Pimanyisa a ndlela leyi Jehovha na Jesu va pimisako hi yona

1-2. Zvini zvi patsekako ka ku randza Jehovha niku Jesu i zvi kombisile kuyini lezvo?

“RANDZA Jehovha, a Nungungulu wa wena, hi mbilu ya wena yontlhe, ni muhefemulo wa wena wontlhe, ni ntamu wa wena wontlhe, ni kupima ka wena kontlhe”. (Luka 10:27) Jesu i zvi vekile laha kubaseni lezvaku a nayo lowu wu wa hi wona nayo wa lisima nguvhu ka Nayo wa Mosi. Wona lezvaku a ku randza Jehovha zvi patsa a mbilu ya hina, ku nga lezvi hi zvi xuvako ni lezvi hi ti zwisako zvona. Lezvo zvi patsa kambe a ku mu khozela hi muhefemulo wontlhe ni ntamu wa hina. Hambulezvo, a ku randza Jehovha zvi patsa kambe ni kupima ka hina, ku nga ndlela leyi hi ehleketako hi yona. Kunene, a hi nge zvi koti ku zwisisa hi kumbhelela a maalakanyo ya Jehovha. Kanilezvi hi nga zwisisa a maalakanyo ya Jehovha hi ku gondza a “kupima ka Kristu” hakuva Jesu i pimanyisile hi kumbhelela a kupima ka Papayi wakwe. — 1 Kor. 2:16.

² Jesu i wa randza Jehovha hi kupima ka yena kontlhe. I wa zvi tiva lezvi Nungungulu a nga lava lezvaku a maha niku i wa ti yimisele ku hanya hi kuyelana ni lezvo, hambu loku zvi lava ku a xaniseka hi ku maha zvazvinene. Lezvi Jesu a nga veka kupima ka ku maha kurandza ka Papayi wakwe, a nga tshukangi a tsika nchumu wu mu colopetela a ku maha lezvo.

3. Zvini lezvi mupostoli Pedro a gondzileko ka Jesu, niku zvini lezvi a nga kuca maKristu lezvaku ma maha? (1 Pedro 4:1)

³ Pedro ni vapostoli lava van’wani vave ni thomo ga ku tshama na Jesu va wona ndlela leyi a nga pimisa hi yona. A cikhati leci Pedro a nga tsala a papilo gakwe go sangula, i kucile a maKristu lezvaku ma ti hlomisa hi kupima ko fana ni loku ka Kristu. (Lera 1 Pedro 4:1.) Pedro i tirisile a gezu gi tirisiwako wusochweni a cikhati leci a nga tsala ku: “Ti hlomiseni”. Hikwalaho, loku a maKristu ma pimanyisa a kupima ka Kristu, kutani ndlela leyi a pimisako hi yona, ma ta ngha ma hlomile a tlhari ga ntamu nguvhu gi to ma vhuna a kulwa ni kwihi kunavela ka ku maha zvobiha ma tlhela ma zvi kota kulwa ni tiko legi gi fumiwako hi Sathani. — 2 Kor. 10:3-5; Efe. 6:12.

4. A ndzima leyi yi ta hi vhunisa kuyini a ku landzela a wusungukati ga Pedro?

⁴ Ka ndzima leyi, hi ta kambisisa a ndlela leyi Jesu a nga pimisa hi yona ni lezvi hi nga mu pimanyisisako zvona. Hi ta gondza ka cikombiso cakwe 1) lezvi hi nga ma pimanyisisako zvona a mapimisela ya Jehovha, lezvi zvi to vhuna hontlheni lezvaku hiva ni kupima kun’we, 2) kuva vanhu vo ti koramisa ni 3) kuva ni kupima ku nene hi ku tsumba Jehovha hi mukhongelo.

PIMANYISA A MAPIMISELA YA JEHOVHA

5. Ka khati go kari, Pedro i tsandzekile ku pimanyisa a mapimisela ya Jehovha hi ndlela muni?

⁵ Hi nga ehleketa hi khati legi Pedro a nga kala ku pimanyisa a mapimisela ya Jehovha. Jesu i no byela a vapostoli vakwe lezvaku i wa fanele kuya Jerusalema a ya nyikelwa ka varangeli va wukhongeli, a xanisiwa hi ndlela ya xapi a gumesa a dawa. (Mat. 16:21) Kuzvilava Pedro zvi mu karatele a ku vhumela lezvaku Jehovha i wa ta tsika Jesu a dawa, loyi a nga hi kutsumba ka Izrayeli tlhelo Mesiya loyi a nga tsumbisilwe. (Mat. 16:16) Hikwalaho, Pedro i no koka Jesu hi tlhelo, aku: “Hosi, u nga alakanyi lezvo. A zvilo lezvo zvi nga ta tshuka zvi maheka ka wena.” (Mat. 16:22) Hi kota ya lezvi a nga kala ku pimanyisa a mapimisela ya Jehovha mhakeni leyi, a nga vangi ni kupima kun’we na Jesu.

