Zvini lezvi a bhuku ga Kuvhululelwa gi wulako xungetano hi cikhati ci tako?

1. Ciboho muni ca lisima leci a vanhu vontlhe va faneleko ku maha?

A VANHU nyamutlha va fanele ku maha a ciboho ca lisima ca ku va ta seketela Jehovha Nungungulu kota Hosi yo lulama wuakweni gontlhe kutani va ta seketela a nala wakwe wo biha, Sathani. A ku na ku ti phendla mhakeni leyi. Ni cihi ciboho leci a munhu a ci mahako ci ta komba lezvaku i ta hanya kala kupindzuka kutani ahihi. (Mat. 25:31-33, 46) “Kuxanisekeni ka hombe”, a vanhu vontlhe va ta ngha va fungilwe ku va ta pona kutani va ta hihiritwa. — Kuv. 7:14; 14:9-11; Ezek. 9:4, 6. 

2. a) Mahebheru 10:35-39 i hi kuca ku maha yini? b) A bhuku ga Kuvhululelwa gi hi vhunisa kuyini?

² Lera Mahebheru 10:35-39. Loku u mahile a ciboho ca ku seketela a wuhosi ga Jehovha, u mahile ciboho ca cinene. Zvezvi wa zvi dokolokela nguvhu a ku vhuna van’wani lezvaku vonawu va maha ciboho ca cinene. Kasi lezvo zvi koteka, u nga tirisa lezvi zvi tsalilweko ka bhuku ga Kuvhululelwa kasi ku va vhuna. A bhuku lego go hlamalisa gi komba lezvi zvi to humelela lava va vhukelako Jehovha, kanilezvi gi tlhela gi wulawula hi makatekwa ma to kumiwa hi lava va seketelako a wuhosi Gakwe hi kutsumbeka. Hi fanele ku gondza a timhaka leto ta lisima. A ku maha lezvo zvi ta tiyisa a kutiyimisela ka hina ka ku lava ku simama hi tirela Jehovha. A cin’wani kambe, hi nga tirisa lezvi hi zvi gondzako kasi ku vhuna van’wani lezvaku vonawu va maha ciboho ca cinene va tlhela va khomelela ka cona.

3. Hi ta bhula hi yini ka ndzima leyi?

³ Ka ndzima leyi hi ta bhula hi zviwutiso lezvi: Zvini zvi to humelela lava va seketelako a wuhosi ga Nungungulu? Niku zvini zvi to humelela lava va hlawulako ku seketela a civandza co pswhuka leci ci tlhamuselwako ka bhuku ga Kuvhululelwa?

ZVINI ZVI TO HUMELELA LAVA VA TSUMBEKAKO KA JEHOVHA?

4. I ntlawa muni lowu mupostoli Johani a nga wu wona na Jesu le tilweni?

⁴ Ka muwoniso, mupostoli Johani i wonile mitlawa yimbiri yi seketelako a wuhosi ga Jehovha ni ku kuma makatekwa ya wutomi ga pindzukela. A ntlawa wo sangula wu wumbiwa hi 144 000 wa vanhu. (Kuv. 7:4) Va tekiwa laha misaveni kasi va ya wumba Mufumo na Jesu le tilweni. Va ta fumela misava zvin’we naye. (Kuv. 5:9, 10; 14:3, 4) Lomu ka muwoniso, Johani i va wonile na va yimile na Jesu Citsungeni ca Ziyoni ca le tilweni. — Kuv. 14:1.

