NDZIMA YA CIGONDZO N.° 23
LISIMU 2 Hi wena wece u nga Jehovha
A vito ga Jehovha ga lisima ka hina hi ndlela muni?
“‘N’wina mu vakustumunyu va mina’, ku wula Jehovha”. — ISA. 43:10.
LEZVI HI TO GONDZA
Hi ta wona lezvi hi nga mahako kasi ku komba lezvaku a vito ga Jehovha gi basile niku zvontlhe lezvi Sathani a wulako hi Jehovha mawunwa.
1-2. Hi zvi tivisa kuyini lezvaku a vito ga Jehovha ga lisima ka Jesu?
A VITO ga Jehovha ga lisima nguvhu ka Jesu a ku hundza ni cihi. A nga kona mun’wani munhu a mahileko zvilo zvo tala nguvhu kasi ku tivekisa a vito ga Jehovha a ku hundza Jesu. Kota lezvi hi zvi wonileko ka ndzima yi nga hundza, Jesu i wa ti yimisele ku fela a vito ga Jehovha ni zvontlhe lezvi gi zvi yimelako. (Mar. 14:36; Mah. 10:7-9) Andzhako ka Kufuma kakwe ka 1000 wa malembe, Jesu i ta tlhelisa Mufumo ka Jehovha kasi ku basisiwa vito Gakwe. (1 Kor. 15:26-28) A lirandzo leli Jesu a nga nalo hi vito ga Jehovha li tlhela li komba a wunghana legi a nga nago ni Papayi wakwe. Zvontlhe lezvi Jesu a mahelako Jehovha zvi komba lezvaku wa mu randza nguvhu.
2 Jesu i tile laha misaveni hi vito ga Papayi wakwe. (Joh. 5:43; 12:13) I tivekisile a vito ga Papayi wakwe ka valandzeli vakwe. (Joh. 17:6, 26) I gondzisile hi vito ga Jehovha a tlhela a maha zvihlamaliso hi vito lego. (Joh. 10:25) Hi lisine, Jesu i kombele Jehovha lezvaku a hlayisa a vapizani vakwe “hi kota ya vito” Gakwe. (Joh. 17:11) Makunu, loku Jesu a ti zwisile lezvo hi vito ga Jehovha, a munhu a nga wulisa kuyini lezvaku mulandzeli wa lisine wa Kristu na a nga gi tivi a vito ga Papayi wakwe kutani ku gi tirisa?
3. Zvini hi to bhula hi zvona ka ndzima leyi?
3 Kota maKristu, lawa ma zamako ku landzela nkondzo wa Jesu, ha gi nyika lisima a vito ga Papayi wakwe. (1 Ped. 2:21) Ka ndzima leyi, hi ta wona lezvi a vito ga Jehovha gi va tivekisisako zvona lava va huwelelako a ‘mahungu ya manene ya Mufumo’. (Mat. 24:14) A cin’wani kambe, hi ta wona ku a vito ga Jehovha ga lisima ka hina hi ndlela muni?
‘VANHU VA TO VITANIWA HI VITO GAKWE’
4. a) I ntiro muni lowu Jesu a nga nyika vapizani vakwe na ku kiyela kutsongwani kasi a tlhela tilweni? b) Ciwutiso muni ci vhukako hi kota ya ntiro lowo?
4 Na ku kiyela kutsongwani kasi a tlhela tilweni, Jesu i byelile vapizani vakwe, aku: “Mu ta nyikiwa ntamu a cikhati leci a moya wo basa wu tota hehla ka n’wina; niku mu tava vakustumunyu va mina Jerusalema, ni Judhiya gontlhe, ni Samariya, kala magemeta-musi ya misava”. (Miti. 1:8) Hikwalaho, a mahungu ya manene ma wa ta chumayelwa ni ka matiko man’wani. Hi magumo, a vanhu va matiko wontlhe va wa tava ni thomo ga kuva valandzeli va Jesu. (Mat. 28:19, 20) Kanilezvi Jesu i wulile lezvi: “Mu tava vakustumunyu va mina”. Xana a vapizani lavo va vaswa va wa fanele ku tiva vito ga Jehovha, kutani va wa tava vaKustumunyu va Jesu basi? A matimu ma nga ka Mitiro, cipimo 15, ma hi vhuna ku hlamula ciwutiso leco.
