U nga gondzisa kuyini Bhibhiliya hi ndlela yo tsakisa ni yo bhindzula?

Joxuwa a gondzako a Nayo; a makhurisi ya Jeriko ma hohlolwa niku a yindlu ya Rahabi a yi wangi; Joxuwa a tlakusa mawoko a khongela

JOXUWA i wa fanele ku rangela vaIzrayeli kasi vaya Tikweni ga Citsumbiso. Lezvo zvi wa nga ta olova. Hambulezvo, Jehovha i tiyisile Joxuwa hi ku mu byela lezvi: ‘Tiyisa mbilu, uva ni ntamu.’ I byelile Joxuwa lezvaku loku a gondza Nayo a tlhela a wu ingisa, i wa ta maha zviboho zva wutlhari a tlhela a humelela ka zvontlhe a zvi mahako. — Joxuwa 1:7, 8.

Hi hanya ‘zvikhatini zva zvikarato’, hikwalaho a wutomi gonawu gi ngava ni zvikarato. (2 Timote 3:1) A ku fana na Joxuwa, kasi a zvilo zvi hi fambela khwatsi hi fanele ku ingisa wusungukati legi Jehovha a hi nyikako. Hi fanele ku gondza Bhibhiliya siku ni siku hi tlhela hi tirisa lezvi hi gondzako kasi ku maha zviboho zva zvi nene.

Kuzvilava a kutala ka hina a hi zvi tivi lezvi hi nga gondzisako zvona, kutani ku a zvi hi tsakisi ku gondza. Hambulezvo, a ku ti mahela cigondzo ca Bhibhiliya zva lisima nguvhu. Laha u yako u vhuxeta kwadru gi nge “Tirisa mawonela lawa”, u ta kuma mawonela ma to ku vhuna ka cigondzo ca wena ca Bhibhiliya ma tlhela ma ci maha ci tsakisa nguvhu.

A mutsali wa tisimu i te: ‘Ndzi mahe ndzi famba zvileletelweni zva wena, hakuva ndza zvi tsakela.’ (Lisimu 119:35) Wenawu zvi nga ku tsakisa ku gondza Mhaka ya Nungungulu. U ta pola zvilo zvo tala nguvhu laha u simamako ku gondza a Bhibhiliya.

Hambu lezvi u to kala ku rangela vanhu a ku fana na Joxuwa, u na ni zvikarato zva wena n’winyi. Maku, a ku fana na Joxuwa, gondza Mhaka ya Nungungulu u tlhela u yi ingisa. Loku u maha lezvo, u ta maha zviboho zva wutlhari zvi tlhela zvi ku fambela khwatsi wutomi ga wena.

TIRISA MAWONELA LAWA

Khongela na u nga se sangula ku gondza. A Bhibhiliya gi na ni maalakanyo ya Jehovha, niku gi tsalelwe ku vhuna wena. Hikwalaho a cikhati u lerako Bhibhiliya, kombela Jehovha lezvaku a ku vhuna ku zwisisa lezvi u lerako, ku zvi alakanya, ni ku zvi tirisa kasi ku maha zviboho zva wutlhari wutomini ga wena. — Ezra 7:10.
Ti mahe zviwutiso laha u lerako Bhibhiliya kutani mabhuku ma seketelwako ka gona. Hi cikombiso: ‘A mahungu lawa ma ndzi byela yini hi Jehovha? Ma yelanisa kuyini ni mhaka-tshinya leyi a Bhibhiliya gi wulawulako hi yona? A mahungu lawa ndzi nga ma tirisisa kuyini kasi ku vhuna van’wani?’
Ehleketa hi lezvi u gondzako. A cikhati leci u lerako tana na u nyima u ku hwi u ehleketa hi lezvi u lerileko. Ti wutise lezvi: ‘A mahungu lawa ma ndzi khumbisa kuyini? Hikuyini ma ndzi khumbako hi ndlela leyi? Ma yelanisa kuyini ni lezvi zvi nga ndzi humelela cikhatini ci hundzileko, lezvi zvi ndzi humelelako zvezvi kutani lezvi zvi to ndzi humelela cikhatini ci tako? Ndzi nga ma tirisisa kuyini matshinya lawa ya milayo ya Bhibhiliya ni wusungukati legi wutomini ga mina?’ (Joba 23:5; Lisimu 49:3) A cikhati u ehleketako hi lezvi u nga lera, zama ku pola ku hikuyini Jehovha a byelako vanhu vakwe lezvaku va potsa mahanyela yo kari. U nga ehleketa kambe hi lezvi zvi nga wa tava zvi humelele munhu loye u gondzako hi yena loku i wa no maha zvilo hi mahela gin’wani.— Dhewuteronome 32:28, 29.
A cikhati u lerako alakanyela. Hi cikombiso, u nga ehleketa hi cikhati leci a vamakabye va Josefa va nga mu xavisa ka vaIsmayeli? (Genesisi 37:18-28) Zvini u zvi wonako, u zvi zwako, kutani zvi nuhelako? Ti alakanyele na u hi navo. Zvini va nga kari va zvi alakanyela niku va wa ti zwisa kuyini? Loku u alakanyela, a cigondzo ca wena ci ta tsakisa ci tlhela ci bhindzula nguvhu.
Tirisa zvitiro zvo gondza hi zvona lezvi a hlengeletano yi humesako. A zvitiro lezvo zvi nga ku olovisela ku hlota mahungu. Gondza lezvi u nga zvi tirisisako zvona zvitiro zvi nga kona hi lirimi la wena, zvi nga ka Internet ni ka mabhuku ya ku gandliwa. U nga chavi ku kombela ku vhuniwa kasi u tiva lezvi u nga zvi tirisisako zvona hi ndlela yi nene. Hi cikombiso, a Biblioteca da Torre de Vigia kutani Bhuku go kambisisa hi gona ga Timboni ta Jehovha ma ta ku vhuna ku kuma mitlhamuselo xungetano hi mhaka yo kari ka mabhuku man’wani ni mitlhamuselo ya mavhesi yo tala ya Bhibhiliya. Tirisa zviengetelo zvi nga ka Tradução do Novo Mundo da Bíblia Sagrada loku gi hi kona hi lirimi u li kotako. A zvitiro lezvi zvi na ni mahungu ya lisima nguvhu ma wulawulako hi matiko, hi cikhati leci a zvilo zvi nga maheka hi cona, timpimo, ni zvin’wani.
Songa timhaka-tshinya. Lezvo zvi ta ku vhuna ku alakanya lezvi u nga gondza. A mhaka yin’wani ya yi nene, ku bhulela van’wani lezvi u gondzileko. Ku na ni zvokari u nga zvi tirisako ntirweni wa kuchumayela? Loku u maha lezvo, u ta alakanya timhaka-tshinya ta lezvi u nga gondza, niku lezvo zvi ta vhuna ni van’wani.