“Lava hakunene a timbilu tabye” ti longileko va ta vhumela

1. A vanhu va nga hlamulisa kuyini a cikhati leci hi va chumayelako? (Mitiro 13:47, 48; 16:14, 15)

A VANHU vo tala ka zana ga malembe go sangula va vhumele lisine zvalezvi va ngazwa mahungu ya wuKristu. (Lera Mitiro 13:47, 48; 16:14, 15.) Ni nyamutlha, a vokari va tsaka nguvhu laha va zwako mahungu ya manene hi khati go sangula. Hambu lava va kalako va nga tekeli ku tsakela mahungu ya Mufumo hi khati go sangula, hi ndzhako ka cikhati va nga vhulula timbilu tabye. Zvini hi faneleko ku maha loku hi kuma lava ‘hakunene a timbilu tabye ti longileko’?

2. A ntiro wa hina wa ku maha vapizani wu fana ni lowu wa murimi hi ndlela muni?

² Wona mufananiso lowu. A ntiro wa hina wa ku maha vapizani wu nga fananisiwa ni wa murimi. Loku a mihandzu yo kari yi buvha, a murimi i khaya mihandzu leyo hambu lezvi zvi nga lavako ku a simama ku rima simu gakwe ni ku khatalela leyi yi kalako yi nga se buvha. Hi kufanana, neti hi kuma wokari a longileko ku vhumela mahungu ya hina, hi fanele ku tekela ku mu vhuna ku ava mupizani wa Kristu hi cihatla, na hi simama ku hlakulela kutsakela ka lava va lavako cikhati co leha kasi va wona a lisima la lezvi va zvi zwako. (Joh. 4:35, 36) A kupimisisa ku hi vhuna ku sangula mabhulo hi ndlela ya yinene ka lava va hi ingiselako. A hi woneni lezvi hi nga mahako ka mabhulo ya hina yo sangula kasi ku vhuna lava va longileko ku vhumela mahungu ya hina. A cin’wani kambe, hi ta wona lezvi hi nga va vhunisako zvona a vanhu lavo lezvaku va simama ku kula hi tlhelo ga moya.

LOKU A VANHU VA LONGILE KU VHUMELA MAHUNGU YA HINA

3. Zvini hi faneleko ku maha loku hi kuma vanhu vo tsakela kuchumayeleni? (1 Va Le Korinte 9:26)

³ A cikhati leci hi kumako vanhu vo tsakela kuchumayeleni, hi lava ku va vhuna ku va tekela ku sangula ku famba ndleleni yi yisako wutomini. Ka zviyimo zvo kari, ka khati go sangula hi bhulako ni munhu a hi faneli ku kanakana ku mu ramba lezvaku hi gondza naye Bhibhiliya ni ku ata mitlhanganweni. — Lera 1 Va Le Korinte 9:26.

4. Hlawutela tshango ga wokari a nga tekela ku vhumela cigondzo ca Bhibhiliya.

⁴ Ramba vanhu lezvaku u gondza navo Bhibhiliya. A vanhu vo kari va longile ku tekela ku vhumela cigondzo ca Bhibhiliya. Hi cikombiso, ka Wazina wo kari a muswa wo kari le Canadá i no tshinela laha ka cikarinyana ca mabhuku a teka broxura Ti buze hi wutomi kala kupindzuka!. A makabye loyi a nga hi laha ka cikarinyana i no mu tlhamusela ku a broxura lego hi gi tirisa ku fambisa hi gona zvigondzo. A muswa loye i no tsakela a tlhela a nyikela numero yakwe ya fone. Hi ndzhako ka cikhati, a muswa loye i no wutisa makabye loye lezvaku va nga sangula ku gondza ke. A cikhati leci a makabye loye a nga wula ku va wa ta sangula ku gondza kumbheleni ka vhiki, a muswa loye i no wutisa, aku: “A mandziko ke? Mina ndzi na ni cikhati.” Va no sangula ku gondza ka Wazihlanu loye. I no sangula kuya mitlhanganweni kumbheleni ka vhiki galego a tlhela a kula hi kuhatlisa.