5. A vatotilweko lava va ha hanyako laha misaveni zvini zvi to va humelela zvezvanyana?

⁵ Kusukela masikwini ya vapostoli ku hlawuliwa vanhu votala kasi va maha cipandze ca lava va 144 000. (Luka 12:32; Rom. 8:17) Hambulezvo, Johani i byelilwe lezvaku ka lava va 144 000, vatsongwani va nga wa ta ngha va ha hanya laha misaveni masikwini yo gumesa. Lavo va ta amukela “cifugo co gumesa” ci to komba lezvaku Jehovha wa va tsakela, na ku kiyela kutsongwani kasi a kuxaniseka ka hombe ku sangula. (Kuv. 7:2, 3; 12:17) Ndzeni ka kuxaniseka ka hombe, va ta tekiwa va ya ti patsa ni lava van’wani va 144 000 va to ngha va file na va tsumbekile. Seyo va ta ya fuma zvin’we na Jesu Mufun’weni wa Nungungulu. — Mat. 24:31; Kuv. 5:9, 10.

6-7. a) I ntlawa muni lowu Johani a wu wonileko hi kulandzela niku zvini hi gondzako xungetano hi wona? b) Hikuyini a mitlawa leyi ya yimbiri yi faneleko ku chela kota hi lezvi zvi tsalilweko ka Kuvhululelwa cipimo 7?

⁶ Andzhako ka ku wona a ntlawa wa le tilweni, Johani i no wona a “citshungu ca hombe”. A ku hambana ni lava va 144 000, a ntlawa lowu a wu na ntsengo. (Kuv. 7:9, 10) Zvini hi gondzako xungetano hi wona? Johani i byelilwe lezvi: “Lava hi lava va humako kuxanisekeni ka hombe. Va hlazvile a tinguwo tabye ta kuleha, va ti basisa nkhateni wa Yivhana.” (Kuv. 7:14) Andzhako ka ku pona a kuxaniseka ka hombe, a “citshungu ca hombe” ci ta hanya laha misaveni ci tlhela ci ti buza hi makatekwa ya tanani mu ta wona. — Lis. 37:9-11, 27-29; Mav. 2:21, 22; Kuv. 7:16, 17.

⁷ Kani hi hlawulilwe ku ya hanya tilweni kutani hi ta simama laha misaveni, hi fanele ku ti wona na hi patseka ka lezvi zvi tsalilweko ka Kuvhululelwa cipimo 7. Leco ci tava cikhati co tsakisa nguvhu ka mitlawa yontlhe ya yimbiri ya malandza ya Nungungulu! Hi ta tsaka nguvhu loku hi hlawula ku seketela a wuhosi ga Jehovha. Zvini zvin’wani a bhuku ga Kuvhululelwa gi hi byelako hi kuxaniseka ka hombe?— Mat. 24:21.

ZVINI ZVI TO HUMELELA LAVA VA VHUKELAKO NUNGUNGULU?

8. Ku ta sangulisa kuyini a kuxaniseka ka hombe niku zvini a vanhu vo tala va to maha?

⁸ Kota zvi kumbukilweko ka ndzima yi hundzileko, zvezvanyana a mifumo ya politika ya tiko legi yi ta vhukela a Bhabhuloni wa Hombe, ku nga wukhongeli gontlhe ga mawunwa. (Kuv. 17:16, 17) Lezvo zvi tava kusangula ka kuxaniseka ka hombe. Kanilezvi a ku lezvo zvi ta maha ku a vanhu va kutala va sangula ku khozela Jehovha? Ahihi. A ku hambana ni lezvo, Kuvhululelwa cipimo 6 i komba lezvaku cikhatini leco co bindza, a vanhu lava va nga tireliko Jehovha va ta hlota wuponelo ka mifumo ya politika ni ka tihlengeletano ta mabhindzu ta tiko legi, leti ti fananisiwako ni zvitsunga. Kota lezvi a vanhu lavo va to kala va nga seketeli a mufumo wa Nungungulu, Jehovha i ta va wona kota lava va mu vhukelako. — Luka 11:23; Kuv. 6:15-17.

