A vito ga Jehovha ga lisima ka Jesu hi ndlela muni?

1-2. a) Zvini lezvi Jesu a nga maha ka wusiku ga mahlweni ka ku a dawa? b) Zviwutiso muni hi to bhula hi zvona ka ndzima leyi?

KU WA hi ni gambo ga Wazina hi 14 ka Nisani wa 33 Nguveni ya hina, niku ku wa kiyela kutsongwani kasi Jesu a tokometiwa, a lamuliwa, a koniwa, a xanisiwa a tlhela a dawa. I wa ha hi ku mbheta ku maha a Cilalelo ca Hosi ni vapostoli vakwe vo tsumbeka ka sala ya le hehla. Andzhako ka loku va gile, Jesu i no byela a vapostoli vakwe a magezu yo gumesa yo tiyisa. Niku na va nga se huma lomu saleni ya le hlehla, Jesu i no maha mukhongelo wa lisima nguvhu. Mupostoli Johani i tsalile mukhongelo lowo wu kumekako ka Johani cipimo 17.

² A mukhongelo lowo wa Jesu wu kombisa kuyini lezvi zvi nga mu karata ka cikhati leco? Zvini lezvi zvi nga hi zva lisima ka Jesu a cikhati leci a nga hi laha misaveni? Hi ta bhula hi zviwutiso lezvi ka ndzima leyi.

“NDZI VA TIVISILE A VITO GA WENA”

3. Zvini lezvi Jesu a nga wula xungetano hi vito ga Jehovha, niku zvi wula yini? (Johani 17:6, 26)

³ Ka mukhongelo wakwe, Jesu i te: “Ndzi va tivisile a vito ga wena”. Hi lisine, Jesu i phindile kumbiri lezvaku i wa tivekisile a vito ga Jehovha ka vapizani vakwe. (Lera Johani 17:6, 26.) Zvi wula yini lezvo? Xana zvi wula ku Jesu i wa byelile a vapizani vakwe lezvaku a vito ga Nungungulu hi Jehovha? A vapizani va Jesu va wa hi vaJudha; hikwalaho, va wa sina va gi tiva a vito ga Nungungulu ga ku Jehovha. A vito lego gi kumeka makhati yo tala lomu ka Mitsalo ya ciHebheru. Hikwalaho, Jesu i wa nga wuli a ku va tivisa a vito ga Nungungulu ga ku Jehovha; kanilezvi i wa wula a ku va tivisa lezvi Jehovha a nga tshamisa zvona. Jesu i vhunile vapizani vakwe lezvaku va mu tiva khwatsi Jehovha, a ku patsa ni makungo yakwe, ni mitiro yakwe, ni matshamela yakwe, hi ndlela yaku a ku na mun’wani a nga wa ta zvi kota ku mu tivekisisa lezvo.

4-5. a) Zvi nga mahisa kuyini ku a vito ga munhu giva ga lisima nguvhu ka wena? Nyika cikombiso. b) A vito Jehovha gi vile ga lisima nguvhu ka vapizani va Jesu hi ndlela muni?

⁴ Kasi ku fananisa, a hi zvi veke laha ka ku ku na ni dhota ga ku hi Dhavhidha laha bandleni ga wena ni ku i dhokodhela. U ngava u mu tiva a makabye loye hi malembe yo tala. Kanilezvi ka siku go kari u babya hi citshuketi. U tsutsuma uya ka cipitali leci a makabye loye a tirako kona aya ku nyika mimuri yi ponisako wutomi ga wena. Xana a vito ga makabye loye zvezvi gi nga tava ga lisima nguvhu ka wena? A zvi kanakanisi lezvo! Ka wena, Dhavhidha a nga ha hi dhota legi u gi tivako basi; kanilezvi i dhokodhela kambe loyi a ponisileko wutomi ga wena.

⁵ Hi ndlela yo fana, a vapizani va Jesu va wa sina va gi tiva a vito ga Jehovha. Kanilezvi a vito lego gi vile ga lisima nguvhu kabye hi kota ya ntiro wa Jesu. Hikuyini hi wulako lezvo? Hi ku Jesu i pimanyisile Papayi wakwe ka zvontlhe a nga wula ni ku maha. Hikwalaho, a vapostoli va mu ‘tivile’ khwatsi Jehovha hi ku ingisela ndlela leyi Jesu a nga gondzisa hi yona ni ku cuwukisela lezvi a nga va khomisa zvona vanhu. — Joh. 14:9; 17:3.

