Vuna A Zigonzani Za Biblia Lezaku Ziva Vahuweleli Va Mahungu Yo Saseka Ya Mufumo
1 A ntiro lowu Jesu a wu nyikileko vapizani vakwe kota lezi wu kombisiwako lomu ka Mateu 28:19, 20 wu wa patsa zo tala hakunene. A vapizani va Kristu va gonzisilwe a ku maha vanwani vapizani lava, hi kufamba ka xikhati, va nga wa ta simama ni ntiro wa ku maha vapizani. Ku wa ta zimiwa a xiseketelo xa kuhuwelelwa ko gumesa ka mahungu yo saseka ya Mufumo wa Nungungulu misaveni yontlhe xikhatini lexi xa lisima nguvu xo gumesa, lexi hi nga ka xona zalezi. — Mat. 24:14.
2 A zigonzani za hina za Biblia zi nga hava vana va hina kutani vanhu vanwani lava va ti yimiseleko ku gonza na hina a Biblia. Hakunene ha zi lava nguvu a ku vuna vanhu lavo lezaku va tiva va tlhela va tatisa a wutihlamuleli gabye wutsumbu ga ku vuna vanwani lezaku va maha vapizani va Jesu Kristu. — Luka 6:40.
3 Va Longisele Lezaku Va Nyika Wukustumunyu: Kuca lava u gonzako navo lezaku va byela vanwani lezi va zi gonzako. Va hlawutele a matshango yo tsakisa ya ntiro wa simu. Gonzisa vana va wena na va ha hi va tsongwani lezaku va hlengela nguvu wutirelini hi laha va nga zi kotako ha kona. (Tis. 148:12, 13) Zi kombise hi magezu ni zimaho lezaku wa gi tsakela nguvu a wutireli. — 1 Tim. 1:12.
4 Jehova i tirisa ntsena lava va vumelako va tlhela va hlayisa a milayo yakwe yo lulama. Hi lisine a vahuweleli lava va ha hiko vaswa a va na wutivi go fana ni ga vatireli va Mufumo lava va buvileko, va ti hendleletileko, va tlhela va bapatizwa, kanilezi lava va ha hiko vaswa va fanele ku kholwa va tlhela va zi kota ku tlhamusela a tigonzo to ranga ta Biblia. (Wona Organizados, pp. 79-82.) Kota lezi va ti hambanyisileko hi kumbhelela ni “Babuloni loyi wa Hombe” ni lezi va nga ha ti nghenisiko ka wupolitika, va fanele kuva kona mitlhanganwini xontlhe xikhati. — Kuv. 18:2, 4; Joh. 17:16; Maheb. 10:24, 25.
5 Loku u tiyiseka lezaku a munwe wa zigonzani za wena za Biblia wa ringanelwa hi kuva muhuweleli a nga bapatizwangiko, tivisa a muwoneleli loyi a rangelako bandla hi kuhatlisa. Yena i ta maha malulamiselo ya lezaku a madota mambiri ma tlhangana na wena zinwe ni xigonzani xa wena xa Biblia kasi ku boha lezaku xa ringanelwa hi kuva muhuweleli a nga bapatizwangiko wa mahungu yo saseka ya Mufumo zinwe ni bandla ke. Zonake ku tava lungelo ga wena a ku simama u gonzisa a xigonzani xa wena xa Biblia a xikhati lexi mu fambako zinwe ntirweni wa simu.