5. A vapostoli ni madhota Jerusalema va kombisile kuyini lezvaku a vanhu vontlhe va fanele ku tiva a vito ga Jehovha? (Wona ni mufota.)
5 Hi 49 Nguveni ya Hina, a vapostoli ni madhota Jerusalema va no tlhangana va bhula ku zvini lezvi a vamatiko vo kala ku mahiwa wukwera va nga fanele ku maha kasi va amukeleka kota maKristu. Kugumeseni ka mabhulo lawo, Jakobe, a makabye wa Jesu, i wulile lezvi: “[Pedro] i hlawutele hi kumbhelela lezvi Nungungulu, hi khati go sangula, a nga yisisa zvona kupima ka matiko, a hlawula vanhu cikari ka wona lava va to vitaniwa hi vito gakwe”. Jakobe i wa wula a vito ga mani? Na a tshaha magezu ya muphrofeti Amosi, Jakobe i te: “Kasi a vanhu lava va seleko va fela ku hlota Jehovha hi kutitsitsirita zvin’we ni vanhu va matiko wontlhe, a vanhu lava va vitaniwako hi vito ga mina, ku wula Jehovha”. (Miti. 15:14-18) A vapizani lavo va vaswa va wa nga ta gondza hi vito ga Jehovha basi, kanilezvi va wa ta tlhela va “vitaniwa hi vito gakwe”. Lezvo zvi wula ku va wa ta tivekisa a vito ga Nungungulu ka van’wani niku a vanhu va wa ta va wona kota lava va yimelako a vito lego.
Ka mutlhangano wa hubye yi fumako ya zana ga malembe go sangula, a vavanuna lavo vo tsumbeka va no zwisisa khwatsi lezvaku a maKristu ma wa fanele ku vitaniwa hi vito ga Nungungulu (Wona paragrafo 5)
6-7. a) Hikuyini Jesu a tileko misaveni? b) I mhaka muni yin’wani ya lisima yi nga patseka?
6 A tlhamuselo wa vito ga Jesu wu wula ku “Jehovha Kuhanyisa”, niku i kombile lezvaku yena i ndlela leyi Jehovha a yi tirisako kasi ku ponisa lava va kholwako. Jesu i tile misaveni kasi a ta nyikela wutomi gakwe hi kota ya vanhu. (Mat. 20:28) Hi ku nyikela hakhelo ya kutlhatlhisa, i mahile lezvaku hi ponisiwa hi tlhela hi kuma wutomini ga pindzukelwa. — Joh. 3:16.
7 Kanilezvi hikuyini a vanhu va nga lava ku ponisiwa? Va wa lava ku ponisiwa hi kota ya lezvi zvi humeleleko le jardhim ya Edheni. Kota lezvi zvi kumbukilweko ka ndzima yi nga hundza, a vapswali va hina vo sangula, Adhamu na Evha, va hluwukele Jehovha va luza a thomo ga ku hanya kala kupindzuka. (Gen. 3:6, 24) Hambulezvo, ku wa hi ni mhaka yin’wani ya lisima nguvhu a ku hundza a ku ponisa vawonhi. A vito ga Jehovha gi wa chakisilwe. (Gen. 3:4, 5) Hikwalaho, a kuponisiwa ka pswalo wa Adhamu na Evha ku wa yelana ni mhaka leyi ya lisima ya kubasisiwa ka vito ga Jehovha. Kota lezvi Jesu a nga yimela Jehovha a tlhela a maha zvontlhe lezvi Jehovha a nga lava lezvaku a maha, i mahile cipandze ca lisima kubasiseni ka vito ka Jehovha.
A munhu a nga wulisa kuyini lezvaku mulandzeli wa lisine wa Kristu na a nga gi tivi a vito ga Papayi wakwe kutani ku gi tirisa?