A “VITO GA WENA LEGI U NDZI NYIKILEKO”

6. Jehovha i mu nyikile a vito gakwe Jesu hi ndlela muni? (Johani 17:11, 12)

⁶ Ka mukhongelo wakwe Jesu i khongelele vapizani vakwe, aku: “Va hlayise hi kota ya vito ga wena legi u ndzi nyikileko”. (Lera Johani 17:11, 12.) Xana lezvo zvi wula ku Jesu makunu i wa ta vitaniwa ku hi Jehovha? Ahihi. Wona lezvaku ka mukhongelo wakwe Jesu i wulawulile hi vito ga Jehovha, aku: “Vito ga wena”. Hikwalaho, a vito ga Jehovha a gi vangi vito ga Jesu. Makunu i wa wula yini Jesu a cikhati a ngaku i wa nyikilwe a vito ga Nungungulu? I wa wula lezvi: I wa hi muyimeli wa Jehovha ni muwulawuli wakwe. I wa tile hi vito ga Papayi wakwe niku i mahile zvihlamaliso zva ntamu hi vito lego. (Joh. 5:43; 10:25) A cin’wani kambe, a tlhamuselo wa vito ga Jesu wu wula ku: “Jehovha Kuhanyisa”. Kunene, a vito ga Nungungulu gi na ni kuyelana ni vito ga Jesu.

7. Tlhamusela lezvi Jesu a nga wa ta wulawulisa zvona hi vito ga Jehovha.

⁷ Kasi ku fananisa, kota lezvi a embaxadhori a yimelako hosi yo kari i wulawula hi vito ga hosi leyo. Hikwalaho, a magezu ya embaxadhori ma na ni ntamu a ku fana ni lawa ya hosi. Hi kufanana, Jesu i wa yimela Jehovha niku i wa wulawula ni vanhu hi vito Gakwe. — Mat. 21:9; Luka 13:35.

8. Hikuyini Jehovha a nga ku a vito gakwe gi “ka” Jesu hambu ka cikhati leci a nga kala a nga seta laha misaveni? (Eksodhusi 23:20, 21)

⁸ Ka ntiro wakwe kota Gezu, Jesu i wa hi Muwulawuli wa Jehovha hi lezvi a nga bika mahungu ni zvileletelo ka vana van’wani va Nungungulu va moya ni ka vanhu. (Joh. 1:1-3) Zvi wonekisa ku khwatsi Jesu hi yena a ngilozi leyi Jehovha a nga yi rumele kasi ku khatalela vaIzrayeli a cikhati va nga huma hi Gibhite. A cikhati leci a nga byela vaIzrayeli lezvaku va ingisa a ngilozi leyo, Jehovha i te: “Kota lezvi a vito ga mina gi nga ka yona”.a (Lera Eksodhusi 23:20, 21.) A vito ga Jehovha gi wa hi “ka” Jesu, zvi wulako ku i yimela Jehovha niku hi yena wa hombe a seketelako ni ku basisa a vito ga Papayi wakwe.

“PAPAYI, DHUMISA VITO GA WENA”

9. A vito ga Jehovha gi wa hi ga lisima ka Jesu hi ndlela muni? Tlhamusela.

⁹ Kota lezvi ha hi ku zvi wona, hambu ka cikhati leci Jesu a nga kala a nga seta laha misaveni, a vito ga Jehovha gi wa hi ga lisima kakwe. A zvi kanakanisi lezvaku a vito ga Jehovha gi wa yelana ni zvontlhe a nga maha a cikhati a nga hi laha misaveni. Kugumeseni ka ntiro wakwe wa laha misaveni, Jesu i no kombela Jehovha, aku: “Papayi, dhumisa a vito ga wena”. A Papayi wakwe i no tekela ku hlamula hi gezu go dzindza, aku: “Ndzi gi dhumisile, ndzi ta tlhela ndzi gi dhumisa.” — Joh. 12:28.

10-11. a) Jesu i dhumisile a vito ga Jehovha hi ndlela muni? (Wona ni mufota.) b) Hikuyini a vito ga Jehovha gi faneleko ku basisiwa?

¹⁰ Jesu yenawu i dhumisile vito ga Papayi wakwe. Hi ndlela muni? A yin’we ya tindlela hi ku tivekisa matshamela ni mitiro yo hlamalisa ya Papayi wakwe ka van’wani. Hambulezvo, ku patseka zvotala laha ka ku dhumisa vito ga Jehovha. Jesu i wa fanele ku komba lezvaku zvontlhe lezvi Jehovha a mahako zvi lulamile niku a vito gakwe gi basile.b Jesu i kombile a lisima ya lezvo a cikhati leci a nga va gondzisa a mukhongelo wa cikombiso a valandzeli vakwe. I wulile lezvi: “Papayi wa hina wa le tilweni, a vito ga wena a gi basisiwe.” — Matewu 6:9.

