Ha Zi Kota Ku Mu Nyika Xo Kari Jehova
1 Xana u wa zi tiva lezaku a vanhu va zi kota ku mu nyika xo kari Nungungulu? Abeli i wa teka zo kari xikari ka zifuyo zakwe za lisima, a nyika Jehova, Noa na Joba va wa maha minyikelo yo fana. (Gen. 4:4; 8:20; Joba 1:5) Hi lisine, a minyikelo leyo a yi zangi yi fumisa a Muvangi ne ni kutsongwani, hakuva zontlhe zilo zi sina zi lumba yena. Kanilezi a minyikelo leyo yi kombisile a liranzo lo eta leli a vavanuna lavo vo tsumbeka va nga hi nalo ka Nungungulu. Inyamutlha, ha zi kota ku tirisa xikhati xa hina, ntamu, ni titshomba ta hina lezaku hi nyika Jehova a “muphahlo wa kubonga.” — Maheb. 13:15.
2 Xikhati: Hakunene za dzunzeka nguvu a ku xava xikhati ka zilo zi nga hiko za lisima lezaku hi hlengela nguvu wutirelini! (Efe. 5:15, 16) Kuzilava ha zi kota ku cica a longoloko wa hina lezaku hi tira kota maphayona yo vunetela hweti yinwe kutani kuhunza nzeni ka lembe. Ginwani ga masiku hi nga ha engetela a xikhati lexi hi tolovelako ku xi mbheta wutirelini. Loku hi wo engetela a 30 wa timeneti viki ni viki ka xikhati xa hina xa tolovelo, a wutireli ga hina gi wa ta anza hi tihora timbiri nzeni ka hweti hi wutsongwani ga kona.
3 Ntamu: Lezaku hi kuma ntamu wa ku tira wutirelini zi lava lezaku hi potsa mihlakano ni mitiro leyi yi hi siyako na hi karele nguvu laha ka kuza hi nga ha zi koti ku nyika Jehova lezi za chukwana. Ku laveka kambe lezaku hi nga karateki nguvu hi zilo lezi zi nga wa ta maha a mbilu ya hina yi “korama,” zi hi yivela a ntamu lowu hi nga wa ta mu tirela ha wona Nungungulu. (Mav. 12:25) Hambu loku hi hi ni xigelo xa lisine xa kukarateka, hakunene za lisima nguvu a ku ‘rula a nzhwalo wa hina ka Jehova’! — Tis. 55:22; Fil. 4:6, 7.
4 Titshomba: Ha zi kota kambe ku nyikela a titshomba ta hina lezaku hi seketela a ntiro wa kuxumayela. Paule i kucile a maKristu-kulobye lezaku xikhati xontlhe ‘ma ti vekela kota lezi ma zi kumako’ kasi ma fela ku kuma zo nyika lava va nga ni xilaveko. (1 Kor. 16:1, 2) Hi kufanana, hinawu hi nga ti vekela lezi hi zi kumako kasi ku maha ha zona a munyikelo ka zilaveko za bandla ga hina zinwe ni ka ntiro wa misava yontlhe. Jehova wa zi tsakela lezi hi zi nyikelako hi mbilu ya hina, hambu loku zi hi zi tsongwani. — Luka 21:1-4.
5 Jehova wa hi nyika zilo zo tala nguvu. (Jak. 1:17) Hi kombisa a kubonga ka hina hi ku nyikela hi matsenya a xikhati xa hina, ntamu, ni titshomba ta hina kasi ku mu tirela. Loku hi maha lezo hi tsakisa Jehova, “hakuva Nungungulu wa ranza loyi a nyikako na a xalele.” — 2 Kor. 9:7.