A va zvi kotangi ku va tsikisa ku chumayela

Ku wa hi ni wanuna wo kari a nga kala a nga zvi koti ku famba, loyi a nga kari a tshama laha nyangweni ya tempeli a kombela zomola siku ni siku. Ni gambo go kari, i no wona Pedro na Johani na va nghena lomu tempeleni. I no va byela lezvi: ‘Ndzi kombela zomola’. Pedro aku: ‘Ndzi lava ku ku nyika nchumu wa wunene nguvhu a ku hundza mali. Hi vito ga Jesu, suka u yima u tlhela u famba’! Pedro i no mu vhuna ku suka a yima, niku a wanuna loye i no sangula ku famba! A vanhu va no tsaka nguvhu hi cihlamaliso leci laha ka kuza ni van’wani votala va kholwa ka Jesu.

Kanilezvi a vapristi ni vaSadhusi va no zangara. Va no khoma vapostoli va famba navo tribhunali, va yaku: ‘Himani a nga mu nyika ntamu wa ku hanyisa wanuna loyi’? Pedro aku: ‘Hi nyikilwe ntamu hi Jesu Kristu, loyi n’wina mu nga mu daya’. A varangeli va wukhongeli va no banguleka, vaku: ‘Tsikani ku wulawula hi Jesu!’ Kanilezvi a vapostoli va no hlamula, vaku: ‘Hi nga ta tsika. Hi fanele ku wulawula hi yena’.

Zvalezvi Pedro na Johani va nga tsikiwa va famba, va noya ka vapizani lava van’wani va ya va hlawutela lezvi zvi nga humelela. Va no khongela ka Jehovha na va hi zvin’we, vaku: ‘Jehovha, hi kombela ku u hi tiyisa hlanha kasi hi zvi kota ku simama hi maha ntiro wa wena’. Jehovha i no va nyika moya wo basa va simama ku chumayela ni ku hanyisa vababyi. Ku no simama ku engetela vanhu van’wani vo tala, va kholwa ka Jesu. A vaSadhusi va no va zonda nguvhu a vapostoli laha ka kuza va va khoma va va vhalela paxweni. Kanilezvi, ni wusiku ga kona, Jehovha i no rumela ngilozi yi ya vhulula tivati ta paxo, yi byela vapostoli, yiku: ‘Tlhelani lomu tempeleni mu ya gondzisa’.

Ni mixo ya kona, a tribhunali ya varangeli va wukhongeli yi no byeliwa lezvi: ‘A paxo ga ha khotsilwe. Kanilezvi a vavanuna lava mu nga va vhalele va humile! Zvezvi va lomu tempeleni va gondzisa vanhu’! A vapostoli va no khomiwa kambe va yisiwa tribhunali. A mupristi wa hombe aku: ‘Hi mu layile lezvaku mu nga ha wulawuli kambe hi Jesu!’ Kanilezvi Pedro i no hlamula, aku: “Hi fanele ku ingisa Nungungulu kota hosi a ku hundza ku ingisa vanhu.”

A varangeli va wukhongeli va no zangara nguvhu laha ka kuza va lava ku daya vapostoli. Kanilezvi a muFarisi wo kari wa ku hi Gamaliyeli i no suka a yima, aku: ‘Ti woneleni! Kuzvilava a vavanuna lava va vhuniwa hi Nungungulu. Mu lava kulwa na Nungungulu futsi’? Va no ingisa wusungukati gakwe. Va no vaba va tlhela va va byela kambe lezvaku va fanele ku tsika ku chumayela, va gumesa va va tsika va famba. Kanilezvi, a vapizani va Jesu a va tsikangi ku chumayela hi kota ya lezvo. Va no simama ku chumayela a mahungu ya manene — lomu tempeleni ni hi muti ni muti — na va nga chavi nchumu.