5. Hi nga kombisa kuyini a kupimisisa a cikhati leci hi rambako vanhu lezvaku hi gondza navo Bhibhiliya? (Wona ni mifota.)

⁵ Hi lisine, a hi vontlhe va ingiselako mahungu ya hina va to fana ni muswa loye va tekela ku sangula ku gondza. A vokari va lava cikhati co tala kasi va sangula ku tsakela. Zvi nga lava ku hi sangula mabhulo hi mhaka yi tsakisako munhu loye. Hambulezvo, loku hi simama kuva ni mawonela ma nene hi tlhela hi kombisa kukhatala hi munhu loye, ndzeni ka cikhatana, a nga vhumela ku gondza Bhibhiliya. Zvini hi nga wulako a cikhati leci hi rambako wokari kasi hi sangula ku gondza naye Bhibhiliya? A ciwutiso leci ci mahilwe vamakabye vo tala va nga ni wutlhari ga hombe ga ku sangula zvigondzo.

6. Hi nga wula yini kasi ku vhuna lava va tsakelako a ku wona lisima la ku gondza Bhibhiliya?

⁶ A vahuweleli ni maphayona lawa ma wutisilweko xungetano hi ku sangula zvigondzo ma tlhamusele ku ka matiko yo kari zvi nene a ku u nga tirisi a magezu yo kota ku “cigondzo”, “kurso ya Bhibhiliya”, kutani ku “ku gondzisa” a cikhati leci u wulawulako hi cigondzo. Va polile lezvaku lezvi zvi bhindzulako khwatsi ku tirisa magezu yo kota ku “ku bhulisana”, “mabhulo”, niku “u gi tiva khwatsi Bhibhiliya”. Kasi u maha munhu loye a dokolokela ku tlhela a bhula na wena, u nga wula ku: “A zvo ku hlamalisa lezvi a Bhibhiliya gi hlamulisako zvona a zviwutiso zva lisima zva wutomi” kutani ku “a Bhibhiliya a hi bhuku ga wukhongeli basi, ga hi vhuna ka wutomi ga siku ni siku”. U nga engetela lezvi: “A zvi hlweli; a 10 kuya ka 15 minuto ta enela kasi ku gondza zvilo zva lisima.” U nga wula lezvo na u nga tirisi magezu yo kota ku “vhiki ni vhiki”, hakuva ma nga maha munhu a tizwa na a bohelelwe.

7. Hi rini a vokari va nga sangula ku zwisisa a lisine la Bhibhiliya? (1 Va Le Korinte 14:23-25)

⁷ Va rambe lezvaku vata mitlhanganweni. Zvi wonekisa ku khwatsi masikwini ya mupostoli Pawule, a vokari va sangulile ku zwisisa a lisine la Bhibhiliya a cikhati leci va ngaya mutlhanganweni wa wuKristu. (Lera 1 Va Le Korinte 14:23-25.) Lezvo zva tolovela ku maheka ni nyamutlha. A vanhu vo tala va hatlisa ku kula hi tlhelo ga moya neti va sangula kuta mitlhanganweni. Hi rini hi faneleko ku va ramba ku vata mitlhanganweni? A bhuku Ti buze hi wutomi kala kupindzuka! gi ramba a zvigondzani lezvaku zvita mitlhanganweni ka cigondzo 10, kanilezvi a wu faneli ku rindzela ku kala mu chikela ka cigondzo leco kasi ku zvi ramba. Kusukela ka khati go sangula, u nga ramba munhu loye lezvaku ata mutlhanganweni wa kumbhela ka vhiki, u nga mu byela hloko ya mhaka ya kanelo ya vanhu vontlhe kutani mhaka yo kari ya cigondzo ca Murindzeli ca vhiki lego.

