Jehova i wa nga nzi rivalangi

KALE KA MINA:

Nzi pswalilwe xikari ka vanhu va nga hanya wutomi ga wuchukwana le Bilbao, nwalungu wa Espanya. Nzi wa hi n’wana wa wumbiri xikari ka mune wa vona. Hi wa hi vaKatolika vo hiseka laha ngangweni wa hina, niku mina nzi waya chechini siku ni siku. A xikhati nzi nga hi ni 23 wa malembe, nzi lo maha mugonzisi — ku nga ntiro nzi nga wu ranza nguvu, lowu nzi wu mahileko hi xipimo xa 40 wa malembe. A xinwe xa zilo nzi nga tizwa nguvu matshanza hi zona kuva mugonzisi wa chechi ya Katolika, niku hi xikhati xa ni gambo nzi wa tira kota mugonzisi wa katikeza — nzi gonzisa vanhanyana lezaku vaga a comunhão yabye yo sangula.

Anzhako ka 12 wa malembe wukatini ga mina go tsakisa, nzi lo felwa hi nuna, nzi sala ni mune wa vana va vanhanyana kasi ku va wundla. Nzi wova ni 33 wa malembe ntsena! Nzi lo zama ku kuma ku chavelelwa chechini ya mina ya Katolika, kanilezi nzi wa ti maha ziwutiso zo tala. Nzi wa ti wutisa lezi: ‘Hikuyini hina vanhu hi simamako kufa kuveni Kristu i hi tirulile? Hikuyini hi kombelako lezaku a Mufumo wa Nungungulu wuta kasi lezo a vanhu vontlhe va va nene vaya tilweni ke?’ Niku a ku hunza zontlhe, nzi wa ti wutisa lezi: ‘Loku ku hi lezaku Nungungulu wa hi lamula a xikhati lexi hi fako, hikuyini ku nga wa ta laveka lezaku hi tlhela hi suka le tilweni, kutani le purgatório, kutani wutshanwini legi ku hisiwako vanhu kasi hiya kulamulweni ko gumesa ke?’

Nzi lo maha ziwutiso lezi ka vapaderi vo hambanahambana. A munwe wabye i lo nzi hlamula lezi: “A nzi zi tivi. Wutisa bixopo. Kona hikuyini u karatekako hi lezo? Wena wa kholwa ka Nungungulu, a hi zona? Makunu, loku zi hi tano, zi tsike basi!” Kanilezi nzi lo simama ku lavetela mihlamulo. Hi nzhako ka xikhati, nzi lo ya ingisela tikanelo ta vaJesuíta, vaPentekosta, ni vaGnóstico. Hambulezo, i hava ni munwe wabye a nga hi ni mihlamulo yo zwala ya ziwutiso za mina.

LEZI A BIBLIA GI NGA CICISA ZONA A WUTOMI GA MINA:

A xikhati lexi nzi nga hi kwalomo ka 60 wa malembe, a xinwanana xo kari xa 7 wa malembe xi lo nzi ramba lezaku nziya ka mutlhangano wa Timboni ta Jehova. Nzi lo tsakiswa nguvu hi lezi nzi nga zi wona ni ku zizwa, kanilezi hi kota ya wutomi ga mina gi nga talelwe hi zilo, a nza ha simamangi nzi wonana ni Timboni ka xikhati lexo. Anzhako ka malembe mambiri, a patswa wo kari wa Timboni, ku nga Juan na Maite, va lo nzi enzela. Hi lo mbheta tihweti tinharu na hi maha mabhulo ya ziwutiso ni mihlamulo, laha hi magumo ku nga sangula xigonzo xa Biblia.

A xigonzo xinwe ni xinwani nzi wa xi rinzela hi mahlo yo pswhuka! Nzi lo hlola zontlhe hi xinwe xinwe, na nzi tirisa maBiblia manharu yo hambana kasi ku tiyiseka lezaku hakunene a Timboni ta Jehova ti gonzisa lisine. Zalezo nzi lo pola lezaku nzi wa lahlekile nguvu mhakeni ya wukhongeli hi makume ya malembe. Nzi lo karateka nguvu hi kuhambana ka hombe loku ku nga hi kona xikari ka lezi nzi nga zi kholwa kale ni lezi nzi nga kari nzi gonza lomu ka Biblia. Zi lo nzi binza nguvu, a ku khwatsi hi loku a kukholwa ka mina ku wova sinya ya hombe yi kunuliwako.

