“Kombelani, mu ta nyikiwa”

“Hosi, hi gonzise ku khongela.” (Luka 11:1) A xikombelo lexi xi mahilwe hi munwe wa vapizani va Jesu. Kota xipanze xa hlamulo wakwe, Jesu i lo hlawutela mifananiso yimbiri yi hi gonzisako a ndlela ya ku khongela hi tlhela hi zwiwa hi Nungungulu. Loku ku hi ku u tshukile u ti wutisa a ku xana Nungungulu wa ingisela a mikhongelo ya wena ke, wona a hlamulo wa Jesu. — Gonza Luka 11:5-13.

A mufananiso wo sangula wu wulawula hi loyi a khongelako. (Luka 11:5-8) Ka mufananiso lowu, a wanuna wo kari i amukela mupfhumba laha phinzulani, kanilezi a nga na zakuga za ku mu nyika. Yena i zi wona na zi hi za xihatla a kuva a mu lavela xokari. Hambu lezi gi nga wusiku nguvu, i suka aya ka munghana wakwe kasi ku ya pemba zibaba zo kari. A munghana wakwe i sangula hi ku maha mihoni a ku vuka hi lezi a nga kuetleleni ni ngango wakwe. Kanilezi, loyi a amukeleko mupfhumba a nga tsukuli; i simama ku kombela kala a munghana wakwe a vuka a mu nyika lezi a zi lavako.a

Xana a mufananiso lowu wu hi gonzisa yini xungetano hi mukhongelo? Jesu i hi komba lezaku hi fanele ku phikelela — hi simama ku kombela, ku lava, ni ku gongonza. (Luka 11:9, 10) Hikuyini? Xana Jesu i wa lava ku wula lezaku a xikhati lexi hi khongelako ho gongonza livati la Nungungulu wa mihoni? Ahihi. Jesu i wa lava ku wula lezaku a kuhambana ni munghana loyi a sangulako hi ku maha mihoni, Nungungulu i xuva nguvu ku tatisa zikombelo zi nene za lava va khongelako kakwe hi kukholwa. Hi kombisa a kukholwa ka hina hi ku khongela hi kuphikelela. Loku hi simama ku kombela, hi komba lezaku hakunene hi na ni xilaveko xa lezi hi zi kombelako niku ha kholwa lezaku Nungungulu i ta hi nyika — loku zi yelana ni kuranza kakwe. — Marku 11:24; 1 Johani 5:14.

A mufananiso wa wumbiri wu wulawula hi ‘Loyi a zwako mikhongelo,’ ku nga Jehova. (Tisimu 65:2) Jesu i wutisa lezi: “Hi wihi raru xikari ka nwina, loku a nwana wakwe a mu kombela xibaba, a ta nga mu nyika ribye ke? Ni loku a kombela xidluwani, i ta mu nyika nyoka ke? Kutani loku a kombela a tanza, i ta mu nyika a hume ke?” A hlamulo wa kona wu dlunyatekile — a ku na raru wa liranzo a nga wa ta nyika vana vakwe a zilo a zi tivako lezaku zi ta va bayisa. Hi kulanzela, Jesu i lo tlhamusela a mufananiso wakwe: Loku a vararu va nga mbhelelangiko va tiva ku “nyika a zinyikiwo zo saseka” a vana vabye, “a Raru wa [hina] wa le tilweni a nga ta hunzeleta, a ku nyika a moya wa ku basa” — a xinyikiwo xa xi nene nguvu ka zontlhe — ka vana vakwe va laha misaveni lava va mu kombelako ke?b — Luka 11:11-13; Mateu 7:11.

Wu hi gonzisa yini a mufananiso lowu xungetano hi Jehova, a ‘Muzwi wa mikhongelo’? Jesu i hi ramba lezaku hi wona Jehova kota Raru wa liranzo loyi a xuvako nguvu ku tatisa a zilaveko za vana vakwe. Hikwalaho, a vakhozeli va Jehova va tlhatlhekile ku mu tshinelela ni zikombelo za timbilu tabye. Niku hi ku tiva lezaku i va xuvela za zi nene, vona va hatlisa va vumela a hlamulo wakwe ka zikombelo zabye, hambu loku wu nga hi wona lowu va nga wu rinzele.c