HLOKO YA MHAKA YA KAPA: HIKUYINI KU NGA NI KUXANISEKA? KONA KU TA MBHELA RINI?
Kufa vanhu vo tala nguvu va nga hiko na nanzu!
Noelle i wa hi nwanana wo saseka a nga ranza ku tsala zithombe. Ka wusiku go kari ga ximumu, i wa kari a fambafamba laha kaya kabye a si ya wela lomu ka pisina. Lezo zi mahekile na ku kiyela maviki mambiri ntsena lezaku a tlhanganyisa mune wa malembe.
Charlotte, Daniel, Olivia, Josephine . . . Lawa mavito ya vokari xikari ka vaswa va 20 kuya ka 26 wa malembe lava va nga duwulelwa ka xikola xo kari le Connecticut, Estados Unidos, hi 14 ka Dezembro wa 2012. Ka siku ga xirilo, Obama i lo wula mavito ya vaswa lavo a gumesa aku ngalo ka vanhu lava va nga bayisekile: “A makhombo lawa ma fanele ku mbhela.”
Bano, wa 18 wa malembe, i sukile Iraque hi 1996 aya Noruega ni ngango wabye. A vanghana vakwe va wa mu vitana hi vito ga wunwanana vaku Sun Rays. Kanilezi, hi 22 ka Julho wa 2011, Bano i lo dawa zinwe ni vanhu vanwani va 76 hi xigevenga, lexi xi nga gumesa xi ti bhuma xiku: “Nza ti sola . . . hi ku kala nzi nga zi kotangi ku daya vo tala ku hunza laha.”
Misaveni yontlhe, zi tolovelekile kuzwa matimu yo tshisa yo fana ni lawa. Hi nga alakanyela hlomulo ni kubayisa loku ku vangiwako hi timhango, wugevenga, tiyimpi, terrorismo, makhombo ya ntumbuluko, ni zinwani. Ku na ni vanhu vo tala va dawako kutani ku xanisiwa na va nga hi na nanzu!
A vanhu vo kari va wula lezaku Nungungulu hi yena a nga ni nanzu wa kona, na va alakanya lezaku a Muvangi wa hina a nga khatali hi vanhu. A vanwani ve ngalo Nungungulu wa ku wona a kuxaniseka ka hina kanilezi a nga zi lavi ku hi vuna. Ni vanwani kambe va alakanya lezaku a makhombo lawo ma wa sina ma tsalilwe ku ma ta maheka. Zi wonekisa ku khwatsi a mawonela a ma mbheli mhakeni leyi. Makunu, hi nga yi kuma kwihi a mihlamulo yo zwala ni yo tsumbeka ke? Ka tinzima ti lanzelako hi ta kambisisa a Mhaka ya Nungungulu, a Biblia, kasi hi kuma mihlamulo xungetano hi lezi zi vangako kuxaniseka ni lezi ku to mbhelisa zona.