Wa Vilelwa!
1 Ka zikhati zo kari, hi nga ha vumaleka ka mutlhangano munwe wa bandla kutani ku hunza, na hi alakanya lezaku ‘a nga kona loyi a to nzi vilela; ne va nga ta zi wona a ku a nzi kona.’ Lezo a hi lisine! A ku fana ni xiro xihi ni xihi xa miri wa hina, a munwe ni munwani wa hina i maha xipanze xa lisima lezaku a bandla gi simama gi hanya. (1 Kor. 12:12) A kuvumaleka ka hina mitlhanganweni ya viki ni viki ka zi kota ku mbheta ntamu vanwani lava va yako ka yona. Loku u ngayi, zi tive lezaku wa vilelwa!
2 A Xipanze Xa Wena Xa Lisima: Paule i wa xuva a ku tlhangana ni vamakabye vakwe. A bhuku ga Va Le Roma 1:11, 12 gi tlhamusela a xigelo xa kona: “Kasi nza fela ku mu nyika a xinyikiwo xo kari xa ka moya . . . lezaku, loku nzi hi xikari ka nwina nzi fela ku tsakiswa zinwe na nwina hi kukholwa loku ku nga kona ka hina hontlhe, a ka nwina ni ka mina.” Hi kufanana, a mihlamulo ya hina, zipanze za hina mitlhanganweni, ni kuvakona ka hina wutsumbu, zi hi vuna a kuva hi akana lezaku hi simama ndleleni ya kutsumbeka. — 1 Tes. 5:11.
3 Xana a wu xuvi ku wona vanwani mitlhanganweni ya bandla? Hakunene wa ingisela khwatsi a mihlamulo yabye u tlhela u bonga a magezu lawa ma kombisako a kukholwa kabye. A zinyikiwo zabye hi tlhelo ga moya za ku aka. Loku va wa nga hi kona mutlhanganweni, u wa ta wona lezaku wa kiyelelwa hi nchumu wa lisima. A vamakabye va wena va xinuna ni va xisati va ti zwisa zalezo loku wena u ngayi.
4 A Lisima La Mitlhangano: Ka khati go kari, A Sentinela gi tlhamusele lezi a mitlhangano yi nga ya lisima ha zona lezaku hi simama hi hanya hi tlhelo ga moya, giku ngalo: “Ka tiko legi ga gujeguje ni ga mahanyela yo biha, a bandla ga wuKristu wuchavelo ga moya ga lisine . . . , wutshamu ga kurula ni liranzo. Hikwalaho, ngha uva kona mitlhanganweni yontlhe hi kukhanzakanya.” (w93-T 15/8 11) A siku ni siku, hi yimisana ni ziyimo lezi zi hi mbhetako ntamu hi tlhelo ga moya. Loku hi nga ti woneli, hi anda ku khomeka nguvu hi kukarateka ka hina laha ka kuza hi rivala a zilo za moya za lisima nguvu. Hina hontlhe hi khegela ka vanwani lezaku hi kuma a kutiyiswa loku hi ku lavako kasi ku simama na hi bohene ni ku chivirika ntirweni wa Nungungulu. — Maheb. 10:24, 25.
5 A kuvakona ka hina mitlhanganweni ka lisima. Ka zikhati zo kari, a mababyi ni zimaho zi nga tivekiko na ka ha hi mahlweni zi nga ha hi valela. Loku ku nga hi lezo, ngha zikhati zontlhe hi ti yimisela a ku hlayiwa xikari ka zidlemo zi tsombeneko zi dumisa Jehova! — Tis. 26:12.