8. Zvini hi nga byelako munhu a cikhati leci hi mu rambako kuta mitlhanganweni? (Isaya 54:13)

⁸ Laha u rambako munhu a tsakelako mu tlhamusele lezvi a mitlhangano ya hina yi nga hambanisa zvona ni wukhongeli legi a gi toloveleko. A cikhati leci a cigondzani co kari ci nga wona a cigondzo ca Murindzeli hi khati go sangula, ci no wutisa mugondzisi wa cona, ciku: “A mufambisi wa ma tiva a mavito ya vontlhe?” A makabye loye i no tlhamusela ku hontlheni hi ti karatela ku tiva mavito ya vontlhe lomu bandleni, a ku khwatsi hi lezvi hi tivako mavito ya va ngango wa hina. A cigondzani leco ci no tekela ku zvi wona ku zvi wa hambene ni le chichini ya cona. A cin’wani kambe, hi nga tlhamusela a munhu loye a kungo ga mitlhangano ya hina. (Lera Isaya 54:13.) Hi tlhangana kasi ku khozela Jehovha, ni ku gondza hi yena, ni ku tiyisana. (Mah. 2:12; 10:24, 25) Hi kota ya lezvo, a mitlhangano ya hina yi xaxametilwe khwatsi kasi ku hi vhuna ku gondza niku a yi patsi zvihena. (1 Kor. 14:40) A matshamu ya hina ya wukhozeli ma wonekela khwatsi hakuva hi yela ku ya gondza. A hi vhuvhumisi a partidho yo kari hakuva a hi ti ngheniseli ka timhaka ta politika; ne a hi wulawulisani kutani ku kanetisana hi zvilo zva politika. Zvi nga vhuna a ku ranga hi ku komba a cigondzani ca Bhibhiliya a vhidhio leyi yaku: Zini zi mahiwako lomu ka Salawu ya Mufumo? Lezvo zvi ta ci vhuna ku tiva lezvi ci to zvi wona.

9-10. A cikhati leci hi rambako wokari a ku ata mitlhanganweni, zvini hi nga mahako kasi ku tiyisekisa a munhu loye lezvaku hi nga ta mu kurumeta ku ava Kustumunyu kutani ku a hlamula? (Wona ni mufota.)

⁹ A vokari va kanakana kuta mitlhanganweni ya hina hi ku chava ku wutisiwa ku “zvezvi u Kustumunyu wa Jehovha?” Tiyisekisa munhu loye lezvaku zva hi tsakisa ku amukela vapfhumba niku a hi va kurumeti ku va hlamula mitlhanganweni. A vanhu vontlhe va ngata mitlhanganweni ya hina a ku patsa ni mingango leyi yi nga ni vanana va vatsongwani. Mitlhanganweni ya hina, a vanana va tshama zvin’we ni vapswali vabye va gondza. Hi ndlela leyo, a vapswali va zvi tiva ku himani a nga ni vana vabye niku zvini va gondzisiwako. (Dhewu. 31:12) A hi mahisi mihlengo kutani ku fambisa cibya ca ku chela mali. Kanilezvi hi landzela nayo wa Jesu wa ku “mu amukele mahala, nyikani mahala”. (Mat. 10:8) A cin’wani kambe, u nga tlhamusela munhu loye lezvaku a zvizi zvi lava ku a boha tinguwo to dhura kasi kuta mitlhanganweni. Nungungulu i cuwuka mbilu na ku nga hi lezvi a munhu a nga tshamisa zvona. — 1 Sam. 16:7.

¹⁰ Loku a munhu loye ata mutlhanganweni, maha zvontlhe kasi a tizwa na a amukelwe khwatsi. Mu tivekise ka madhota yo kari ni ka vahuweleli van’wani. Loku a wona ku a vamakabye laha bandleni va na ni cinghana niku va khatala hi yena, kuzvilava i ta tsakela a ku tlhela a wuya kambe. Ndzeni ka mutlhangano, loku a nga hi na Bhibhiliya, lera naye lomu ka Bhibhiliya ga wena u tlhela u mu vhuna ku landzela lezvi zvi kanelwako kutani zvi gondziwako.