8. Zvini lezvi vontlhe lava va kholwako ka Jesu va faneleko ku vhumela?
8 Vontlhe lava va kombisako kukholwa ka Jesu, a vaJudha ni vamatiko, va fanele ku vhumela lezvaku a Cibuka ca kuhanyisiwa kabye hi Jehovha Nungungulu, a Papayi wa Jesu. (Joh. 17:3) A cin’wani kambe, a ku fana na Jesu, va vitaniwa hi vito ga Jehovha. Va fanele ku tlhela va zwisisa a lisima la kubasisiwa ka vito lego. Va fanele ku maha lezvo kasi va ponisiwa. (Miti. 2:21, 22) Hikwalaho, vontlhe a valandzeli vo tsumbeka va Jesu va fanele ku gondza hi Jehovha na Jesu. A zvi hlamalisi lezvi Jesu a nga gumesa mukhongelo wakwe wu nga ka Johani 17 hi magezu lawa: “Ndzi va tivisile a vito ga wena, ndza ha ta gi tivekisa, kasi a lirandzo leli u ndzi randzileko hi lona li fela kuva kabye, minawu ndziva zvin’we navo.” — Joh. 17:26.
“N’WINA MU VAKUSTUMUNYU VA MINA”
9. Hi nga kombisa kuyini lezvaku a vito ga Jehovha ga lisima ka hina?
9 Hikwalaho, a valandzeli vontlhe va lisine va Jesu va fanele ku chela nguvhu kota hi kubasisiwa ka vito ga Jehovha. (Mat. 6:9, 10) Va fanele ku wona vito ga Jehovha kota ga lisima nguvhu a ku hundza zvontlhe. Lezvo zvi patsa ku va maha cokari. Kanilezvi, zvini hi nga mahako kasi ku basisa a vito ga Jehovha ka mawunwa wontlhe lawa Sathani a mu lumbetako?
10. I mhaka muni yo fananisa yi tlhamuselwako ka zvipimo 42 kala 44 zva bhuku ga Isaya? (Isaya 43:9; 44:7-9) (Wona ni mufota.)
10 A lisima la ntiro wa hina kubasiseni ka vito ga Jehovha li khanyisiwa ka zvipimo 42 kala 44 zva bhuku ga Isaya. A zvipimo lezvo zvi wulawula hi tribhunali yo fananisa laha ku lamuliwako a mhaka ya vanungungulu. Jehovha i byela vontlhe lava va ti wulako ku vanungungulu lezvaku va komba ku hakunene vanungungulu ke. A cin’wani kambe, i vitana vakustumunyu kasi va ta komba ku futsi vanungungulu. Kanilezvi ne mun’we a nga zvi koti! — Lera Isaya 43:9; 44:7-9.
Hi komba hi magezu ni mitiro lezvaku a ku na mun’wani Nungungulu (Wona paragrafo 10-11)
11. Kota lezvi zvi tsalilweko ka Isaya 43:10-12, zvini lezvi Jehovha a wulako xungetano hi vanhu vakwe?
11 Lera Isaya 43:10-12. Jehovha i wula lezvi xungetano hi vanhu vakwe: “N’wina mu vakustumunyu va mina, . . . mina ndzi Nungungulu”. Jehovha i byela vanhu vakwe lezvaku va hlamula ciwutiso leci: “Ku na ni mun’wani Nungungulu ahandle ka mina ke?” (Isa. 44:8) Hikwalaho, hi na ni thomo ga ku hlamula ciwutiso leci. Hi komba hi magezu ni mitiro lezvaku Jehovha hi yena yece a Nungungulu wa lisine. A vito gakwe gi hundza mavito wontlhe. Hi komba hi mahanyela ya hina lezvaku hi lisine ha mu randza Jehovha niku ha tsumbeka kakwe — hambu loku Sathani o hi maha yini. Hi ndlela leyo, hi na ni thomo ga ku vhunetela ku basisa vito gakwe.
