CIGONDZO 12

Kombisa lirandzo ni kuzwela-wusiwana

1 Va Le Tesalonika 2:7, 8

LEZVI U FANELEKO KU MAHA: Komba lava u bhulako navo lezvaku wa va randza niku u lava ku va vhuna.

Alakanyela hi lava u bhulako navo. Longisela a mbilu ya wena hi ku ti alakanyisa a zvikarato lezvi va kumanako nazvo. Zama ku alakanyela lezvi va ti zwisako zvona.
Hlawula khwatsi a magezu ya wena. Lwela ku tangalisa, u chavelela ni ku tiyisa lava u bhulako navo. U nga tirisi magezu lawa ma nga wa ta va khunguvanyisa na zvi nga laveki, ne u nga wulawuli zvahava hi vangakholwiko kutani ku wulawula kubiha hi lezvi va zvi kholwako hi mbilu yontlhe.
Kombisa kukhatala. Komba lezvaku hakunene wa khatala hi lava u bhulako navo hi ku wulawula hi gezu ga gi nene ni ku maha majesto ma faneleko. U nga rivali ku a nghohe ya wena ya wulawula; hikwalaho, tshamela ku n’wayitela.

U nga yi hi ku ti kurumeta kasi u kombisa lezvi u ti zwisako zvona kutani ku zvi kombisa u hundzeleta. A cikhati u lerako, lera zvi zwala lezvi loyi a nga wula timhaka leto a nga ti zwisa zvona, kanilezvi u nga zvi mahi hi ndlela ya ku a vanhu va wona wena. Ti karatele ku wulawula hi ndlela yi nene ni ya lirandzo.