A CIKHATI LECI KU SANGULILEKO CIGONDZO CA BHIBHILIYA

11. U nga kombisa kuyini lezvaku wa kombisa cichavo hi cikhati ni tiprograma ta loyi a ku ingiselako?

¹¹ Zvini hi kalako hi nga faneli ku zvi rivala laha hi gondzako ni wokari? Kombisa cichavo hi cikhati cakwe ni tiprograma takwe. Loku u bhula ku gondza ni wokari hi cikhati co kari chikela hi cikhati, hambu loku lomu cipandzeni ca n’wina va nga toloveli ku chela kota hi cikhati. A cin’wani kambe, zvi nene a ku ka cigondzo co sangula u nga lehisi. A vahuweleli vo kari va nga ni zvigondzani zvo tala va nyika mawonela ya ku zvi nene a ku hatlisa hi gumesa cigondzo, hambu loku a munhu loye a ha lava kuzwa zvin’wani. Zva lisima kambe a ku hi nga wulawuli nguvhu. Tsika n’winyi wa muti a ti tlhatlha. — Mav. 10:19.

12. Gi fanele kuva gihi a kungo ga hina kusukela kusanguleni ka cigondzo ca Bhibhiliya?

¹² Kusukela kusanguleni, a kungo ga wena gi fanele kuva ku vhuna munhu loye lezvaku a tiva Jehovha na Jesu ni ku va randza. U nga maha lezvo hi ku yisa kupima ka Mhaka ya Nungungulu na ku nga hi ka wena kutani ka lezvi u zvi tivako hi Bhibhiliya. (Miti. 10:25, 26) Laha mupostoli Pawule a nga gondzisa i wa yisa kupima ka Jesu Kristu, loyi Jehovha a mu rumeleko kasi ku ta hi vhuna ku hi tiva Jehovha ni ku mu randza. (1 Kor. 2:1, 2) Pawule i tlhelile a komba a lisima la ku vhuna lava va nga vaswa a ku va ti karatela kuva ni matshamela ya manene ma nga fananisiwako ni ouro, ni prata, ni maribye ya lisima. (1 Kor. 3:11-15) A matshamela lawo ya lisima ma patsa a kukholwa, ni wutlhari, ni kupimisisa, ni kuchava Jehovha. (Lis. 19:9, 10; Mav. 3:13-15; 1 Ped. 1:7) Pimanyisa a magondzisela ya Pawule hi ku vhuna zvigondzani zva wena a ku hlakulela kukholwa ni wunghana go tiya ni Papayi wa zvona wa lirandzo wa le tilweni. — 2 Kor. 1:24.

13. Hi nga kombisa kuyini lihlazva-mbilu ni kuringanisela laha hi vhunako lava va tsakelako? (2 Va Le Korinte 10:4, 5) (Wona ni mufota.)

¹³ Pimanyisa a magondzisela ya Jesu hi ku kombisa lihlazva-mbilu ni kuringanisela. U nga mahi zviwutiso zvi wisako tingana. Loku ku hi ni zvokari zvi mu karatelako ku zvi zwisisa tlulani muya ka mhaka yin’wani mu gumesa mu wuya. Wutshan’wini ga ku mu kurumeta ku a vhumela gondzo yo kari, mu nyiki cikhati ca ku a lisine li zima timitsu mbilwini yakwe. (Joh. 16:12; Kol. 2:6, 7) A Bhibhiliya gi fananisa tigondzo ta mawunwa leti hi zamako ku ti simula ni makhokhola. (Lera 2 Va Le Korinte 10:4, 5; wona nota ya cigondzo laha ka ku “demolir fortalezas”.) Wutshan’wini ga ku tsutsumela ku khungumula makhokhola ya cigondzani, sangula hi ku ci vhuna ku ci Jehovha kota khokhola ga cona. — Lis. 91:9.

HI NGA VA VHUNISA KUYINI LAVA VA SANGULAKO KUTA MITLHANGANWENI?

