Hikuyini Nungungulu a lavekako wutomini ga hina?

A titlhari ta ku gonza a kuhlayiseka ka mapimo ti wula lezaku kasi a vanhu va kuma litsako la lisine va fanele ku maha zo hunza ku khatalela za nyama yabye. A mhaka leyi yi woneka khwatsi hi lezi a vanhu vo tala va zamako ku kuma litsako hi ku ti karatela ku lumba hlengeletano yi nga ni kungo go kari, ku tirela munhu wa xikhundla xo tlakuka, kutani ku maha zilo zinwani za hombe ku hunza zilo zabye za siku ni siku. Kasi ku tatisa a xilaveko lexi, a vokari va ti hungata hi zilo za ntumbuluko, mitiro ya wumeseri, wucenje ni zinwani. Hambulezo, a votala a va kumi litsako la lisine ni la simasima ka zilo lezo.

A vagonzi va Biblia a zi va hlamalisi a ku tiva lezaku a vanhu va na ni kuxuva ka mabeleko ka ku lava ku tiva Nungungulu. A zipimo zo sangula za bhuku ga Genesisi zi komba lezaku anzhako ka kuva Nungungulu a mahile a patswa wo sangula wa vanhu, i wa bhula nawo hi kukhanzakanya, hi ndlela leyo va wumba kuzwanana na yena hi tlhelo ga moya. (Genesisi 3:8-10) Nungungulu a nga mahangi vanhu lezaku va hanya na va nga rangelwi hi yena; va na ni xilaveko xa ku wulawula ni Muvangi wabye. A Biblia gi wulawula nguvu hi xilaveko lexi.

Hi xikombiso, Jesu i te ngalo: “Va katekile lava va khatalako hi xilaveko xabye xa moya.” (Mateu 5:3, Tradução do Novo Mundo.) A magezu lawa ma hi komba lezaku a xinwe xa zilo za lisima kasi hi kuma litsako wutomini, ku xurisa a ndlala ya hina ya ku lava ku tiva Nungungulu. Hi nga zi mahisa kuyini lezo? Jesu i nyikile hlamulo wa kona laha a ngaku: “A munhu a nga ta hanya hi xibaba xoce, kanilezi hi timhaka tontlhelele leti ti humako nonwini wa Nungungulu.” (Mateu 4:4) Xana a timhaka ti humako nonwini wa Nungungulu, ku nga kupima kakwe ni zileletelo lezi a hi nyikako hi ku tirisa a Biblia, ti hi nyika litsako ti tlhela ti hi vuna ku hanyela xo xi tiva hi ndlela muni? A hi woneni tindlela tinharu ta lisima.

Hi lava wurangeli ga gi nene

Inyamutlha, ku na ni titlhari ta tsanza-vahlayi ti tshamako na ti longile ku nyikela wusungukati xungetano hi kuzwanana, liranzo, wutomi ga ngango, ku mbheta tiholova, hambu ni ndlela ya ku kuma wutomi ga gi nene. Hambulezo, himani hakunene loyi a ringanelwako hi ku hi nyika wusungukati ga gi nene ka zontlhe lezi, ahandle ka Muvangi wa vanhu, Jehova Nungungulu ke?

Kasi ku kombisa: Loku u xava nchumu wa wuswa, wo kota muchini wa ku susa mifota kutani komputadori, u rinzela ku wu kuma na wu hi ni bhuku ga zileletelo za matirisela ya wona kasi u zi kota ku wu tirisa khwatsi, u tlhela u tsaka hi nchumu lowo u wu xavileko. A Biblia gi nga fananiswa ni bhuku lego. I bhuku ga zileletelo za wutomi ga vanhu, legi Nungungulu, kota muvangi wa vona, a nyikileko hina vatirisi. A ‘bhuku legi ga zileletelo’ gi tlhamusela lezi a xibya lexi, ku nga munhu, xi mahelweko zona ni ndlela yi nene ya ku xi tirisa.

A ku fana ni bhuku ga zileletelo legi gi tsalilweko khwatsi, a Biblia gi tlharihisa vagonzi va gona lezaku va potsa zimaho lezi zi nga wa ta onha a kuhlayiseka ni matirela ma nene ya “xibya” lexi — ku nga wutomi ga hina. A wusungukati legi a vanwani va nga hi nyikako, gi nga ha hi tsakisa hambu ku woneka na gi olova nguvu; hambulezo, xana a zi zwisiseki lezaku hi ta tshovela mihanzu ya yi nene, hi tlhela hi potsa zikarato loku hi lanzela a zileletelo za Muvangi wa hina ke?

