlweni u hlakulela a kutsakela. Xana wa tshuka u wutisa a vaakelani va wena, maxaka, vatiri-kuloni, ni zigonzani-kuloni lezaku va zi lava ku gonza a Biblia na wena? Wa zi kota kambe a ku wutisa zigonzani za wena za Biblia a ku ngalo xana a zi na vanghana kutani maxaka ma tsakelako ku gonza a Biblia ke.
3. Hi xihi a xitiro xa lisima xa ku sangula hi xona a zigonzo lexi hi nga naxo, niku hi nga xi tirisa ka matshamela muni?
3 Xitiro Xa Lisima: A xitiro xa lisima xa ku sangula hi xona a zigonzo za Biblia xitlukana Xana Wa Zi Lava Ku Tiva A Zinene? U nga ha nyika a venyi va miti hambu loku va vumele kutani ku nga vumelangi a ku sala ni manwani mabhuku. Xi nga ha tiriswa a xikhati lexi ku nyikiwako wukustumunyu matshanwini ya kuxavisa, lomu maruweni, a xikhati lexi ku rumelwako mapapilo, ni loku ku mahiwa maenzo yo wuyela. Xi nga ha siyiwa kambe mitini yi nga hiko na vanhu. Hikuyini u nga fambiko ni xitlukana lexi mapfhumbeni ya wena, kuxaveni ka zilo, ni ntirweni? A phajina go gumesa gi tlhamusela hi kukomisa a lulamiselo ga hina ga xigonzo xa Biblia gi tlhela gi maha a xingheniso xa bhuku A Biblia Gi Gonzisako.
4. Hi nga xi tirisisa kuyini a xitlukana Tiva A Zinene kasi ku sangula xigonzo?
4 Anzhako ka ku nyika munhu a xitlukana lexi, u nga ha xungeta a ziwutiso zi nga ka phajina go sangula zonake u mu wutisa lezi, “Hi xihi a xiwutiso lexi u xuvako nguvu a ku tiva hlamulo wa xona?” Hi kulanzela, gonzani a hlamulo wa kona lomu ka xitlukana. Anzhako ka lezo lera kutani ku hlawutela a mahungu ma nga ka phajina go gumesa, lawa ma tlhamuselako a lulamiselo ga hina ga xigonzo xa Biblia. Anzhako ka lezo, u nga ha mu komba laha ku nga ni mahungu manwani xungetano hi mhaka leyo lomu ka bhuku A Biblia Gi Gonzisako, zonake u boha a siku ga ku mu tlhelela kasi ku simama ni bhulo.
5. Hikuyini hi faneleko a ku ti karatela ku sangula a xigonzo xa Biblia?
5 A xipanze xa hina xa ha hi ni vanhu va xuvako ku tiva lezi a Biblia gi zi gonzisako hakunene. Hi ku ti karatela ku sangula a xigonzo xa Biblia, hi ta vululekelwa hi tindlela to tala ta kuzwa litsako la ku vuna vanwani lezaku va nghena ndleleni yi yako wutomini. — Mat. 7:13, 14.