12. A ciphrofeto ci nga ka Isaya 40:3, 5 ci tatisekisile kuyini?
12 A cikhati leci hi seketelako a vito ga Jehovha ni ku gi basisa, hi pimanyisa Jesu Kristu. Isaya i tlhelile a phrofeta lezvaku a wokari i wa ta ‘basisa [kutani: ‘longisela’, nota] a ndlela ya Jehovha’. (Isa. 40:3) Lezvo zvi tatisekisile kuyini? Johani Mubhabhatisi i mu longisele ndlela Jesu, loyi a tileko hi vito ga Jehovha ni ku wulawula hi vito Gakwe. (Mat. 3:3; Mar. 1:2-4; Luka 3:3-6) A ciphrofeto caleci ca cin’we ci wulile lezvi: “A kungangamela ka Jehovha ku ta wonekeliswa”. (Isa. 40:5) Zvi mahekile rini lezvo? Zvi mahekile a cikhati leci Jesu a ngata misaveni, a ta yimela Jehovha hi kumbhelela laha ka kuza zvi ku khwatsi hi Jehovha wutsumbu a ngata laha misaveni. — Joh. 12:45.
13. Hi nga mu pimanyisisa kuyini Jesu?
13 A ku fana na Jesu, hi vakustumunyu va Jehovha. Hi tivekisa a vito ga Jehovha ni matshamela yakwe ya manene ka vontlhe hi va kumako. Hambulezvo, kasi hi zvi maha khwatsi lezvo, hi fanele ku tlhela hi tivekisa a ntiro wa lisima wa Jesu kubasiseni ka vito ga Jehovha. (Miti. 1:8) Jesu hi yena Kustumunyu wa hombe wa Jehovha, niku hi ingisa wurangeli gakwe. (Kuv. 1:5) Zvini zvin’wani hi nga mahako kasi ku komba lezvaku a vito ga Jehovha ga lisima ka hina?
TINDLELA TIN’WANI TA KU KOMBA KU A VITO GA JEHOVHA GA LISIMA
14. Kota lezvi zvi khanyisilweko ka Lisimu 105:3, hi ti zwisa kuyini hi vito ga Jehovha?
14 Hi tizwa matshandza hi vito ga Jehovha. (Lera Lisimu 105:3.) A cikhati leci hi ti kulisako hi vito ga Jehovha zvi maha ku a tsaka nguvhu. (Jer. 9:23, 24; 1 Kor. 1:31; 2 Kor. 10:17) A ‘ku ti kulisa hi vito ka Jehovha’ zvi wula a kutizwa matshandza hi Jehovha kota Nungungulu wa hina. Hi gi wona kota thomo a ku nyika wudzundzo ni ku seketela a vito gakwe. A hi faneli ku tshuka hi dhana a ku byela vatiri-kuloni, ni zvigondzani-kuloni, ni vaakelani va hina, ni van’wani lezvaku hi Vakustumunyu va Jehovha! Sathani i lava lezvaku hi tsika ku bhulela van’wani xungetano hi vito ga Jehovha. (Jer. 11:21; Kuv. 12:17) Hi lisine, Sathani ni vaphrofeti vakwe va mawunwa va lava lezvaku a vanhu va rivakelwa a vito ga Jehovha. (Jer. 23:26, 27) Kanilezvi a lirandzo la hina hi vito ga Jehovha li hi maha hi simama ku gi tsakela “gontlhe siku”. — Lis. 5:11; 89:16.
15. Zvi wula yini a ku khongela vitweni ga Jehovha?
15 Hi simama ku khongela vitweni ga Jehovha. (Joye. 2:32; Rom. 10:13, 14) A ku khongela hi vito ga Jehovha zvi patsa zvo hundza ku tiva kutani ku tirisa vito gakwe. Zvi patsa ku hi mu tiva Nungungulu kota Munhu, ni ku mu tsumba, ni ku hlota civhuno ni wurangeli gakwe. (Lis. 20:7; 99:6; 116:4; 145:18) A cin’wani kambe, hi wulawula hi vito gakwe ni matshamela yakwe ka van’wani, hi va kuca lezvaku va ti sola va tlhela va maha cokari kasi va tsakelwa hi Jehovha. — Isa. 12:4; Miti. 2:21, 38.