6. Jesu i kombisile kuyini lezvaku i wa hi ni kupima kun’we na Jehovha?

⁶ A kupima ka Jesu ku wa zwanana hi kumbhelela ni kupima ka Papayi wakwe wa le tilweni. Jesu i no byela Pedro, aku: “Suka ka mina, Sathani! U cikhunguvanyiso ka mina, hakuva a maalakanyo ya wena a hi ya Nungungulu kanilezvi ya vanhu.” (Mat. 16:23) Pedro i wa mu xuvela zvazvinene Jesu, kanilezvi Jesu a nga vhumelangi a wusungukati gakwe. A kurandza ka Jehovha ku wa nga hi ku vhikela Jesu lezvaku a nga xaniseki. Makunu ka khati lego, Pedro i gondzile a mhaka ya lisima ya lezvaku i fanele kuva ni kupima kun’we na Nungungulu. Leyo i mhaka ya lisima leyi hinawu hi yi gondzako.

7. Hi ndzhako ka cikhati, Pedro i kombisile kuyini lezvaku i wa cicile a kupima kakwe ku zwanana ni loku ka Jehovha? (Wona mufota wa kapa.)

⁷ Hi ndzhako ka cikhati, Pedro i no komba lezvaku i wa lava kuva ni kupima ko fana ni loku ka Jehovha. Ci wa chikele a cikhati ca ku a vamatiko vo kala ku mahiwa wukwera va maha cipandze ca vanhu va Nungungulu. Pedro i no nyikiwa ciavelo ca ku chumayela Korneliyu, a nga hi wa matiko, loyi a vileko wo sangula kuva muKristu. A vaJudha va wa ti tsawukanisa nguvhu ni vamatiko; hikwalaho, a zvi hlamalisi lezvi zvi nga lava ku Pedro a vhuniwa ku cica kupima kakwe kasi a zvi kota ku chumayela vamatiko. Laha Pedro a nga zwisisa a kurandza ka Nungungulu mhakeni leyi, i no cica kupima kakwe. Makunu a cikhati leci a nga vitaniwa, i no famba ‘na a nga kanakani’. (Miti. 10:28, 29) I noya chumayela Korneliyu ni va ngango wakwe va bhabhatisiwa. — Miti. 10:21-23, 34, 35, 44-48.

8. Hi nga kombisa kuyini lezvaku a kupima ka hina ka zwanana ni loku ka Jehovha? (1 Pedro 3:8)

⁸ Andzhako ka malembe yo kari, Pedro i no kuca maKristu-kuloni lezvaku mava ni “kupima kun’we”. (Lera 1 Pedro 3:8.) Kota vanhu va Jehovha hi ngava ni kupima kun’we hi ku kombisa mapimisela ya Jehovha kota lezvi ma tlhamuselwako lomu ka Mhaka yakwe. Hi cikombiso, Jesu i kucile a valandzeli vakwe lezvaku va rangisa Mufumo wutomini gabye. (Mat. 6:33) Hi kota ya lezvo, a muhuweleli wo kari laha bandleni a nga boha ku nghena ka ntiro wo kari wa cikhati contlhe. Wutshan’wini ga ku mu godholisela, hi fanele ku wulawula zvazvinene hi lezvi a zvi hlawulileko hi tlhela hi mu seketela.

TI KORAMISE

9-10. Jesu i kombisile kutikoramisa ka hombe nguvhu hi ndlela muni?

⁹ Ka wusiku go gumesa Jesu na a nga se dawa, i gondzisile Pedro ni vapostoli lava van’wani a lisima la ku ti koramisa. Mahlweni ka lezvo, Jesu i wa rumile Pedro na Johani kasi va ya longisela zvakuga lezvi Jesu a nga wa taga navo hi khati go gumesa na a nga se dawa. Ka kulongisela loko, zvi wa lava ku va longisela ni basiya ni mathahula kasi a vapfhumba va hlambisiwa mikondzo na va nga sega. Kanilezvi loku a cikhati ci chikela, himani a nga wa ta maha a ntiro lowo wa lahasi?

