Pedro na Ananiasi va lo hemba — Hi nga gonza yini?

Kota lezi u zi tivako, a ku hemba ku wula zilo u zi tivako lezaku a hi lisine. Xana u tshuka u hemba? — a Hambu vanhu va hombe va ranzako Nungungulu va tshuka va hemba. Kuzilava wa tiva wo kari lomu ka Biblia a nga hemba. A vito gakwe hi Pedro, a munwe wa vapostoli va Jesu va 12. Wona lezi zi nga maha Pedro aza a wula mawunwa yo kari.

Anzhako ka ku Jesu a khomilwe, i yisilwe kaya ka mupristi wa hombe. Ku wa hi laha phinzulani. Pedro i nghenile mutini wa mupristi na a nga tiviwangi. Hi kota ya kuwoninga ka nzilo, a nanza ga xisati legi gi tsikileko Pedro a nghena gi lo mu tiva, giku: “Wenawu u wa hi na Jesu.” Hi kuchava, Pedro i lo kaneta.

A Biblia gi ngalo loku ku hunzile xikhati xo kari “a munwani wasati i lo mu wona,” aku: “Loyi munhu kambe i wa hi na Jesu.” Pedro, a kaneta kambe. Anzhako ka xikhatana xo kari, Pedro i tshinelelwe hi vanwani vaku: “Hakunene wenawu u munwe wa vona.”

Pedro i wa chava. Hikwalaho, i lo hemba hi khati ga wunharu, aku: “A nzi mu tivi loyi munhu.” A nkuku wu loba. Jesu i lo hunzuluka a cuwuka Pedro, zonake Pedro a alakanya lezaku ka tihora titsongwani mahlweni ka lezo Jesu i wa mu byelile lezi: “Na wu nga se kuba nkuku, u ta nzi kaneta kunharu.” Pedro i lo huma, a ya rila. I wa ti laya nguvu!

Xana zi nga ku humelelawu zo fana ni lezi? —  U nga hava xikoleni, uzwa a zigonzani-kuloni na zi wulawula hi Timboni ta Jehova. A xinwe xiku: “Tona a ti bayetheli mujeke.” A xinwani xiku: “A tiyi wusochweni.” A xinwani kambe xiku: “Tona a hi maKristu, hiku a tigi Khisimuso.” Zonake a xinwe xi hunzuluka xi ku wutisa lezi: “Kona hambu wena a wu Mboni ya Jehova?” U taku yini? — 

Zi lava ku u ti longisela na zi nga se ku humelela kasi u nyika a hlamulo wa wu nene. Pedro i wa nga ti longiselangi. A xikhati a ngazwa kutshikelelwa, i lo hemba! Hambulezo, i ti solile hi lezi a nga zi maha, niku Nungungulu i mu tsetselele.

Ananiasi, a mupizani munwani wa Jesu wa zana ga malembe go sangula, yenawu i hembile. Kanilezi Nungungulu a nga mu tsetselelangi, ge hambu sati wakwe Safira. Safira ni nuna wakwe va wa no bhula ku hemba. A hi wone a ku hikuyini Nungungulu a nga kala ku tsetselela Ananiasi na Safira.

Khume ga masiku nzhako ka ku Jesu a siyile vapostoli vakwe a tlhelela ka Nungungulu le tilweni, ku bapatizilwe a xipimo xa 3.000 wa vanhu le Jerusalema. A kutala ka vona va wata hi ka matiko ya le kule kasi ku taga a Mubuzo wa Pentekosta. Anzhako ka ku va mahile vapizani va Jesu, va lavile ku simama hi masiku yo kari kasi va gonza zo tala xungetano hi kukholwa kabye ka kuswa. Hikwalaho, a vapizani vo kari va Jesu va tirisile mali yabye wutsumbu kasi ku va vuna.

Ananiasi ni sati wakwe va lo xavisa xipanze xo kari xa simu gabye kasi va kuma mali ya ku vuna vapizani lavo va nga ha hi ku bapatizwa. A xikhati lexi Ananiasi a nga tisa mali ka vapostoli, yena i te ngalo yi wa hi yona yontlhe a nga xavisile hi yona. Kanilezi yi wa nga hi yona! I wa susile yo kari kasi ku yi tirisela zakwe! Nungungulu i lo bhoxa mhaka leyi ka Pedro, zonake Pedro a byela Ananiasi aku: ‘A wu hembelangi vanhu, kanilezi u hembele Nungungulu.’ Laha Ananiasi a ngazwa magezu lawo i lowa hasi afa! Loku ku hunzile a tihora tinharu a sati wakwe i lo nghena. Na a nga zi tivi lezi zi mahekileko hi nuna wakwe, i lo hembawu a sefa na yenawu.

Lexi xigonzo xa lisima nguvu: A ku wulawula lisine za lisima! Kunene, hontlheni hi fanele ku gonza ka xikombiso xa Pedro na Ananiasi! Hambulezo, hontlheni ha tshuka hi maha zihoxo, nguvunguvu loku ha ha hi vanana. A wu tsaki hi ku tiva lezaku Jehova wa ku ranza niku i ta ku tsetselela a ku fana ni lezi a nga mahela Pedro? —  Kanilezi, alakanya lezaku hi fanele ku wulawula lisine. Niku loku hi tshuka hi maha a xihoxo xa hombe xa ku hemba, hi fanele ku khongotela Nungungulu lezaku a hi tsetselela. Kuzilava hi zalezo a nga maha Pedro, niku Jehova i mu tsetselele. Loku hi ti karatela ku nga hembi kambe, Nungungulu i ta hi tsetselela na hinawu!