MIHLAMULO YA BIBLIA

U nga li kumisa kuyini litsako wukatini?

A wusungukati ga Biblia mhakeni ya ku kuma litsako wukatini ga vuna hakuva gita hi ka Jehova Nungungulu, a Mutumbuluxi wa wukati. Gi hi gonzisa ku ti karatela kuva ni matshamela lawa ma mahako lezaku kuva ni litsako wukatini, gi tlhela gi hi tlharihisa lezaku hi potsa lawa ma onhako wukati. Gi tlhela gi hi gonzisa mawulawulela ma engetelako litsako wukatini. — Gonza Va Le Kolosi 3:8-10, 12-14.

A nuna ni sati va fanele ku kombisana xichavo. Loku a munwe ni munwani wabye a maha xipanze lexi Nungungulu a mu nyikileko wukatini, va nga kuma litsako. — Gonza Va Le Kolosi 3:18, 19.

Xini xi vunako wukati lezaku gi pinzuka?

A nuna ni sati a va nge tsikani loku va ranzana. Nungungulu i hi gonzisa ku ranza. Yena ni N’wana wakwe Jesu, zikombiso za zi nene nguvu za liranzo la lisine. — Gonza 1 Johani 4:7, 8, 19.

Loku a nuna ni sati va hi ni xichavo hi wukati kota lulamiselo ga Nungungulu, va nga ta tsikana. Nungungulu i vangile wukati na a lava lezaku giva kubohana ka simasima ka wanuna ni wasati kasi a mingango yi tiya. Za koteka ku a wukati gi pinzuka hakuva Nungungulu i vangile wanuna ni wasati lezaku va vunana, kutani ku a munwe ni munwani a tatisa lezi zi kiyelako ka munwani hi tlhelo ga nyama ni ga kutizwa. I va mahile kambe hi mufananiso wakwe, lezi zi va vunako ku pimanyisa a liranzo lakwe. — Gonza Genesisi 1:27; 2:18, 24.