9. Zvini zvi to maha ku a malandza ya Jehovha ma hambana ni van’wani niku gi tava gihi a wuyelo ga kona?

⁹ Cikhatini leco co bindza ca kuxaniseka ka hombe, a malandza ya Jehovha hi wona woce ma to hambana ni van’wani laha misaveni. Va ta simama kuva vona voce va tirelako Jehovha Nungungulu ni ku ala ku seketela “civandza”. (Kuv. 13:14-17) Hi kota ya lezvi va to simama va tsumbekile ka Jehovha, zvi ta vhindlusa a zanga ya lava va vhukelako Jehovha. Kota wuyelo ga kona, a patsano wa matiko wu ta vhukela a vanhu vontlhe va Nungungulu laha misaveni. Lezvo, a Bhibhiliya gi zvi vitana ku kuvhukela ka Goge wa Magoge. — Ezek. 38:14-16.

10. Kota lezvi zvi tlhamuselwako ka Kuvhululelwa 19:19-21, zvini lezvi Jehovha a to maha hi kota ya kuvhukelwa ka vanhu vakwe?

¹⁰ Zvini lezvi Jehovha a to maha hi kota ya kuvhukelwa loko ka vanhu vakwe? Jehovha i hi byela lezvi: “A zanga ya mina yi ta vindluka”. (Ezek. 38:18, 21-23) Kuvhululelwa cipimo 19 i tlhamusela lezvi zvi to maheka hi kulandzela. Jehovha i ta rumela a n’wana wakwe kasi ku vhikela vanhu vakwe ni ku hlula valala vabye. Jesu i talwa a yimpi leyo na a hi ni “mabutho ya le tilweni”, ku nga tingilozi to tsumbeka zvin’we ni lava va 144 000. (Kuv. 17:14; 19:11-15) A yimpi leyo yi ta gumesisa kuyini? A vanhu vontlhe lava va vhukelako Jehovha ni tihlengeletano ta kona zvi ta lovisiwa zvi ku bhi! — Lera Kuvhululelwa 19:19-21.

ANDZHAKO KA YIMPI, MUCHADHO

11. Cimaho muni ca lisima ci nga mhaka-tshinya ya bhuku ga Kuvhululelwa?

¹¹ Hi nga alakanyela lezvi lava vo tsumbeka laha misaveni va to tsakisa zvona hi kuva va ponile a kulovisiwa ka valala va Nungungulu! Leco ci tava cikhati ca ku tsakisa nguvhu! Hambu lezvi le tilweni ku tova ni litsako la hombe a cikhati leci Bhabhuloni wa Hombe a to lovisiwa, ku nga tava cona coce a cigelo ca kutsaka. (Kuv. 19:1-3) A cin’wani cigelo, ku tava “muchadho wa Yivhana”, ku nga yona a mhaka-tshinya ya bhuku ga Kuvhululelwa. — Kuv. 19:6-9.

12. Kota lezvi zvi kombiwako ka Kuvhululelwa 21:1, 2, wu ta maheka rini a muchadho wa Yivhana?

¹² Wu ta maheka rini a muchadho lowo? Na ku kiyela kutsongwani kasi a yimpi ya Armagedhoni yi sangula, vontlhe lava va 144 000 va ta ngha va hi le tilweni. Hambulezvo, leco ci nga tava cikhati ca muchadho wa Yivhana. (Lera Kuvhululelwa 21:1, 2.) A muchadho wa Yivhana wu ta maheka andzhako ka yimpi ya Armagedhoni, a valala vontlhe va Nungungulu na va nga ha hi kona. — Lis. 45:3, 4, 13-17.

13. A muchadho wa Yivhana wu wula yini ka lava va patsekako ka wona?

¹³ A muchadho wa Yivhana wu wula yini ka lava va patsekako ka wona? A kufana ni lezvi a muchadho wu tlhanganisako a wanuna ni wasati, a muchadho lowo wo fananisa wu tlhanganisa a Hosi, Jesu Kristu, ni “noivha” yakwe ku nga lava va 144 000. A cimaho leco ca lisima ci ta yimisa a mufumo wuswa lowu wu to fumela misava hi 1000 wa malembe. — Kuv. 20:6.

