Xi Tirise Khwatsi A Xikhati Xa Wena Wutirelini

¹ Hakunene ku na ni zilo zo tala zi faneleko ku mahiwa wutirelini ga hina, niku a xikhati lexi xi seleko xi komile. (Joh. 4:35; 1 Kor. 7:29) Loku hi ti longisela khwatsi na ka ha hi mahlweni, hi ta xi tirisa khwatsi a xikhati lexi hi xi vekeleko a wutireli.

² Ti Longisele: Mahlweni ka kuya mutlhanganwini wa ntiro wa simu, tiyiseka lezaku u nawo a mabhuku lawa u ta nga ma lava niku wa xi alakanya khwatsi a xingheniso xa wena. Anzhako ka kuva a mutlhangano wu valilwe hi mukhongelo, kongoma kuya sinwini. Lezo zi ta vuna wena zinwe ni lava u nga navo lezaku mu tira hi laha zi kotekako ha kona nzeni ka xikhati lexi xi vekelweko ntiro wa simu.

³ Loku u nyikilwe ntiro wa ku rangela a mutlhangano wa ntiro wa simu, sangula hi xikhati. U nga hlwelisi a mutlhangano — ngha wu nga hunzi a 10 kuya ka 15 wa timeneti. Mahlweni ka ku tlhatlha a ntlawa lowo, tiyiseka lezaku a munwe ni munwani wa ku tiva lomu a yako a ya tira kona niku wa mu tiva loyi a ta nga famba naye.

⁴ Loku U Hi Wutirelini: Zalezo a mutlhangano wa ntiro wa simu wu gumesako, u nga ha djikadjiki handle ka xilaveko, kanilezi tekela kuya xipanzeni lexi u avelweko xona. Loku u alakanya lezaku u ta tsemarisa a ntiro wa simu, kuzilava u nga ha maha malulamiselo ya lezaku u tirisa a mova wunwani kasi a vamakabye lava va seleko va nga hlongoleli ku gumesa. Loku mu tira hi ntlawa, alakanyela vanwani lava kuzilava va ku rinzelako lezaku u gumesa a bhulo. Lezo zi nga ha patsa a ku salisa hi xichawo a munhu loyi a lavako ku kanetisana na wena kutani ku maha malulamiselo ya ku tlhelela wo kari loyi a kombisako kutsakela. — Mat. 10:11.

⁵ A xikhati lexi mu mahako maenzo yo wuyela, mu nga zi kota ku potsa a ku fambafamba nguvu handle ka xilaveko hi kuva mu khatalela a maenzo lawa ma nga ka xipanze xo kari mahlweni ka kuya ka xinwani. Zi nga ha koteka a ku fonela vanhu vo kari kasi ku tiyiseka lezaku mu taya mu ya va kuma makaya kabye. (Mav. 21:5) Loku u alakanya lezaku u ta teka xikhati xo leha ni wo kari loyi u mu enzelako, ku nga ha mahiwa malulamiselo ya lezaku lava va nga ka ntlawa wa wena va xumayela kutani va maha manwani maenzo yo wuyela lomu kusuhani ni kaya ka loyi u mu enzelako.

⁶ Hi hanya xikhatini xa kutshovela ka hombe ka moya. (Mat. 9:37, 38) Lokuloku a ntiro lowu wu ta gumesa. Hi kota ya lezo, ngha a kunavela ka hina ku hi ku xi tirisa khwatsi a xikhati xa hina loku hi hi wutirelini.