Kwadru Ga Ziwutiso

◼ Zini lezi a vana va faneleko ku gonza kasi va kula va buva hi tlhelo ga moya?

A vapswali va nga maKristu va maha zo tala kasi ku wundla vana vabye hi “kululeka ni kulaya” ka Jehova. (Efe. 6:4) Hi xikombiso, a vapswali va zi wona na zi vuna nguvu a ku kambisisa mutsalo wa siku ni siku ni vana vabye ka mixo yinwe ni yinwani. Ka wukhozeli ga ngango ni ka zikhati zinwani, a mingango yi nga ha hlalela ni ku bhulisana zinwe hi vidiyu, ku bhula hi tividiyu ta vaswa ti nga ka jw.org kutani timhaka tinwani ta vaswa ti nga ka tinzima Os Jovens Perguntam, ku kombisa matimu ya Biblia hi wudrama, kutani ku maha mikombiso yo kari. Hambulezo, kasi a vana va kula vaya kubuveni, va fanele ku tlhela va gonzisiwa a lisine lo eta la Biblia. — Maheb. 6:1.

Ehleketa hi lezi hi gonzisako lava hi va kumako xipanzeni xa hina. Ka lienzo lo sangula kutani ka la wumbiri, hi tolovela ku ti karatela ku sangula xigonzo xa Biblia hi kutirisa a bhuku Zini Lezi A Biblia Gi Zi Gonzisako Hakunene? Loku hi mbhetile, hi tirisa legi ga ‘Tshamani Liranzweni La Nungungulu.’ Hikuyini? A bhuku A Biblia Gi Gonzisako gi maha zigonzani zi kuma wutivi-tshinya ga Mitsalo. A bhuku ‘Liranzo La Nungungulu’ gi va gonzisa lezi va nga tirisisako zona a matshinya ya milayo ya Biblia wutomini ga siku ni siku. A ku kambisisa a mabhuku lawa ya mambiri ku vuna lava va ha hiko vaswa lezaku va “zima mitsu” ka Kristu va tlhela va “tiyiswa kukholweni.” (Kol. 2:6, 7) Xana a timhaka leti a ti nge tlheli ti vuna vana va hina? Vonawu va na ni xilaveko xa ku gonzisiwa va tiva nzhiho, Mufumo, ni xiyimo xa vafileko. A vana kambe va na ni xilaveko xa ku tiva ku hikuyini Nungungulu a vumelelako kuxaniseka ni lezi va nga tivisako zona a masiku yo gumesa ya mafambisela lawa ya zilo. Va fanele ku kholwa lezaku a Timboni ta Jehova ti na ni lisine. A vaswa kambe va fanele ku zwisisa a matshinya ya milayo ya Biblia ni lezi va nga gonzisisako zona a “kupima kabye.” (Maheb. 5:14) Kunene, a vapswali va fanele a ku ehleketa hi tanga ni kuzwisisa ka vana vabye. Hambulezo, a vanana vo tala va na ni wuzikoti go sangula ku gonza a lisine lo eta la Biblia hambu loku va ha hi vaswa nguvu. — Luka 2:42, 46, 47.

Kasi ku vuna vapswali, a site jw.org yi tava ni mahungu ya ku gonza hi wona ma seketelwako ka bhuku A Biblia Gi Gonzisako. A mingango yi nga ma kuma lomu ka Web site ya hina hi ku nghena ka ENSINOS BÍBLICOS > ADOLESCENTES. Ka xikhati xi tako, a mahungu manwani ya ku gonza hi wona ma ta longiselwa na ma seketelwa ka bhuku ‘Liranzo La Nungungulu.’ Hi lisine, wonawu a mabhuku lawa hi ku kongoma ma nga tirisiwa. A vapswali va nga boha a ku xana va ta tirisa a mahungu lawa ka xipanze xa Wukhozeli gabye ga Ngango, ka xikhati lexi va fambisako xigonzo ka munwe wa vana vabye, kutani ka xikhati va gonzisako a n’wana wabye a ku maha xigonzo xakwe wutsumbu ke.