Ngha Hi Akana Loku Hi Hi Wutirelini
1 Hina hontlhe ha tsakela kuzwa mhaka yi tiyisako hlana yi wulwako hi xikhati xi faneleko. (Mav. 25:11) A xikhati lexi hi tirako ni vanwani wutirelini, xana hi nga tiyisekisa kuyini lezaku a mabhulo ya hina ma tiyisa hlana?
2 Mabhulo Ma Akako: Hakunene za aka nguvu a ku bhula hi zilo za moya a xikhati lexi hi nga ntirweni wa kuxumayela! (Tis. 37:30) Ha zi kota ku wulawula hi zingheniso za hina kutani ku hlawutela matshango ya ntiro wa simu ma tiyisako hlana lawa ha hi ku ma kumako. (Miti. 15:3) Xana hi gonzile mhaka yo kari yo tsakisa ka xigonzo xa hina venyi xa Biblia, ka marevista ma ha hi ku chikelako, kutani mutlhanganwini wa bandla? Ha zi kota ku bhula hi timhaka ti kombisilweko ka kanelo wa laha kubaseni lowu ha hi ku wu zwako Salawini ya Mufumo.
3 Hi nga ha tizwa na hi mbhelile ntamu loku a nwinyi wa muti a vuxa xikarato lexi hi nga zi kotiko ku xi tlhatlha. Loku lezo zi humelela, zi wa ta vuna nguvu a ku tirisa timeneti ti tsongwani anzhako ka ku suka mutini lowo lezaku hi kambisisa zinwe ni makabye loyi hi tirako naye lezi hi nga zi kotisako zona ku yimisana ni xiyimo lexo xikhatini xi tako, kuzilava hi ku tirisa a bhuku Raciocínios. Niku loku hi tsakele xo kari ka xingheniso xa makabye loyi hi tirako naye, ha zi kota ku mu tiyisa hlana hi ku mu dzunza na zi huma mbilwini.
4 Sangula Hi Wena: Xana ku na ni vo kari lomu ka ntlawa wa hina wa xigonzo xa bhuku lava hi kalako hi nga se tira navo lokuloku? A ku ramba wo kari lezaku hi famba naye wutirelini zi nga ha maha lezaku hi tiyisana. (Rom. 1:12) A maphayona ya xikhati xontlhe ni yo vunetela ma nengela loku ma kuma vanwani va ku tira navo, nguvunguvu hi xikhati xa ni mixo nguvu, kutani ni gambo nguvu, ku nga xikhati lexi ku vumalekako a vahuweleli vo tira navo. Ha zi kota ku vuna maphayona hi ku famba nawo wutirelini. Xana ku na ni muhuweleli wo kari a nga ni mababyi kutani a wutomi gakwe gi nga mu vumeleliko ku maha zo tala wutirelini? A ku maha malulamiselo ya ku famba ni munhu wa matshamela lawo, kuzilava ku ya fambisa naye xigonzo xa Biblia, za vuna. — Mav. 27:17.
5 A ku dzunza ni ku bonga munhu, hambu ka zilo zitsongwani, za tiyisa hlana xontlhe xikhati. Hi fanele ku alakanya lezo a xikhati lexi hi tirako ni vanwani wutirelini, kota lezi hi lavako ku “akana.” — 1 Tes. 5:11.