Tirisa khwatsi a zipanze za bhuku Biblia gi gonzisako

Laha a xigonzani xi tivako lezi a Biblia gi gonzisako hakunene xi tlhela xi hanya hi zona, xi ta kula xi tlhela xi pswala mihanzu ya moya. (Tis. 1:1-3) Hi nga xi vuna ku kula hi ku tirisa khwatsi a zipanze zo kari zi vunako za bhuku a Biblia gi gonzisako.

Ziwutiso zi nga kusanguleni: Kusanguleni ka xipimo xinwe ni xinwani ku na ni ziwutiso zi hlamuliwako nzeni ka xigonzo. U nga maha ziwutiso lezo na u nga lavi hlamulo kasi a xigonzani xi dokolokela lezi mu lavako ku gonza. Kutani u nga mu kombela ku wula zokari ka xiwutiso xinwe ni xinwani. Loku a nga wuli zona, a ku na xilaveko xa ku tekela ku mu nyika hlamulo wa lisine. A hlamulo wakwe wu ta ku vuna ku wona laha ku lavako lezaku u chela kota ni ku khanyisa. — Mav. 16:23; 18:13.

Xiengetelo: Loku a xigonzani xi zwisisa xi tlhela xi vumela a timhaka leti ti nga laha ka xipimo, u nga xi kuca ntsena lezaku xi gonza a xiengetelo xa kona xoce. Ka xigonzo xi lanzelako, mu nga bhulanyana hi zona kasi u tiyiseka lezaku xi zi zwisisile. Kanilezi, loku u wona lezaku xi nga vuneka, u fanele ku ti nyika xikhati xa ku bhulisana hi timhaka ti nga ka xiengetelo kutani xipanzana xa xona hi ku gonza tinzimana ni ku maha ziwutiso u longiseleko hi mahlweni.

Kwadru ga kuvuxeta: A kwadru ga kuvuxeta gi nga magumo ka xipimo xinwe ni xinwani gi na ni mihlamulo ya ziwutiso zi nga kusanguleni ka xipimo. U nga tirisa kwadru lego kasi ku tiyiseka lezaku a xigonzani xa wena xa zwisisa xi tlhela xi zi kota ku tlhamusela a timhaka-tshinya ta xipimo lexo ke? Gonzani zinwe hi gezu go zwala a hlamulo wunwe ni wunwani zinwe ni mitsalo leyi yi nga kona. Hi kulanzela, kombela xigonzani xa wena lezaku xi tirisa a mitsalo leyo kasi ku tlhamusela a ku hikuyini a magezu lawo ma nga ya lisine. — Miti. 17:2, 3.