¹¹ Hikuyini a vito ga Jehovha gi faneleko ku basisiwa? Hi ku le jardhim ya Edheni, Sathani Dhiyabho i chakisile a vito ga Jehovha Nungungulu a tlhela a wulawula mawunwa hi yena. Sathani i wulile lezvaku Jehovha i wa hi muhembi niku i wa va tsona zvilo zvo kari zva zvinene Adhamu na Evha. (Gen. 3:1-5) Hi ndlela leyo, Sathani i no zvi mahisa ku khwatsi a ndlela leyi Jehovha a nga maha hi yona zvilo yi wa nga hi yinene. Hi kota ya lezvi Sathani a nga wulawula mawunwa hi Jehovha, a vanhu kuzvilava va nga alakanya ku Jehovha a hi munhu wa munene. Hi ndzhako ka cikhati, masikwini ya Joba, Sathani i no wula lezvaku a vanhu va wa tirela Jehovha ntsena hi kota ya zvilo lezvi a nga va nyika. A nyamawunwa loye i wulile kambe lezvaku a ku na munhu a tirelako Jehovha hi ku mu randza futsi laha ka kuza a simama ku mu tirela loku a kumana ni zvikarato. (Joba 1:9-11; 2:4) Ku wa laveka cikhati kasi ku komba lezvaku himani a nga hi muhembi, Jehovha kutani Sathani.

“NDZA NYIKELA WUTOMI GA MINA”

12. Zvini lezvi Jesu a nga ti yimisele ku maha hi kota ya lirandzo lakwe hi vito ga Jehovha?

¹² Hi kota ya lirandzo lakwe hi Jehovha, Jesu i wa lava ku maha zvontlhe a nga zvi kota kasi ku basisa a vito ga Jehovha. Jesu i te: “Ndza nyikela wutomi ga mina”. (Joh. 10:17, 18) Kunene, i wa ti yimisele kufa hi kota ya vito ga Jehovha.c A vanhu vambiri vo sangula vo mbhelela, Adhamu na Evha, va fularele Jehovha va ingisa Sathani. A ku hambana navo, Jesu i wa ti yimisele a kuta misaveni ni ku komba lezvaku wa mu randza Jehovha. Jesu i kombile lezvo hi ku ingisa Jehovha ka zvontlhe a nga wula ni ku maha. (Mah. 4:15; 5:7-10) Jesu i simamile a tsumbekile wutomini gakwe kala afa laha mhandzeni ya hlomulo. (Mah. 12:2) Hi ndlela leyo, i kombile lezvaku hakunene wa mu randza Jehovha ni vito Gakwe.

13. Hikuyini Jesu a nga hi yena a nga ringanelwa khwatsi hi ku komba lezvaku Sathani muhembi? (Wona ni mufota.)

¹³ Wutomini gakwe gontlhe, Jesu i kombile kubaseni lezvaku Sathani muhembi, Jehovha i wulawula lisine. (Joh. 8:44) Jesu i wa mu tiva khwatsi Jehovha a ku hundza ni wihi munhu. Loku ku wa hi ni cokari ci nga hi lisine ka lezvi Sathani a nga lumbeta Jehovha, Jesu na a zvi tivile. Kanilezvi Jesu i simamile a tiyile ka ku yimela matshamela ya Jehovha kutani vito gakwe. Hambu a cikhati leci zvi nga wonekisa ku khwatsi Jehovha i mu tsikile, Jesu i wa ti yimisele a kufa wutshan’wini ga ku fularela Papayi wakwe wa lirandzo. — Mat. 27:46.d

“NDZI MBHETILE A NTIRO LOWU U NDZI NYIKILEKO KU MAHA”

14. Jehovha i ku chachazelisile kuyini a kutsumbeka ka Jesu?

¹⁴ Ka mukhongelo lowu a wu mahileko ka wusiku ga mahlweni ka kufa kakwe, Jesu i te: “Ndzi mbhetile a ntiro lowu u ndzi nyikileko ku maha”. I wa tsumba lezvaku Jehovha i ta mu chachazela hi kota ya kutsumbeka kakwe. (Joh. 17:4, 5) A kutsumba loko a ku mu wisangi tingana. Jehovha a nga vhumelangi a ku Jesu a simama cilahleni. (Miti. 2:23, 24) I no mu vhuxa hi ka vafileko a tlhela a mu nyika cikhundla co tlakuka. (Filp. 2:8, 9) Hi magumo, Jesu i no sangula kufuma kota Hosi ya Mufumo wa Nungungulu. Zvini lezvi a Mufumo lowo wu nga wa ta maha? A cipandze ca wumbiri ca mukhongelo wa cikombiso ci hi byela lezvi: “A wute Mufumo wa wena. A kurandza ka [Jehovha] . . . ku wa mahiwe, le tilweni ni laha misaveni konawu.” — Mat. 6:10.

