‘I Nungungulu wa vahanyako’

Xana a kufa ku na ni ntamu wa hombe ku hunza Nungungulu? A zi nge mahi! Ku nga zi kotisa kuyini a kufa — kutani ni wihi munwani “nala” — a kuva ni ntamu wa hombe ku hunza “Nungungulu wa Ntamu-wontlhe”? (1 Va Le Korinte 15:26; Eksodusi 6:3) Nungungulu i na ni ntamu wa ku fuvisa kufa hi ku vuxa vafileko, niku hi zalezo a tsumbisako ku maha misaveni yakwe ya yiswa.a Hi kwihi a kutiya ka xitsumbiso lexi? Jesu, a N’wana wa Nungungulu, i hi hlamula hi magezu ma nga ni ntamu wa ku tata timbilu ta hina hi kutsumba. — Gonza Mateu 22:31, 32.

Na a wulawula ni vaSadusi, lava va nga kala va nga kholwi ka kuvuka ka vafileko, Jesu i te ngalo: “Hi ku kumbuka a kuvuka hi ka vafileko, a mu gonzangi lezi zi nga wulawuliwa ka nwina hi Nungungulu ke, aku: Mina nzi Nungungulu wa Abrahama, ni Nungungulu wa Isaka, ni Nungungulu wa Jakobe? Nungungulu a hi Nungungulu wa vafileko, kanilezi ngwa vahanyako.” Laha Jesu i wa wula a bhulo legi Nungungulu a ngava nago na Mosi xihlahleni xa nzilo kwalomo ka va 1514 Mahlweni ka Nguva ya Hina. (Eksodusi 3:1-6) Kota kuwula ka Jesu, a magezu ya Jehova ka Mosi yaku — “Mina nzi Nungungulu wa Abrahama, ni Nungungulu wa Isaka, ni Nungungulu wa Jakobe — ma komba lezaku a xitsumbiso xa kuvuka ka vafileko xi ta tatiseka hakunene. Hi ndlela muni?

Hi nga alakanyela a xiyimo xa kona. A xikhati lexi Jehova a nga wulawula na Mosi, Abrahama, Isaka, na Jakobe va wa sina va file kale. Ku wa hunza 329 wa malembe na Abrahama a file, Isaka 224, Jakobe 197. Hambulezo, Jehova i te “hi mina” Nungungulu wabye, a nga te “nzi wa hi” Nungungulu wabye. Jehova i wulawulile hi vavanuna lavo va vanharu va fileko a ku khwatsi hi loku va wo hanya. Hikuyini?

Jesu i tlhamusele aku: “[Jehova] a hi Nungungulu wa vafileko, kanilezi ngwa vahanyako.” Hi nga alakanyela lezi a magezu lawo ma wulako zona. Loku ku wa nga hi na kuvuka ka vafileko, Abrahama, Isaka, na Jakobe va wa ta tshama kufeni kala kupinzuka. Hikwalaho, Jehova i wa tava Nungungulu wa zirumbi. Lezo makunu zi wa ta komba ku a kufa ku na ni ntamu wa hombe ku hunza Jehova — a ku khwatsi hi loku a nga hi na ntamu wa ku tlhatlhisa malanza yakwe ka kufa.

Makunu hi ta chikelela magumo wahi xungetano hi Abrahama, Isaka, Jakobe, ni malanza manwani ya Jehova ma fileko? Jesu i wulile magezu lawa ya ntamu: “Ka yena vontlhe vahanyi.” (Luka 20:38) Kunene, zi tiyile nguvu ku a kungo ga Jehova ga ku vuxa a malanza yakwe yo tsumbeka ma fileko gi ta tatiseka laha ka kuza a ma wona kota mahanyako. (Va Le Roma 4:16, 17) Jehova i ta simama ku veka malanza yakwe ma fileko lomu maalakanyweni yakwe kala ka xikhati xi faneleko kasi a ma tlhelisela wutomi.

Xana a kutsumba ka ku tlhela u tlhangana ni a ranzekako wa wena a fileko ka ku khumba? Loku zi hi tano, alakanya lezaku Jehova i na ni ntamu nguvu ku hunza kufa. A ku na nchumu lowu wu nga mu tsanzekisako ku tatisa a xitsumbiso xakwe xa ku vuxa vafileko. Zi ngo yini loku wo ti nyika xikhati u gonza xungetano hi xitsumbiso xa kuvuka ka vafileko ni Nungungulu loyi a to xi tatisa? A ku maha lezo zi ta ku vuna ku tshinela ka Jehova, ‘a Nungungulu wa vahanyako.’