DHOROPA GO SASEKA NI WUMANDZIKO GA WENA

14-15. Kuvhululelwa cipimo 21 i va fananisa ni yini lava va 144 000? (Wona mufota wa kapa.)

¹⁴ Hi ku landzela, Kuvhululelwa cipimo 21 i fananisa lava va 144 000 ni dhoropa go saseka nguvhu gi vitaniwako ku i “Jerusalema giswa”. (Kuv. 21:2, 9) A dhoropa lego gi wa hi ni 12 wa maribye ya ciseketelo lawa ma tsalilweko a “12 wa mavito ya 12 wa vapostoli va Yivhana”. Hikuyini lezvo zvi mu tsakisileko nguvhu Johani? Hi ku i wonile a vito gakwe na gi tsalilwe ka gin’we ga maribye lawo. Hi nga wona a thomo lego! — Kuv. 21:10-14; Efe. 2:20.

¹⁵ A dhoropa lego go fananisa a kuna gin’wani go fana nago. Gi na ni ruwa ga hombe ga ouro yi hlutilweko khwatsi ni 12 wa tinyangwa ta maperola. A muro ni zviseketelo zva kona zvi sasekiselwe hi maribye ya lisima niku a tipimo ta kona ti pimilwe khwatsi. (Kuv. 21:15-21) Kanilezvi Johani i zvi wonisile ku khwatsi ku kiyela nchumu. Wona lezvi a zvi wulileko hi ku landzela, i te: “A ndzi wonangi tempeli ndzeni ka gona, hakuva Jehovha Nungungulu wa Ntamu Wontlhe hi yena tempeli ya gona, ni Yivhana yonawu. A dhoropa legi gi wa nga lavi gambo ne hweti kasi ku gi woningela, hakuva gi wa woningelwa hi kungangamela ka Nungungulu, ni kandiya ya gona ku wa hi Yivhana.” (Kuv. 21:22, 23) Lava va wumbako a Jerusalema giswa va ta tshama na Jehovha. (Mah. 7:27; Kuv. 22:3, 4) Hikwalaho, Jehovha na Jesu hi vona a tempeli ya dhoropa legi.

16. Zvini zvi to humelela lava vo ingisa ndzeni ka 1000 wa malembe ya kufuma ka Mufumo wa Nungungulu?

¹⁶ A vatotilweko zva va tsakisa nguvhu a ku ehleketa hi dhoropa legi. Kanilezvi hambu lava va nga ni kutsumba ka ku hanya laha misaveni va fanele ku chela kota hi gona. Ndzeni ka 1000 wa malembe ya kufuma ka Mufumo wa Nungungulu, a Jerusalema giswa gi ta tisa makatekwa yo tala nguvhu laha misaveni. Johani i wonile a makatekwa lawo na ma khulunga ku khwatsi i “congo wa mati ya wutomi”. Lomu matlhelweni ya congo ku wa hi ni “tisinya ta wutomi” ti nga humesa matluka ma nga “tirela ku hanyisa a matiko”. (Kuv. 22:1, 2) A vanhu vontlhe va to ngha va hanya ka cikhati leco va ta ti buza hi makatekwa lawo. Hi kutsongwani-kutsongwani, a vanhu vontlhe vo ingisa va tava vo mbhelela. Ku nga ta hava ni mababyi, kuxaniseka ne hambu kurila hi kuzwa kubayisa. — Kuv. 21:3-5.