14. Hi fanele ku va khomisa kuyini lava va sangulako kuta mitlhanganweni?

¹⁴ Jehovha i rindzela lezvaku hi nga kombisi cihlawulela ka ndlela leyi hi va khomako hi yona lava va sangulako kuta mitlhanganweni na ku nga khataliseki lomu va tako hi kona, ni mudhawuko wabye, ni ku zvisiwana kutani va ganyile. (Jak. 2:1-4, 9) Makunu, hi nga kombisa kuyini lirandzo hi lava va sangulako kuta mitlhanganweni?

15-16. Hi nga va vhunisa kuyini lava va sangulako kuta mitlhanganweni ya hina kasi va tizwa na va amukelwe khwatsi?

¹⁵ A vokari vata mitlhanganweni ya hina kasi ku ta tiva lezvi zvi mahekako kutani hi kota ya lezvi va kucilweko hi wokari. Hikwalaho, loku u wona vanhu va vaswa mitlhanganweni, bhula navo. Va hoyozele kanilezvi u nga va wisi tingana. Tshama navo. Lera navo a Bhibhiliya ni mahungu lawa ma gondziwako kutani ku va lavela tikopiya tabye. Ehleketa kambe hi lezvi u nga mahako kasi va tizwa khwatsi. A wanuna wo kari a ngata Salawini ya Mufumo i no byela makabye wo kari lezvaku i wa nga tlhatlheki hi lezvi a nga bohile tinguwo to kala ti nga ringani. A makabye loye i no mu maha a tizwa na a tlhatlhekile a tlhela a mu tlhamusela lezvaku a Vakustumunyu va Jehovha vanhu vo toloveleka. A wanuna loye, loyi hi kufamba ka cikhati a nga bhabhatisiwa, a nga tshukangi a rivala lezvi a makabye loye a nga mu khomisa zvona. Tiva lezvi: A cikhati leci u bhulako ni lava va gondzako kuta mitlhanganweni, a mutlhangano na wu nga se sangula kutani ndzhako ka wona, kombisa kukhatala kanilezvi u ti wonela ku ti nghenisela ka wutomi gabye. — 1 Ped. 4:15.

¹⁶ Hi nga maha ku lava va sangulako kuta mitlhanganweni ya hina va tizwa na va amukelwe khwatsi hi ku hiva ni cichavo ka mabhulo ya hina, ni ka mihlamulo ya hina, ni ka zvipandze zva mitlhangano zvi wulawulako hi lava va kalako va nga hi Vakustumunyu kutani hi lezvi va zvi kholwako. U tirisi magezu ma to va khunguvanyisa kutani ku zvi wonisa ku khwatsi wo va ruka. (Tit. 2:8; 3:2) Hi cikombiso, a hi lavi ku tshuka hi chepeta lezvi va zvi kholwako. (2 Kor. 6:3) Mhakeni leyi, a vamakabye lava va vekako tikanelo ta vanhu vontlhe va fanele ku chela nguvhu kota. A vamakabye lavo va tlhela va komba lezvaku va alakanyela hi lava va nga kona mutlhanganweni kalako va nga hi Vakustumunyu hi ku tlhamusela magezu kutani zvilo lezvi va zvi tivako ku va nga ta zvi zwisisa.

17. Gi fanele kuva gihi kungo ga hina a cikhati leci hi kumako vanhu va ‘timbilu ti longileko’ ntirweni wa kuchumayela?

¹⁷ Siku ni siku, a ntiro wa hina wa ku maha vapizani wu engetela kuva wa cihatla niku hi simama ku kuma vanhu lava a ‘timbilu tabye ti longileko ku amukela a wutomi ga pindzukelwa’. (Miti. 13:48) A cikhati leci hi va kumako, a hi faneli ku kanakana ku va ramba ku hi gondza navo Bhibhiliya kutani ku va ramba ku vata mitlhanganweni. Hi ku maha lezvo, hi va vhuna kuba mazambo yo sangula ndleleni “yi yako wutomini”. — Mat. 7:14.