Xi Tirise Xontlhe Xikhati
1. Xana a xitlukana Tiva A Zinene xi nene kumaheni ka yini?
1 A xitlukana Xana Wa Zi Lava Ku Tiva A Zinene? xi mahelwe a ku hi vuna ku sangula a zigonzo za Biblia. Kanilezi xitiro xa xi nene kambe xa ku xwanya hi xona a timbewu ta zinene. (Mutsh. 11:6) Laha ku nyikiwa a mawonela yo kari ya ku hi vuna a ku xi tirisa khwatsi.
2. Hi nga xi tirisisa kuyini a xitlukana lexi kasi ku sangula mabhulo?
2 Kasi Ku Sangula Mabhulo: Wa zi kota ku nyika a nwinyi wa muti a xitlukana lexi, u mu komba a ntlhanu wa ziwutiso ni xinwe zi nga ka phajina go sangula zonake uku: “Hi xihi a xiwutiso lexi u xuvako a ku tiva hlamulo wa xona?” Anzhako ka loku a hlamulile, gonza laha ka xitlukana a hlamulo wa Biblia wa xinwe xa ziwutiso zi hlawulilweko hi nwinyi wa muti u tlhela u lera a mitsalo leyi yi kumbukilweko. Lera kutani ku songa a phajina go gumesa zonake u mu nyika a bhuku A Biblia Gi Gonzisako. Hambu loku a nga vumeli ku teka bhuku, makunu i amukele a xitlukana, lexi kuzilava xi to maha lezaku a zinene zi zima mitsu mbilwini yakwe. — Mat. 13:23.
3. Loku a nwinyi wa muti a khomekile, xana hi nga maha yini?
3 Loku A Nwinyi Wa Muti A Khomekile: U nga ha wula lezi: “Kota lezi u nga hiko na xikhati zalezi, nza ha ku siyela a xitlukana lexi. Xi xaxameta a ntlhanu wa ziwutiso ni xinwe lezi a kutala ka hina hi ti wutisako xi tlhela xi nyika a hlamulo wo kongoma ka xinwe ni xinwani hi ku tirisa a Biblia. A siku legi hi to tlhela hi wonana, nzi navela ku tiva a mawonela ya wena.”
4. Xana hi nga wula yini a xikhati lexi hi nyikelako a xitlukana lomu maruweni?
4 A Xikhati Lexi U Tirako Lomu Maruweni: Wa zi kota ku wula lezi: “Gi cile. Xana u tshuka u ti maha a xinwe xa ziwutiso lezi? [Rinzela hlamulo.] A xitlukana lexi xi nyika mihlamulo yo dlunyateka ya lomu ka Biblia.” Loku a munhu loye a nga jahangi, wa zi kota ku bhula naye hi wunwe wa mihlamulo yi nga lomu ka xitlukana hambu ku tlhela u mu nyika a bhuku A Biblia Gi Gonzisako.
5. Ka zikhati zo kari, xana hi nga xi tirisisa kuyini a xitlukana mitini yi nga hiko na vanhu?
5 Mitini Yi Nga Hiko Na Vanhu: Zipanzeni zo kari, a vahuweleli va tala ku siya mabhuku ka wutshamu go fihlala mitini yi nga hiko na vanhu. Loku lezo zi kari zi mahiwa laha bandleni ga nwina, hikuyini u nga siyiko a xitlukana Tiva A Zinene hi zikhati zo kari? A xikhati lexi u tlhelelako u nga ha wula lezi: “A siku legi hi nga tile laha, u wa nga hi kona, hikwalaho hi lo siya a xitlukana lexi mutini wa wena. Ka ziwutiso lezi, hi xihi lexi u xuvako ku tiva a hlamulo wa xona?”
6. Xini xi mahako lezaku a xitlukana Tiva A Zinene xiva xitiro xi nene xo xumayela hi xona?
6 A xitlukana Tiva A Zinene xi komba a zinene hi ndlela yo olova ni yo kongoma. Xi koka kupima ka vanhu va wukhongeli gontlhe ni va midawuko yontlhe. Xa olova a ku xi nyikela; hambu a vanana ni vahuweleli va vaswa va nga nyikela. Xana wa xi tirisa xontlhe xikhati zi fanelako?