Tsima Go Hlawuleka Go Nyikela Xitlukana Kusukela 20 Ka Outubro Kala 16 Ka Novembro!
1 Kusukela Muvulo wa 20 ka Outubro hi simama hi mune wa maviki, hi tava ka tsima go hlawuleka ga ku nyikela a xitlukana xiswa xi nga ni hloko ya mhaka Xana Wa Zi Lava Ku Tiva A Zinene? Ku rinzelwa lezaku a tsima legi go hlawuleka ga misava yontlhe gi ta maha vanhu va tsakela a xibuka xinwe ntsena xa zinene. — Joh. 17:17.
2 A xitlukana lexi xi nyika a mihlamulo yo kongoma ya ziwutiso za lisima za ntlhanu ni xinwe: “Xana Nungungulu wa hi khatalela hakunene?” “Xana a tiyimpi ni kuxaniseka zi ta tshuka zi mbhela?” “Zini lezi zi hi humelelako loku hifa?” “Xana ku na ni kutsumba ko kari xungetano hi vafileko?” “Nzi nga wu mahisa kuyini a mukhongelo lezaku nzi zwiwa hi Nungungulu?” ni “Xana nzi nga li kumisa kuyini litsako wutomini?” A tichechi ta wuKristu ga mawunwa a ti se nyika a mihlamulo ya lisine ya ziwutiso lezi. Hambu vanhu vo tala lava va kalako va nga ti wuli ku maKristu, va ti maha a ziwutiso lezi, kanilezi za koteka ku ngha va nga zi tivi lezaku a mihlamulo ya kona yo dlunyateka ya kumeka lomu ka Biblia. Hi kota ya lezo, a mahungu lawa ma zi kota ku khumba a timbilu ta vanhu vo tala.
3 Enetani Xipanze Xa Nwina: Ti karateleni a ku eneta xipanze xa nwina hi muti-ni-muti hi laha zi kotekako hi kona. Loku mu hi ni xipanze xa hombe, a madota ma nga ha mu kuca lezaku mu siya a xitlukana xinwe ka muti ni muti wu nga hava munhu ka lienzo lo sangula. U nga rivali ku nyikela a xitlukana lexi ka vaakelani, maxaka, vanghana va le ntirweni kutani va le xikoleni, ni vanwani lava u va tivako. Kuzilava u nga ha maha makungo ya ku tira kota phayona go vunetela hi Outubro kutani Novembro. Xana u na ni nwanana kutani xigonzani xa Biblia xi kombisako kuya mahlweni hi tlhelo ga moya, lexi kuzilava xi nga ringanelwako hi ku ti patsa na hina tsimeni legi kota muhuweleli a nga bapatizwangiko? Loku zi hi tano, tivisa madota.
4 Lezi U To Wula: Kasi ku chiketa a mahungu lawa ka vanhu vo tala, i chukwana a ku komisa a xingheniso xa wena. Wutisa a venyi va miti a xinwe xa ziwutiso za ntlhanu ni xinwe zi nga ka phajina go sangula zonake u va komba a hlamulo wa kona lomu ka xitlukana. Lezo zi ta vuna a vahuweleli vontlhe lezaku va zwananisa a zingheniso zabye ni zilaveko za xipanze. Loku a wo kari a kombisa kutsakela, zi tsale u gumesa u mu tlhelela. Kumbheleni ka viki, a marevista lawa ma ha hi ku chikelako ma nga ha nyikelwa zinwe ni xitlukana. Anzhako ka kugumesa ka tsima hi 16 ka Novembro, hi ta nyikela a bhuku A Biblia Gi Gonzisako. A zitlukana zontlhe zi seleko zi ta nyikelwa ku khwatsi hi zitlukana lezi zinwani zi nga kona.
5 Sangula A Xigonzo Xa Biblia: A xitlukana lexi xi mahelwe nguvunguvu a ku hi vuna ku sangula a zigonzo za Biblia. A xikhati lexi u tlhelelako a munhu loyi a kombisileko kutsakela, u nga ha mu wutisa lezaku hi zihi a zinene za Biblia lezi zi mu chaveleleko kutani ku mu tangalisa. Mu kombe a phajina go gumesa laha ku wulawuliwako hi lulamiselo ga xigonzo xa Biblia, u tlhela u mu nyika a bhuku A Biblia Gi Gonzisako. Loku zi koteka, kambisisa hi kukomisa a nzimana yinwe kutani timbiri ta xipimo lexi xi nga ni mahungu manwani xungetano hi mhaka leyi a yi hlawulileko.
6 Jehova i hlota lava va ta nga mu khozela “hi moya ni zinene.” (Joh. 4:23) Ngha hina hontlhe hi hlengela tsimeni legi go hlawuleka kasi hi vuna vanwani lezaku va kala va tiva a zinene!