Zonake, a nuna wa mina wa wumbiri i lo babya nguvu, afa. Ka xikhati xalexi xa xinwe, nzi lo nyima ku tira, nzi suka le Bilbao hi xikhatanyana. Juan na Maite va lo sukawu. Lexi xi nga tsakisiko hi lezaku nzi lo nyima ku gonza Biblia. Hambulezo, lomu mbilwini nzi wa zi tiva lezaku nzi kumile tshomba. Cima a nzi zangi nzi yi rivala.

Anzhako ka 20 wa malembe, lezo na nzi hi ni 82 wa malembe, Juan na Maite va lo wuya Bilbao, niku va lo nzi enzela. A nzi no ku tsaka hi ku tlhela nzi va wona kambe! Nzi lo zi wona lezaku Jehova i wa nga nzi rivalangi, niku nzi lo sangulisa xigonzo xa mina. Juan na Maite va’ve ni lihlaza-mbilu la hombe ka mina, hakuva nzi wa tolovela ku va maha ziwutiso zalezi za zinwe hi kuphindaphinda. Nzi wa lava ku tshama hi kuzwa mitlhamuselo leyo ya Biblia kasi ku daya a kukholwa ka mina ka kale. Nzi wa lava kambe a ku zwisisa khwatsi mitlhamuselo leyo kasi nzi zi kota ku tlhamusela lisine la Biblia ka vanghana ni maxaka ya mina.

A siku nzi nga bapatizwa — na nzi hi ni 87 wa malembe — gi’ve siku go tsakisa nguvu ka wontlhe wutomini ga mina. Lezo zi mahekile ka mutlhangano wa xipanze wa Timboni ta Jehova. A dota go kari ga muKristu gi lo veka kanelo yi seketelwako ka Biblia, yi nga vekelwa hina hi ngaya kubapatizweni. A kanelo leyo yi lo nzi khumba nguvu laha ka kuza nzi rila. Nzi lo yi zwisa ku khwatsi hi Jehova a wulawulako na mina hi kukongoma. Anzhako ka kuva nzi bapatizilwe, ku lota Timboni to tala ti ta nzi dzunza hi xiboho lexi nzi nga xi mahile — hambu lezi a kutala ka tona hi nga kala hi nga tivani!

LEZI NZI NGA VUNEKISA ZONA:

Nzi wa zi tiva hi kale lezaku Jesu Kristu i “ndlela.” (Johani 14:6) Kanilezi, a xigonzo xa mina xa Biblia xi nzi vunile a ku tiva Jehova, ku nga loyi Jesu a hi yisako ka yena. Zalezi nza zi kota ku khongela ka Nungungulu kota Dadani wa mina ni Munghana wa mina wo ranzeka. A ku gonza a bhuku Achegue-se a Jeováa zi cicile nguvu a wutomi ga mina. A khati go sangula nzi nga gi gonza, nzi gonzile gontlhe hi wusiku ginwe ntsena! Zi nzi khumbile nguvu a ku wona a wuxinji legi Jehova a nga nago.

Loku nzi alakanyela a xikhati lexi nzi xi mbhetileko na nzi lava lisine ka wukhongeli, nzi alakanya a magezu ya Jesu yaku: “Kombelani, mu ta nyikiwa; lavani, mu ta zi kuma; gongonzani, mu ta vululelwa.” (Mateu 7:7) Lezi makunu nzi kumileko a mihlamulo leyi nzi nga yi vilela nguvu, nzi tsaka nguvu hi ku yi bhulela vanwani.

Nzi na ni 90 wa malembe, kanilezi nza hi ni zo tala zo gonza ha Jehova. A mitlhangano yontlhe nzi yi wonako Salawini ya Mufumo zimaho zo hlawuleka — hi kota ya wutivi legi nzi gi kumako, ni kuva zinwe ni vamakabye va mina vo ranzeka. Nzi xuva nguvu a ku tlhela nziva mugonzisi misaveni ya Paradise leyi hi tsumbisiwako. (Kuvululelwa 21:3, 4) Nzi xuva nguvunguvu a ku wona varanzekako va mina na va vuxiwa ni kuva ni lungelo ga ku va gonzisa lisine la Biblia. (Mitiro 24:15) A nzo ku zi xuva a ku va hlawutela a xinyikiwo xa lisima lexi Jehova a nzi nyikileko wukhosaneni ga mina!