Hambu lezi Jehova Nungungulu a hi gonzisako a tlhela a hi nyika zileletelo, a nga hi kurumeti ku zi lanzela. Wutshanwini ga lezo, yena kota Muvangi a hi ranzako ni ku hi navelela za zi nene, i hi khongotela hi liranzo aku: “Hi mina Jehova, Nungungulu wa wena, Loyi a ku gonzisako lezi zi ku vunako, Loyi a ku rangelako ndleleni leyi u faneleko ku famba ha yona. O, loku ku wo khwatsi wa ingisa zileletelo za mina! Zonake a kurula ka wena ku wa ta khulunga ku khwatsi i congo, ni kululama ka wena ku wa ta ku khwatsi mabyandlati ya bimbi.” (Isaya 48:17, 18) Hi magezu matsongwani, loku hi ingisa a wurangeli ga Nungungulu hi ta hanya khwatsi. Hi wulela ginwani, Nungungulu wa laveka wutomini ga hina kasi hi hanya khwatsi hi tlhela hi tsaka.

Hi lava ku tiva ku hikuyini a wutomi gi nga ni zikarato

A vokari va tizwa na va nga hi na xilaveko xa Nungungulu wutomini gabye hi kota ya zikarato zo tala za wutomi, lezi va zi wonako na zi nga yelani ni ku kholwa lezaku ku na ni Nungungulu wa liranzo. Hi xikombiso, va nga ha wutisa lezi: ‘Hikuyini a vanhu va va nene va xanisekako?’ ‘Hikuyini a zivanana zi nga hiko na nanzu zi pswaliwako na zi hi ni wulema?’ ‘Hikuyini a wutomi gi teleko hi wubihi?’ Lezi ziwutiso za lisima hakunene, niku a ku kuma mihlamulo ya zona zi nga hi vuna nguvu wutomini ga hina. Kanilezi, wutshanwini ga ku hatlisela ku sola Nungungulu hi kota ya zikarato lezo, a hi woneni lezi a Mhaka yakwe, a Biblia, yi nga hi vunisako zona a ku zwisisa ziwutiso lezi.

Ka xipimo xa wunharu xa bhuku ga Genesisi, hi kuma matimu ya Satani, loyi a tirisileko nyoka kasi ku kucetela a patswa wo sangula wa vanhu lezaku va tshova xileletelo xa Jehova Nungungulu xa ku ngagi sinya ya ku tiva za zi nene ni za kubiha. Satani i te ngalo ka Eva: “Mu nga tafa futsi; hi lezaku Nungungulu wa zi tiva lezaku, a siku lego mu gako yona, a mahlo ya nwina ma ta vululeka, mu kota Nungungulu, mu tiva kusasa ni kubiha.” — ​Genesisi 2:16, 17; 3:4, 5.

Hi magezu lawa, Satani i lo lumbeta Nungungulu lezaku muhembi, ni lezaku a mafumela ya Nungungulu a ma lulamangi. Satani i lo wula lezaku loku a vanhu va wo ingisa yena, a zilo zi wa ta va fambela khwatsi. Xana a timhaka leto ti wa ta lulamisiswa kuyini? Jehova i lo boha ku tsika xikhati xi hunza kasi a vanhu vontlhe va wona lezaku xana a kulumbetwa loko ka lisine kutani ka mawunwa ke. Hi lisine, Nungungulu i wo nyika Satani ni lava va yimileko tlhelweni gakwe a lungelo ga ku komba lezaku a vanhu va nga hanya khwatsi na va nga hi na Nungungulu ke.

Hi mawonela ya wena, hi wihi a hlamulo wa mhaka leyi Satani a yi vuxileko ke? Xana a vanhu va zi kota ku hanya khwatsi, va tlhela va ti fuma khwatsi na va nga rangelwi hi Nungungulu? A kuxaniseka, wubihi, mababyi, wugevenga, mahanyela yo biha, tiyimpi, kuhihiritwa ka vanhu, ni zilo zinwani zi xanisako vanhu hi malembe yo tala nguvu, zikombiso zo dlunyateka za lezaku a mizamo ya vanhu ya ku ti fuma, wutshanwini ga ku fumiwa hi Nungungulu, a yi vuni nchumu. Wutshanwini ga ku wula lezaku Nungungulu hi yena a nga ni nanzu wa kuxaniseka ka vanhu, a Biblia gi komba xigelo xa hombe xa kuxaniseka loku. Gi ngalo: ‘A munhu i fumela munwani a mu yisa khombyeni.’ — Mutshawuteli 8:9.

Xana a mitlhamuselo leyi hi yi kumileko laha, a yi hi kombi lezaku hi fanele kuya ka Nungungulu, na ku nga hi ku ya tiva mihlamulo ya ziwutiso zi karatako vanhu ntsena, kanilezi ni ku ya tiva a ndlela ya ku zi mbheta ke? Zini lezi Nungungulu a to maha?

Hi lava ku vuniwa hi Nungungulu

Kusukela kale, a vanhu va xuva ku ti tlhatlhisa ka mababyi, kukhosahala, ni kufa. Va ti karata nguvu, va tlhela va mbheta xikhati xo tala nguvu ni mali yo tala nguvu na va zama ku ti tlhatlhisa ka zilo lezo. Hambulezo, zo va vuna kutsongwani ntsena kutani ku nga va vuni futsi. A vokari va tsumba lezaku va ta kuma kutlhatlheka loko hi ku tirisa zipitali, wungoma, ni zinwani. Kanilezi, a kutsumba loko a ku tshuki ku tatiseka.

