Xana a wukhongeli ga tsumbeka mhakeni ya Mahanyela?
Silvia, a tirako ka koponi ya lihanyo, i ngalo: “Nzi gonzile ni vanhu vo tala va nga ti wula lezaku vakhongeli. Kanilezi, va wa kabulara xikholeni va tlhela va dzaha timbangi. Ni ku khwatsi va khongela zi wa nga woneki.”
A wanuna wo kari a vitwako Lionel i ngalo: “A vatiri-kulori va ranza ku hemba vaku va babya. Va na ni wukhongeli kanilezi a va gi tirisi — vakhongeli hi vito ntsena.”
A wukhongeli a gi na ntamu wutomini ga wunyingi ga vanhu. A vanhu vo tala inyamutlha va ka “xiyimo xa ku khozela Nungungulu” kanilezi “va kaneta a ntamu wa kona.” (2 Timote 3:5) A varangeli vabye va wukhongeli a va va vekeli xikombiso xa xi nene niku a va nyiki mitlhambi yabye a wusungukati ga Mitsalo legi gi lavekako kasi vava ni mahanyela ma nene. A zi hlamalisi lezi a vanhu vo tala va nge ngalo Nungungulu a nga khatali hi mahanyela yabye.
ZINI LEZI A BIBLIA GI ZI GONZISAKO?
A Biblia gi komba lezaku a mahanyela ya hina ma mu khumba nguvu Nungungulu. A xikhati lexi a vaIsraeli va kale va nga hluwukela Nungungulu, “va [wa] mu zwisa kubayisa.” (Tisimu 78:40) Kanilezi, ku na ni ‘kutsaka ka hombe le tilweni’ loku a munhu a cica a mahanyela yakwe yo biha. (Luka 15:7) A xikhati lexi a munhu a tivako a matshamela yo saseka ya Dadani wa hina wa le tilweni, a liranzo lakwe hi Nungungulu lo kula, li mu kuca ku ranza lezi Nungungulu a zi ranzako ni ku venga lezi Nungungulu a zi vengako. — Amosi 5:15.
A TIMBONI TA JEHOVA TI MAHISA KUYINI?
A revista Deseret News ga Salt Lake City, Utah, Estados Unidos, gi ngalo a Timboni ta Jehova “ti vuna vanhu lezaku vava ni kuzwanana mingangweni yabye, va vuna vanwani va tlhela vava vanhu vo tsumbeka.” Gi tlhela giku: “Ti hanya hi matsinya ya milayo yo tlakuka ya mahanyela. Tona ti kholwa lezaku a ku dzaha, ku popiwa, ku delela mimuri, tibheja, wubhayi, ni ku hlengela masangu ni munhu wa xiro xa wubeleki xo fana za onha a kuzwanana ka munhu na Nungungulu.”
Xana a varangeli va wukhongeli va vuna mitlhambi yabye lezaku yi hanya hi matshinya ya milayo ya Nungungulu ya mahanyela?
Xana a ku gonza a wumunhu ga Nungungulu zi ti vunisa kuyini a Timboni? Silvia, a kumbukilweko le kusanguleni, i ngalo: “A wukanganyisi ga mahiwa nguvu ka tikoponi ta lihanyo. Zi wa ta olova a ku minawu nzi gi maha. Kanilezi a ku zwisisa lezi Jehovaa a gi wonisako zona za nzi vuna ku maha za zi nene. Nzi na ni litsako niku nzi pepile moyeni.” Silvia i ngalo a ku hanya hi lezi a zi kholwako zi chukwatisile a wutomi gakwe.
a Jehova i vito ga Nungungulu kota lezi gi kombiswako lomu ka Biblia.