Kaxa ga hina ga zitiro za kugonzisa
1. A vavangeli va maKristu va fana ni muvatli hi ndlela muni?
1 A vavatli va tirisa zitiro zo hambanahambana. Hambu lezi a zitiro zo kari zi yako hi ku tshuka zi laveka kasi ku maha mitiro yo hlawuleka, ku na ni zinwani za tshinya zi tiriswako nguvu. A vavatli vo buva va tshama va hi ni zitiro lezo za tshinya lomu kaxeni gabye, niku hi zona va zi tivako khwatsi ku zi tirisa. A Biblia gi kuca muKristu munwe ni munwani lezaku a ti tsitsirita wutirelini a tlhela ava “xitiri xi nga hiko na tingana.” (2 Tim. 2:15) Hi xihi a xitiro xa lisima ka zontlhe lomu kaxeni ga hina? I Mhaka ya Nungungulu — xi nga xitiro-tshinya kasi ku “maha vapizani.” (Mat. 28:19, 20) Hikwalaho, hi fanele ku ti karatela ku tiva ku tirisa khwatsi a ‘mhaka ya lisine.’ Hambulezo, a kaxa ga hina ga zitiro zo gonzisa hi zona gi na ni zitiro zinwani zi tirisiwako nguvu lezi a maKristu wontlhe ma faneleko ku gonza ku zi tirisa khwatsi kasi ku gonzisa vanhu a lisine. — Mav. 22:29.
2. Hi zihi zitiro za hina za tshinya kugonziseni?
2 Zitiro za hina za tshinya kugonziseni: Ahandle ka Biblia, hi zihi zitiro zinwani hi faneleko ku zi tirisa? A xitiro xo ranga hi nga naxo kasi ku gonzisa a lisine la Biblia i bhuku Zini Lezi A Biblia Gi Zi Gonzisako Hakunene? Loku hi mbheta ku gonza bhuku legi ni xigonzani, hi tirisa ‘Tshamani liranzweni la Nungungulu’ kasi ku mu gonzisa ku tirisa matshinya ya milayo ya Biblia wutomini ga siku ni siku. Hikwalaho, hi fanele ku gonza ku tirisa khwatsi a mabhuku lawa ya mambiri. Ku na ni mabroxura yo kari kambe lawa wonawo ma faneleko kuva kona kaxeni ga hina ga zitiro za kugonzisa. A Mahungu yo Saseka ya Nungungulu! xinwe xa zitiro za hina za tshinya kasi ku sangula zigonzo za Biblia. Loku a xipanze xa hina xi hi ni vanhu va nga zi kotiko ku lera khwatsi kutani va wulawulako lirimi leli hi nga ni mabhuku matsongwani hi lona kutani hi nga hiko nawo, hi nga ha tirisa a broxura Ingisa Nungungulu kutani Ingisa Nungungulu Kasi U Hanya Kala Kupinzuka. A xinwe xa zitiro-tshinya zo kongomisa hi zona xigonzani hlengeletanweni ya hina i broxura Hi Vamani Va Mahako Kuranza Ka Jehova Inyamutlha? A tividiyu ti vunako kumaheni ka vapizani, to kota Hikuyini u faneleko ku gonza a Biblia? Zini zi mahiwako lomu ka Salawu ya Mufumo?, ni Deus tem nome?, zonawu zitiro hi faneleko ku gonza ku zi tirisa khwatsi.
3. Ka tihweti ti tako, a Wutireli ga hina ga Mufumo gi ta hi vuna ku maha yini?
3 Ka tihweti ta ha tako, a Wutireli ga hina ga Mufumo gi ta hi vuna ku kuma wutlhari ga ku tirisa mabhuku yo kari ma nga kaxeni ga hina ga zitiro za kugonzisa. A xikhati hi ti karatelako ku tirisa khwatsi a zitiro lezi, hi ta ngha hi lanzela a wusungukati legi gi pimisilweko: “Ti wonele wutsumbu ga wena, ni kugonziseni ka wena; nonohisa ka zona, hakuva hi ku maha lezo u ta hanyisa wutsumbu ga wena, ni lava va ku zwako kambe.” — 1 Tim. 4:16.