¹⁰ Jesu a nga pimisangi kumbiri kasi a maha a ntiro lowo. I no komba lezvaku i wa ti koramisa nguvhu. A vapostoli va hlamalile nguvhu hi ku mu wona na a maha zvilo lezvi zvi nga tolovela ku mahiwa hi citiri. Jesu i no tlhatlha bhaji gakwe, a boha thahula lomu ciwunwini, a chela mati lomu ka basiya a gumesa a sangula ku va hlambisa mikondzo. (Joh. 13:4, 5) Kuzvilava zvi tekile cikhati kasi a mbheta ku va hlambisa mikondzo a vapostoli vontlhe va 12, a ku patsa na Judhasi loyi a nga lava ku mu tokometa. Hambulezvo, i no ti koramisa a tira kala a mbheta. Andzhako ka lezvo i no va tlhamusela hi lihlazva-mbilu, aku: “Ma zvi tiva ku zvi wula yini lezvi ndzi mu maheleko ke? N’wina mu ndzi vitana ku ‘Mugondzisi’ ni ku ‘Hosi’; mu wula zvona hakuva zvi tano. Hikwalaho, loku mina, ndzi nga Hosi ni Mugondzisi, ndzi mu hlambisile mikondzo, n’winawu hlambisanani mikondzo.” — Joh. 13:12-14.

11. Pedro i kombisile kuyini lezvaku i wa gondzile ku ti koramisa? (1 Pedro 5:5) (Wona ni mufota.)

¹¹ Pedro i gondzile ka kutikoramisa ka Jesu. Andzhako ka loku Jesu a tlhelile tilweni, Pedro i mahile cihlamaliso a hanyisa wanuna a nga pswalilwe na a hi cilima. (Miti. 1:8, 9; 3:2, 6-8) A cihlamaliso leco ci no koka a vanhu vo tala. (Miti. 3:11) Xana lezvo zvi mahile ku Pedro ava ni malundzanyana, nguvhunguvhu lezvi kaku ka mudhawuko wakwe a nduma ni zvikhundla zvi wa nyikiwa nguvhu lisima? Ahihi, Pedro i no ala a wudzundzo lego a gi yisa ka loyi gi mu ringanako, ku nga Jehovha na Jesu, aku: “Kuve hi vito [ga Jesu], ni kukholwa ka hina vitweni gakwe, a wanuna loyi mu mu wonako ni ku mu tiva a nga tiya”. (Miti. 3:12-16) A magezu lawa Pedro a nga ma tirisa ka papilo legi a nga tsalela a maKristu xungetano hi cilaveko ca ku hlakulela a kutikoramisa ma nga hi alakanyisa a khati legi Jesu a nga boha thahula ciwunwini cakwe a hlambisa mikondzo ya vapostoli. — Lera 1 Pedro 5:5 ni nota.

12. A ku fana na Pedro, hi nga simamisa kuyini a ku hlakulela kutikoramisa?

¹² Hi nga pimanyisa cikombiso ca Pedro mhakeni ya ku hlakulela kutikoramisa. Alakanya lezvaku a kutikoramisa a ku gumelwi laha ka ku wula magezu ma kombako lezvaku ha ti koramisa. A gezu legi Pedro a gi tirisileko laha ka kutikoramisa gi patsa lezvi hi zvi pimisako hi hina venyi ni van’wani. Hi tirela van’wani hakuva hi randza Jehovha niku hi randza van’wani na ku nga hi ku lava wudzundzo. Loku hi tirela Jehovha ni vamakabye va hina hi laha hi zvi kotako hi kona na hi tsakile, kani a van’wani va zvi wona kutani ahihi, hi komba lezvaku ha ti koramisa. — Mat. 6:1-4.

“NGHA MUVA NI KUPIMA KU NENE”

13. Tlhamusela lezvi zvi patsekako laha ka kuva ni “kupima ku nene”.

¹³ A kuva ni “kupima ku nene” zvi patsa yini? (1 Ped. 4:7) A muKristu loyi a nga ni kupima ku nene i maha zvontlhe a zvi kotako kasi a maha zviboho zva zvinene zvi kombako ku i na ni kupima ka Nungungulu. A muKristu loye wa zvi zwisisa lezvaku a ku na nchumu wu nga wa lisima nguvhu wutomini a ku hundza wunghana gakwe na Jehovha. A nga ti woni na a hi wa lisima nguvhu kutani na a nga vhuni nchumu niku wa zvi zwisisa lezvaku a nga tivi zvontlhe. Ahandle ka lezvo, i komba ku wa mu tsumba Nungungulu hi ku ti koramisa a tshinela kakwe hi kuphindaphinda hi mukhongelo.a