Nungungulu i lava lezaku a vanhu va hanya khwatsi ni kuva va tsaka. Lego ku’ve gona kungo gakwe a xikhati lexi a nga vanga vanhu, niku a nga se gi rivakelwa. (Genesisi 1:27, 28; Isaya 45:18) Jehova Nungungulu wa hi tiyisa lezaku ni xihi lexi a tsumbisako xi ta tatiseka handle ko kanakana. (Isaya 55:10, 11) A Biblia gi hi tlhamusela xitsumbiso xa Nungungulu xa ku vuxeta a paradise legi gi luzilweko hi patswa wo sangula wa vanhu. Lomu ka bhuku go gumesa ga Biblia, hi kuma magezu lawa: “[Jehova Nungungulu] i ta kulula mihloti yontlhe mahlweni yabye. Ku nga ha ta va kona kufa, hambu ni hlomulo, kutani kurila ni kubayisa; hakuva a zilo zo sangula zi hunzile.” (Kuvululelwa 21:4) Xana Nungungulu i ta nehisa kuyini a matshamela lawo ya ma nene, niku hi nga vunekisa kuyini hi xitsumbiso lexi?

Jesu Kristu, a n’wana wa Nungungulu, i gonzisile a vapizani vakwe a kuva va kombela ka Nungungulu hi mukhongelo lezaku a kuranza Kakwe ku maheka. A vanhu vo tala va wu tiva mukhongelo lowu kutani ku tolovela ku wu phindaphinda loku va khongela. A mukhongelo lowu, a vokari va wu vitana ku Mukhongelo wa Hosi. Wona wu ngalo: “Dadani wa hina wa le tilweni, a vito ga wena a gi hlawuliwe. A wute mufumo wa wena. Kuranza ka wena a ku mahiwe misaveni, kota lezi ku mahiwako le tilweni.” (Mateu 6:9, 10) Kunene, a Mufumo wa Nungungulu hi wona lowu Jehova Nungungulu a to wu tirisa kasi ku fuvisa a zikarato zi vangiwako hi mafumela ya munhu, a tlhela a neha a misava yiswa yo lulama leyi a yi tsumbisako.a (Danieli 2:44; 2 Pedro 3:13) Zini hi faneleko ku maha kasi hi vuneka hi xitsumbiso xa Nungungulu?

Jesu Kristu i hi komba lezi hi faneleko ku maha, aku: ‘A wutomi ga pinzukelwa hi kuva va ku tiva, wena Nungungulu wece wa lisine, na Jesu Kristu loyi u mu rumileko.’ (Johani 17:3) Hakunene, hi ku vuniwa hi Nungungulu, hi nga zi kota ku kuma wutomi gi nga mbheliko misaveni yiswa yi tsumbisilweko. A kutsumba loku kuzilava ka ku nyika xinwani xigelo xo zwala xa ku hlamula aku ina a xiwutiso lexi xaku, Nungungulu wa laveka wutomini ga hina ke?

Lexi xikhati xa ku lava Nungungulu

Ka 2.000 wa malembe ma hunzileko, lomu Areopagu, le Atensi, mupostoli Paule i wulile lezi xungetano hi Nungungulu ka vaAtensi, va nga hi vanhu va nga tlhatlhekile kuzwa mawonela ya vanwani hambu lezi va nga hi ni tifilozofia tabye: “Hi yena a va nyikako wutomi vontlhe, ni kuhefemula, ni zilo zontlhe. Hakuva ka yena ha hanya, ha fambafamba, hi hi ni kuvakona ka hina; kota lezi va wulileko a vanwani va vasimi va nwina va tisimu, vaku: Hinawu kambe hi pswalo wakwe.” — Mitiro 17:25, 28.

Lezi Paule a zi wulileko ka vaAtensi za ha hi tano ni nyamutlha. A Muvangi wa hina i hi nyika moya lowu hi hefemulako, zakuga lezi hi gako, ni mati lawa hi nwako. Handle ko kanakana, hi wa nga ta zi kota ku hanya loku hi wa nga hi na zilo zontlhe za zi nene lezi Jehova a hi nyikako kasi ku hi hlayisa. Kanilezi, hikuyini Nungungulu a simamako ku nyika vanhu a zilo lezi za zi nene na a nga cuwuki ku va khatala hi yena kutani a va khatali ke? Paule i wulile lezaku i maha lezo kasi va ‘fela ku lava Nungungulu, kutani va nga hulumetela va mu kuma, hambu lezi a nga hiku kule ka munwe ni munwani wa hina.’ — Mitiro 17:27.

Xana wa zi lava ku mu tiva khwatsi Nungungulu, ku tiva zinwani xungetano hi makungo yakwe ni wusungukati legi a hi nyikako kasi hi hanya khwatsi ke? Loku zi hi nghaho ha ku kuca lezaku u wulawula ni loyi a ku nyikileko a revista legi kutani ku tsalela a vahumesi va gona. Va ta ku vuna hi matsenya.