16. Hi nga kombisa kuyini lezvaku Sathani muhembi?
16 Hi ti yimisela ku xaniseka hi kota ya vito ga Jehovha. (Jak. 5:10, 11) A cikhati leci hi simamako hi tsumbekile ka Jehovha loku xaniseka, hi komba lezvaku Sathani muhembi. Masikwini ya Joba, Sathani i wulile lezvi xungetano hi vontlhe lava va tirelako Jehovha: “A munhu i ta nyikela zvontlhe a nga nazvo hi kota ya wutomi gakwe.” (Joba 2:4) Sathani i te a vanhu va tirela Jehovha ntsena loku zvi va fambela khwatsi, kanilezvi loku va kumana ni zvikarato va mu tsika. Joba, a wanuna wo tsumbeka, i kombile lezvaku lezvo mawunwa. Hi ndlela yo fana, hinawu hi na ni thomo ga ku komba lezvaku hambu loku Sathani a zama ku hi mbheta ntamu, hi nga ta tshuka hi fularela Jehovha. Hi nga tiyiseka hi kumbhelela lezvaku Jehovha i ta simama ku hi hlayisa hi kota ya vito gakwe. — Joh. 17:11.
17. Kota zvi kumbukiwako ka 1 Pedro 2:12, hi yihi a ndlela yin’wani hi nga nyikako hi yona wudzundzo a vito ga Jehovha?
17 Hi kombisa cichavo hi vito ga Jehovha. (Mav. 30:9; Jer. 7:8-11) Hi kota ya lezvi hi yimelako Jehovha ni ku tivekisa vito gakwe, hi nga gi nyika wudzundzo kutani ku gi chakisa. (Lera 1 Pedro 2:12.) Hikwalaho, hi lava ku maha zvontlhe hi zvi kotako kasi ku dzundza Jehovha hi magezu ni mitiro. A cikhati leci hi mahako lezvo, hambu lezvi hi nga vanhu vo kala kumbhelela, hi nyika wudzundzo a vito ga Jehovha.
18. Hi yihi a ndlela yin’wani hi nga kombako hi yona lezvaku a vito ga Jehovha ga lisima ka hina? (Wona ni tlhamuselo wa lahasi.)
18 Hi chela nguvhu kota hi vito ga Jehovha a ku hundza legi ga hina. (Lis. 138:2) Hikuyini lezvo zvi nga zva lisima? Hi ku a lirandzo la hina hi vito ga Jehovha li nga maha ku a van’wani va nga hi woni khwatsi.a Jesu i wa ti yimisele a kufa hi fela ga tingana, a ku khwatsi cigevenga, kasi ku nyika wudzundzo a vito ga Jehovha. A nga ‘wangi tingana’ hi kota ya lezvi a nga xaniseka kutani ku karateka ku hundza mpimo hi lezvi a van’wani va nga zvi pimisa hi yena. (Mah. 12:2-4) Jesu i vekile kupima ka ku maha kurandza ka Nungungulu. — Mat. 26:39.
19. U ti zwisa kuyini hi vito ga Jehovha, niku hikuyini?
19 Ha tizwa matshandza hi vito ga Jehovha hi tlhela hi zvi wona na zvi hi wudzundzo a ku vitaniwa ku hi Vakustumunyu vakwe. Hi kota ya lezvo, hi ti yimisele ku timisela ni kwihi kuvhukelwa loku hi nga kumanako nako. A vito ga Jehovha ga lisima nguvhu ka hina a ku hundza lezvi a vanhu va zvi pimisako hi hina. Hikwalaho, ngha hi ti yimisela ku simama hi dhumisa a vito ga Jehovha hambu loku Sathani o maha yini kasi ku hi mbheta ntamu. Hi ndlela leyo, a ku fana na Jesu, hi ta komba lezvaku a vito ga Jehovha ga lisima ka hina a ku hundza ni cihi.
LISIMU 10 Dhumisani Jehovha, Nungungulu wa hina!
a Hambu Joba, a wanuna wo tsumbeka, i karatekile a cikhati leci a vanghana vakwe va vanharu va nga wulawula zvahava hi yena. Kusanguleni, a cikhati leci Joba a nga felwa hi vana vakwe a tlhela a luza zvontlhe lezvi a nga hi nazvo, “Joba a nga wonhangi hambu ku mu lumbeta zvahava Nungungulu”. (Joba 1:22; 2:10) Hambulezvo, a cikhati leci Joba va nga mu wulawula kubiha, i no sangula ku “phuraphura”. I no rangisa ku ti yimelela ka lezvi va nga mu lumbeta wutshan’wini ga ku basisa a vito ga Nungungulu. — Joba 6:3; 13:4, 5; 32:2; 34:5.