14. Ka khati go kari, Pedro a nga tsumbangi Jehovha hi ndlela muni?

¹⁴ Ka wusiku go gumesa Jesu na a nga se dawa, i tlharihisile a vapizani vakwe, aku: “N’wina n’wentlhe mu ta khunguvanyeka ha mina a wusiku legi”. Pedro a hlamula hi kutiya, aku: “Hambu loku vontlhe lava van’wani vo khunguvanyeka ha wena, mina ndzi nga ta khunguvanyeka!” Ka wusiku galego, Jesu i no tlharihisa vapizani vo kari, aku: “Tshamani na mu rindzele, mu simama ku khongela”. (Mat. 26:31, 33, 41) Loku Pedro i wa no ingisa a wusungukati lego, na a vile ni kutiya-hlanha kasi a vhumela lezvaku i wa hi mupizani wa Jesu. Kanilezvi Pedro i no ala a Hosi yakwe, lezvi a nga gumesa a ti laya nguvhu hi zvona. — Mat. 26:69-75.

15. Jesu i simamisile kuyini ava ni kupima ku nene ka wusiku gakwe go gumesa?

¹⁵ Jesu i wa mu tsumba nguvhu Jehovha. Hambu lezvi a nga hi munhu wo mbhelela i wa khongela hi kuphindaphinda. Lezvo zvi mu nyikile a kutiya-hlanha ka ku a maha zvilo hi kuyelana ni kurandza ka Jehovha. (Mat. 26:39, 42, 44; Joh. 18:4, 5) A ku wona Jesu na a randza ku khongela zvi mu khumbile nguvhu Pedro laha ka ku a nga tshukangi a zvi rivala.

16. Pedro i zvi kombisile kuyini lezvaku i wa hi ni kupima ku nene? (1 Pedro 4:7)

¹⁶ Hi kufamba ka cikhati, Pedro i no gondza ku mu tsumba nguvhu Jehovha hi mukhongelo. A cikhati leci Jesu a nga vhuxiwa hi ka vafileko, i no tiyisekisa Pedro ni vapostoli lava van’wani lezvaku va wa ta nyikiwa moya wo basa kasi va zvi kota ku chumayela. Hambulezvo, Jesu i no va byela lezvaku va tshama Jerusalema kala va amukela a moya wo basa. (Luka 24:49; Miti. 1:4, 5) Zvini lezvi Pedro a nga maha na a ha rindzela? Pedro ni maKristu lawa man’wani “va no simama ku khongela”. (Miti. 1:13, 14) Hi ndzhako ka cikhati, ka papilo gakwe go sangula, Pedro i kucile a maKristu lezvaku mava ni kupima ku nene ma tlhela ma tsumba Jehovha hi mukhongelo. (Lera 1 Pedro 4:7.) Pedro i no gondza ku tsumba Jehovha a tlhela ava ziki ga bandla. — Gal. 2:9.

17. Na ku nga khataliseki a wutlhari ga mabeleko legi hi nga nago, zvini hi faneleko ku simama hi maha? (Wona ni mufota.)

¹⁷ Kasi hiva ni kupima ku nene, hi fanele ku tshinela hi kuphindaphinda ka Jehovha hi mukhongelo. Ha zvi zwisisa lezvaku hi fanele ku simama hi khongela ka Jehovha na ku nga khataliseki a wutlhari ga mabeleko hi nga nago. Hikwalaho, loku hi lava ku maha a zviboho zva lisima nguvhu hi khongela ka Jehovha hi kombela wurangeli na hi tsumba lezvaku yena wa zvi tiva lezvi zvi nga zvinene nguvhu ka hina.

18. Hi nga zvi kotisa kuyini a ku ti zwananisa nguvhu ni kupima ka Jehovha?

¹⁸ Ha mu bonga nguvhu Jehovha hi lezvi a hi mahileko hi ndlela ya ku hi zvi kota ku kombisa a matshamela yakwe. (Gen. 1:26) Kunene, a hi nge zvi koti ku pimanyisa Jehovha hi kumbhelela. (Isa. 55:9) Kanilezvi, a ku fana na Pedro, hi ngaya hi ti zwananisa nguvhu ni kupima ka Jehovha. Hi nga maha lezvo hi ku simama hi pimanyisa maalakanyo ya Nungungulu, hi hlakulela kutikoramisa hi tlhela hiva ni kupima ku nene.