17. Hi kuya hi Kuvhululelwa 20:11-13, hi vamani va to kuma makatekwa ndzeni ka 1000 wa malembe ya Mufumo wa Nungungulu?

¹⁷ Hi vamani va to kuma makatekwa lawo yo tsakisa? A vo sangula va to kuma makatekwa lawo citshungu ca hombe, leci ci to pona a yimpi ya Armagedhoni ni lava kuzvilava va to pswaliwa misaveni yiswa. Kanilezvi Kuvhululelwa cipimo 20 i tlhela a tsumbisa lezvaku lava va fileko va ta vhuxiwa. (Lera Kuvhululelwa 20:11-13.) A ‘valulamileko’ vo tsumbeka lava va fileko cikhatini ci hundzileko zvin’we ni ‘vangalulamangiko’, lava va fileko na va nga vangi ni lungelo ga ku gondza xungetano hi Jehovha, va ta vhuxiwa kwalaha misaveni. (Miti. 24:15; Joh. 5:28, 29) A ku lezvo zvi wula ku vontlhe va ta vhuxiwa va hanya laha misaveni cikhatini ca kufuma ka Mufumo wa Nungungulu wa 1000 wa malembe? Ahihi. Lava vo biha, va nga ala a lungelo ga ku tirela Jehovha na va nga sefa va nga ta vhuxiwa. Va vile ni lungelo niku va kombile lezvaku a va ringanelwi hi ku kuma wutomi Paradhiseni laha misaveni. — Mat. 25:46; 2 Tes. 1:9; Kuv. 17:8; 20:15.

KURINGWA KO GUMESA

18. A ciyimo ci ta tshamisa kuyini laha misaveni kumbheleni ka 1000 wa malembe?

¹⁸ Kumbheleni ka 1000 wa malembe, vontlhe lava va to ngha na va hanya laha misaveni va tava vanhu vo mbhelela. A nga kona a to ngha na a ha xanisiwa hi ciwonho leci hi nga ci kuma ka Adhamu. (Rom. 5:12) A ciruko ca ciwonho ca Adhamu ci ta ngha ci fuvisilwe. Hi ndlela leyo, vontlhe laha misaveni va ta “vhuka” kota vanhu vo mbhelela kumbheleni ka 1000 wa malembe. — Kuv. 20:5.

19. Hikuyini ku lavekako a kuringwa ko gumesa?

¹⁹ Ha zvi tiva lezvaku Jesu i simamile a tsumbekile ka Nungungulu hambu a cikhati leci Sathani a nga mu ringa. Kanilezvi, a ku vontlhe vanhu vo mbhelela va ta simama va tsumbekile a cikhati leci Sathani a to nyikiwa a lungelo ga ku va ringa? Munhu ni munhu i ta hlamula ciwutiso leci a cikhati leci Sathani a to humesiwa hi nkeleni wo eta wo kala magumo kumbheleni ka 1000 wa malembe. (Kuv. 20:7) Lava va to kombisa kutsumbeka ka Nungungulu kuringweni loko ko gumesa va ta kuma wutomi ga pindzukelwa niku hi magumo va ta kuma kutlhatlheka ka lisine. (Rom. 8:21) Lava va vhukelako Jehovha va ta lovisiwa kala kupindzuka, zvin’we na Sathani ni madhimoni yakwe.— Kuv. 20:8-10.

20. U ti zwisa kuyini hi zviphrofeto zvo hlamalisa zvi nga ka bhuku ga Kuvhululelwa?

²⁰ U ti zwisa kuyini andzhako ka ku wona zvitsongwani ka lezvi zvi kumbukiwako ka bhuku ga Kuvhululelwa? A zvi ku tsakisi a ku ti wona na u patseka ka zviphrofeto lezvi zvo hlamalisa? A zvi ku mahi ku u zvi lava nguvhu a ku ramba van’wani lezvaku vonawu va ta patseka ka wukhozeli go basa ga Nungungulu? (Kuv. 22:17) Lezvi makunu hi bhulileko hi zvilo zvi to maheka cikhatini ci tako, hi tsakile nguvhu niku zvi hi kuca ku wula magezu yo fana ni lawa ma nga wuliwa hi mupostoli Johani, yaku: “Amen! Tana Hosi Jesu.” — Kuv. 22:20.