Tirisa a xibhukwana Xingheniso ka Mhaka ya Nungungulu — kasi ku sangula bhulo
1. Xitiro muni xa xiswa hi xi amukeleko kasi ku xi tirisa wutirelini?
1 A wugandli gi chukwatisilweko ga Tradução do Novo Mundo, hi xiNgiza, gi na ni xipanze kusanguleni ka gona xi nge “Xingheniso ka Mhaka ya Nungungulu.” Hi xiTshwa ni tirimi tinwani, a mahungu lawo ma humesilwe kota xibhukwana gotsovanyanweni wa muganga wa 2014 “Simama ku lava a Mufumo wa Nungungulu kuranga!” Hi nga xi tirisisa kuyini a xitiro lexi xa xiswa a xikhati hi longiselako zingheniso kasi ku zi tirisa wutirelini? Kota lezi a xibhukwana lexi xi xaxametako mitsalo hasi ka ziwutiso zo hambanahambana za Biblia, a ku fana ni lezi a bhuku Raciocínios gi nga tshamisa zona, xi nga hi vuna nguvu a ku sangula mabhulo.
2. Hi nga xi tirisisa kuyini a Xingheniso ka Mhaka ya Nungungulu wutirelini?
2 U nga ha tirisa xiwutiso 8, uku: “Hi enzela vaakelani va hina hi xikhati xi tsongwani hakuva vanhu vo tala va ti wutisa ku ‘Xana Nungungulu i na ni nanzu hi kota ya kuxaniseka ka vanhu?’ [Ka zipanze zo kari, za bhinzula a ku mu komba xiwutiso lexo a nwinyi wa muti.] Hi wahi mawonela ya wena? [Rinzela hlamulo.] A Biblia gi nyika hlamulo wo zwala wa xiwutiso lexi.” Hlawula mutsalo wunwe kutani ku hunza, u wu gonza lomu ka Biblia ha goce, u tlhela u tlhamusela. Loku a nwinyi wa muti a kombisa kutsakela, u nga ha mu komba a 20 wa ziwutiso zi xaxametilweko ka xibhukwana zonake u mu kombela a hlawula xinwe lezaku mu ta bhula hi xona ka lienzo li lanzelako. Kutani u nga ha mu nyika a ginwe ga mabhuku ya hina ya xigonzo legi gi nga ni mahungu yo tala ya mhaka leyi mu bhulileko hi yona.
3. Hi nga xi tirisisa kuyini a Xingheniso ka Mhaka ya Nungungulu kasi ku sangula bhulo ka zipanze lezi a vanhu va kona va nga lumbiko wuKristu?
3 A ziwutiso 4 ni 13 kala 17 zi nga vuna nguvu loku hi xumayela ka zipanze lezi a vanhu va kona va nga lumbiko wuKristu. Hi xikombiso, u nga tirisa a mahungu ya xiwutiso 17, uku: “Hi ku enzela hi xikhati xitsongwani ni mahungu ya ku vuna mingango. Wa kholwa lezaku a mingango inyamutlha yi yimisana ni zikarato zo tala? [Rinzela hlamulo.] A mipatswa yo tala yi kuma xivuno ka magezu lawa ya wutlhari: A “wasati ngha ava ni xichawo ka nuna wakwe.” [A ku na xilaveko xa ku wula lezaku a magezu lawo u ma susa ka Va Le Efesusi 5:33. Loku u bhula ni wasati u nga tshaha a magezu ya Va Le Efesusi 5:28.] U alakanya lezaku a ku tirisa wusungukati legi zi nga vuna wukatini?”
4. Zini u nga mahako kugumeseni ka bhulo ga wena ni munhu a nga lumbiko wukhongeli ga wuKristu?
4 Kugumeseni ka mabhulo ya wena, maha malulamiselo kasi mu ta simama ni bhulo ka siku ginwani. Kuzilava u nga ha maha makungo yo ta bhula hi wunwe wa mitsalo le’yinwani ya xiwutiso lexi u xi tirisileko. Hi xikhati xi faneleko, mu byele a nwinyi wa muti lezaku a magezu ya wutlhari lawa u tako na u mu bhulela u ma kuma ka Biblia. Hi kuya hi mabhulo lawa mu sinako mu vile nawo zinwe ni lezi a gi wonisako zona a Biblia, mu nyike a bhuku legi u alakanyako lezaku gi ta mu tsakisa. — Wona a xiengetelo xi nga ka Wutireli ga hina ga Mufumo ga Dezembro wa 2013.