A Hi Bhuleleni Vanwani Xungetano Hi Kutsumba Ka Hina Ka Mufumo
1 Masikwini lawa yo gumesa ya zikarato, a vanhu vo tala misaveni a va na kutsumba. (Efe. 2:12) Hi wupumbu, a vanwani va veka kutsumba kabye ka titshomba, tihosi, siensia ya masikwana lawa, ni ka zinwani. A hi kutsaka loku hi nga nako hi kuva ni kutsumba ka lisine xungetano hi wumanziko, a kutsumba loku ku nga “xirikhiso xa muhefemulo, lexi xi tsumbekileko ni ku tiya”! — Maheb. 6:19.
2 Hasi ka wurangeli ga Mufumo wa Nungungulu, a misava yi ta hunzuluswa yiva paradise. A varanzekako lava va fileko va ta vuxiwa. (Miti. 24:15) A wusiwana, wubihi, mababyi, kukhosahala, ni kufa zi nga ta ha va kona. (Tis. 9:18; Mat. 12:20, 21; Kuv. 21:3, 4) Lezo hi zo kari za zitsumbiso za Jehova zi ta nga tatiseka na ku nga hi kale. Hi gihi tshamela ga kutsumba ka hina legi nguvunguvu u gi xuvako?
3 Kanela A Mahungu Yo Saseka: A hi faneli ku fihla a kutsumba ka Mufumo. A ku ranza Nungungulu ni vaakelani zi hi kuca a ku pimanyisa Jesu ni ku “kanela a mahungu yo saseka ka lava va vumalako, . . . kuba hungu hi kutlhatlhiswa ka la’va bohilweko, ni kutlheliselwa kuwona ka zikhumu, ku tlhatlhisa lava va giswako mbhukutsa.” (Luka 4:18) Mupostoli Paule i xumayele a mahungu yo saseka lomu mabazarini ni kwihi laha a vanhu va nga kumeka kona. Yena i wa ti nyikela nguvu wutirelini. (Miti. 18:5) A ku lanzela xikombiso xakwe xa ku hlengela hi kupinyama wutirelini zi ta hi vikela a “kukaratekela a za tiko, ni kukhohlisa ka kufuma” lezaku zi nga mbheti ntamu a kutsumba ka hina ka wuKristu. — Mar. 4:19.
4 A kutsumba ka hina ka Mufumo a ku hunguki a xikhati lexi hi tlhanganako ni vanhu va nga kombisiko kukhatala, lava va kombisako kutsakela kutsongwani nguvu ka mahungu ya Mufumo, kutani lava va wonekako ku khwatsi va hi kaneta. Hi ‘khomisisa a kuvumela ka kutsumba ka hina, kasi ku nga kanakaniswi.’ (Maheb. 10:23) A hi “na tingana hi ivangeli.” (Rom. 1:16) Zi nga ha maheka lezaku a kutiyiseka ni kutimisela loku hi ku kombisako hi kugumesa zi kuca vo kari a kuva va ingisela.
5 Hambu lezi hi kufaneleko hi yisako kupima ka kuonheka ka matshamela ya misava lawa ma tatisako a ziprofeto za Biblia, hina a hi vaxumayeli va timhango. A ku hambana ni lezo, a wutireli ga hina gi kongomisa kupima ka kutsumba ka hina ka Mufumo — ku nga mahungu yo saseka ya Mufumo wa Nungungulu. Ngha hi xumayela a mahungu lawa yo saseka hi kutiyiseka ni kupinyama ‘lezaku hiva ni kutsumba ku tiyileko kala kugumeseni.’ — Maheb. 6:11.