15. Zvini zvin’wani lezvi Jesu a to maha?

¹⁵ Zvezvanyana, Jesu i talwa yimpi ni valala va Nungungulu a tlhela a lovisa a vakubiha ka Armagedhoni. (Kuv. 16:14, 16; 19:11-16) Andzhako ka lezvo, i ta hoxa Sathani “nkeleni wo eta wo kala magumo”, lomu a to kala a nga zvi koti a ku maha nchumu. (Kuv. 20:1-3) Ndzeni ka Kufuma kakwe ka 1000 wa malembe, Jesu i ta vhuxa kurula ni kumbhelela cikari ka vanhu vontlhe. I ta vhuxa vafileko. I ta cica misava yontlhe yiva paradhise, a kungo ga Jehovha gi tatiseka! — Kuv. 21:1-4.

16. A wutomi gi ta tshamisa kuyini andzhako ka Kufuma ka Jesu ka 1000 wa malembe?

¹⁶ A wutomi gi ta tshamisa kuyini andzhako ka Kufuma ka Jesu ka 1000 wa malembe? A ciwonho ni kungambheleli zvi ta ngha zvi fuvile. A vanhu zvi nga ta ha lava lezvaku va kombela ku tsetselelwa zviwonho hi ku tirisa hakhelo ya kutlhatlhisa; ne va nga ta ha lava mutlhanganyisi kutani mupristi. “A nala wo gumesa”, ku nga kufa, loku hi ku kumileko ka Adhamu ku ta ngha ku lovisilwe. A zvilahla zvi tava phanga. A vafileko va ta ngha va vhuxilwe. A vanhu vontlhe laha misaveni va tava vo mbhelela. — 1 Kor. 15:25, 26.

17-18. a) Zvini zvi to humelela kumbheleni ka Kufuma ka Jesu ka 1000 wa malembe? b) Zvini lezvi Jesu a to maha a cikhati leci ku to gumesa a kufuma kakwe? (1 Va Le Korinte 15:24, 28) (Wona ni mufota.)

¹⁷ Zvini zvin’wani zvi to maheka andzhako ka Kufuma ka Jesu ka 1000 wa malembe? Ka cikhati leco, ku ta maheka zvilo zvo hlawuleka nguvhu. A mhaka leyi yi patsako a kubasisiwa ka vito ga Jehovha yi ta chikela magumo. Hi ndlela muni? Le jardhim ya Edheni, Sathani i wulile lezvaku Jehovha muhembi niku a nga fumi vanhu hi lirandzo. Kusukela ka cikhati leco, a vito ga Nungungulu ni wumunhu gakwe zva basisiwa hi kuphindaphinda hi lava va mu nyikako wudzundzo ni ku mu kombisa cichavo. Hikwalaho, kumbheleni ka Mufumo wa Jesu wa 1000 wa malembe, a vito ga Jehovha gi ta ngha gi basisilwe hi kumbhelela. Jehovha i ta ngha a kombile zviku dlunya lezvaku i Papayi wa lirandzo wa le tilweni.

¹⁸ Hi magumo, lezvi Sathani a nga wula zvi ta woneka lezvaku mawunwa khati gin’we zvi enela. Zvini lezvi Jesu a to maha a cikhati leci ku to gumesa a kufuma kakwe? Xana i ta pimanyisa cikombiso ca Sathani, a hluwukela Jehovha? Ahihi. (Lera 1 Va Le Korinte 15:24, 28.) Jesu i ta tlhelisa Mufumo ka Papayi wakwe, Jehovha, a vhumela ku fumelwa hi yena. Kunene, a kuhambana na Sathani, Jesu i ti yimisele a ku tsika zvontlhe hi kota ya lezvi a randzako Jehovha.

19. Xana a vito ga Jehovha ga lisima ka Jesu?

¹⁹ A zvi kanakanisi lezvaku Jehovha i wa ti yimisele a ku nyikela vito gakwe ka Jesu! Jesu i kombile lezvaku i wa hi muyimeli wo mbhelela wa Papayi wakwe. Makunu, xana a vito ga Jehovha ga lisima ka Jesu? Ina, ga lisima nguvhu a ku hundza ni cihi. I wa ti yimisele kufa hi kota ya vito lego, niku i ta ti yimisela a ku tlhelisela zvontlhe ka Jehovha kumbheleni ka Kufuma kakwe ka 1000 wa malembe. Hi nga ci pimanyisisa kuyini a cikombiso ca Jesu? Hi ta wona hlamulo wa ciwutiso leci ka ndzima yi landzelako.