A Mufumo wa seketelwa​— va aka tiyindlu ta wukhozeli va tlhela va nyika xivuno loku ku humelela timhango

U NGHENA Salawini ya nwina ya Mufumo kanilezi a hi zona u yi tivisako zona. Kusukela kale u tizwa matshanza hi yindlu leyo. U nga ha alakanya zilo zo tsakisa lezi zi humeleleko a xikhati mu nga kari mu yi aka ka malembana ma ha hi ku hunzako. Kanilezi a matshanza lawa u nga nawo hi kota ya yona ma engetele makunu hakuva, hi xikhatanyana, a Salawu leyo ya Mufumo yi mahilwe wutshamu ga ku nyika hi kona xivuno lava va humelelweko hi mhango. Anzhako ka loku a wutshamu legi mu hanyako kona gi hahlulilwe hi tindambi ti vangilweko hi xingulu, a Kometi ya Ravi yi hatlile yi maha malulamiselo ya lezaku lava va welweko hi mhango leyo va kuma zakuga, tinguwo, mati yonwa, ni zinwani zivuno. A zilo lezo zi longiselwa kwalomo Salawini ya nwina. Yi sangula ku tala hi vamakabye va tako va ta phaka a xivuno lexo, lava a kutala ka zikhati va xililikako mihloti hi kutsaka.

Jesu i te ngalo lexi xi nga wa ta kombisa nguvu a vanhu vakwe kuranzana. (Joh. 13:34, 35) Ka xipanze lexi, hi ta wulawula hi lezi a liranzo la wuKristu li kombisiswako zona mitirweni yo kari yi mahiwako hi Timboni ta Jehova, ku nga kuaka ni ku nyika xivuno loku ku humelela timhango. A liranzo lontlhe lelo xikombiso xa lezaku hi rangelwa hi kufuma ka Jesu.