Engetela wutlhari ga wena kuchumayeleni — Nyima ku gondza Bhibhiliya ni lava va kalako va nga pswali mihandzu

HIKUYINI ZVI NGA ZVA LISIMA? A vanhu va fanele ku khongela vitweni ga Jehovha kasi va ponisiwa. (Rom 10:13, 14) Hambulezvo, a hi vontlhe lava va vhumelako ku gondza Bhibhiliya va lavako ku hanya hi milayo ya Jehovha. Hi tirisa khwatsi a cikhati ca hina kuchumayeleni hi ku vhuna lava hakunene va lavako ku cica zvokari kasi va tsakisa Jehovha. Loku a cigondzani ci nga pswali mihandzu yo woneka andzhako ka ku gondza naco hi cikhati co leha, zvi nga va wutlhari a ku nyima ku gondza naco. Hi tirisa cikhati leco kasi ku vhuna lava Jehovha a va kokako vata kakwe ni ka hlengeletano yakwe. (Joh 6:44) Kunene, loku ka cikhati ci tako va kombisa ku cica loku ku kombako ku va ‘longile ku amukela wutomini ga pindzukelwa’ hi tava ni litsako la ku simama hi gondza navo a Bhibhiliya. — Mit 13:48.

U NGA ZVI MAHISA A KUYINI?

• Dzundza a cigondzani ca wena hi lezvi ci tsakelako ku gondza a lisine. — 1Tm 2:4

• Khanyisa a lisima la ku hanya hi lezvi a zvi gondzako. — Luk 6:46-49

• Hi ndlela yi nene, mu tlhamusele mufananiso wa Jesu wa muxwanyi, u mu kombela a ehleketa khwatsi hi lezvi zvi mu mahako a nga pswali mihandzu. — Mat 13:18-23

• Mu tlhamusele hi cichavo a ku hikuyini u nyimako ku gondza naye

• Mu byele a ku u tata na uya kaya kakwe kasi kuya mu tiyisa niku u ta tlhela u gondza naye kambe loku a kombisa ku pswala mihandzu

WONA A VHIDHYU, U GUMESA U HLAMULA ZVIWUTISO LEZVI:

• Ka mabhulo lawa, cini u ci gondzileko leci ci kombileko lezvaku a cigondzani ci wa nga pswali mihandzu ya moya?

• A muhuweleli i ci vhunisile kuyini a cigondzani lezvaku ci wona a ku ci wa fanele ku cica?

• A muhuweleli i vhululisile kuyini ndlela yaku zvi tlhela zvi koteka ku va sangula ku gondza cikhatini ci tako, loku makunu a cigondzani ci longile?